ພິທີເຊັນສັນຍາວ່າດ້ວຍການບໍລິການທີ່ປືກສາດ້ານການເງິນ ແລະການຄໍ້າປະກັນການຈໍາໜ່າຍຮຸ້ນ ລະຫວ່າງ ທະນາຄານການຄ້າຕ່າງປະເທດລາວ ມະຫາຊົນ (ທຄຕລ) ກັບບໍລິສັດ ຫຼັກຊັບ ລາວຈີນ ຈໍາກັດ ໄດ້ຈັດຂຶ້ນໃນວັນທີ 13 ມີນາ 2019 ຢູ່ທີ່ ທຄຕລ ໂດຍການເຂົ້າຮ່ວມຂອງທ່ານ ສີລາ ວຽງແກ້ວຮອງລັດຖະມົນຕີ ກະຊວງການເງິນ, ທ່ານນາງ ວັດທະນາ ດາລາລອຍ ຮອງຜູ້ວ່າການ ທະນາຄານແຫ່ງ ສປປ ລາວ, ທ່ານ ບຸນເຫຼືອ ສິນໄຊ ວໍຣະວົງ ປະທານສະພາບໍລິຫານ ທຄຕລ, ມີຫົວໜ້າສໍານັກງານ ຄະນະກໍາມະການຄຸ້ມຄອງຫຼັກຊັບ, ຜູ້ອໍານວຍການໃຫຍ່ ຕະຫຼາດຫຼັກຊັບລາວ ແລະພາກສ່ວນກ່ຽວຂ້ອງເຂົ້າຮ່ວມ.
ທ່ານ ພູຂົງ ຈັນທະຈັກ ຜູ້ອໍານວຍການໃຫຍ່ ທຄຕລ ກ່າວວ່າ: ການລົງນາມບໍລິການທີ່ປຶກສາດ້ານການເງິນ ແລະຄໍ້າປະກັນການອອກຈໍາໜ່າຍຮຸ້ນໃນເທື່ອນີ້ ຖືວ່າເປັນການສືບຕໍ່ຜັນຂະຫຍາຍມະຕິກອງປະຊຸມຜູ້ຖືຮຸ້ນ ທຄຕລ ທີ່ຈັດຂຶ້ນໃນວັນທີ 27 ເມສາ 2018 ຊຶ່ງໄດ້ເຫັນດີຮັບຮອງໃຫ້ກະຊວງການເງິນຫຼຸດສັດສ່ວນການຖືຄອງຮຸ້ນຢູ່ ທຄຕລ ຈາກ 70% ເປັນ 51%. ຈຸດປະສົງຂອງການຫຼຸດສັດສ່ວນການຖືຮຸ້ນດັ່ງກ່າວ ກໍ່ເພື່ອເປັນການເປີດໂອກາດໃຫ້ມວນຊົນທົ່ວໄປສາມາດຮ່ວມເປັນເຈົ້າຂອງຮຸ້ນ ທຄຕລ ໄດ້ກວ້າງຂວາງຂຶ້ນ ແລະເປັນການເປີດຮັບເອົາຄູ່ຮ່ວມຖືຮຸ້ນຍຸດທະສາດທີ່ມີບົດຮຽນໃນການຄຸ້ມຄອງບໍລິຫານ ແລະຄວາມເຂັ້ມແຂງທາງດ້ານການເງິນ ມາຮ່ວມກັນພັດທະນາ ທຄຕລ ໃຫ້ມີການຂະຫຍາຍຕົວຢ່າງໝັ້ນຄົງຂຶ້ນໄປເລື້ອຍໆ.
ຜ່ານການຄົ້ນຄ້ວາພິຈາລະນາລະອຽດຖີ່ຖ້ວນ ພາຍໃຕ້ການຊີ້ນໍາຈາກພາກລັດຖະບານ ກໍ່ຄືກະຊວງການເງິນ ເຫັນວ່າບໍລິສັດຫຼັກຊັບ ລາວ-ຈີນ ຈໍາກັດ ມີເງື່ອນໄຂອັນເໝາະສົມ ແລະສອດຄ່ອງຕາມຄວາມຕ້ອງການຂອງ ທຄຕລ ຈຶ່ງໄດ້ຕົກລົງເລືອກ ບໍລິສັດຫຼັກຊັບລາວຈີນເປັນບໍລິສັດທີ່ປຶກສາການເງິນ ແລະຄ້ຳ ປະກັນການອອກຈຳໜ່າຍຮຸ້ນ, ເຊິ່ງບໍລິສັດດັ່ງກາວ ເປັນບໍລິສັດທີ່ໄດ້ຮັບອະນຸຍາດການສ້າງຕັ້ງບໍລິສັດຈາກຄະ ນະກໍາມະການຄຸ້ມຄອງຫຼັກຊັບ ແລະຕະຫຼາດຫຼັກຊັບ ໂດຍມີການໃຫ້ບໍລິການເຕັມຮູບແບບຄື: ທີ່ປຶກສາດ້ານການເງິນ ແລະຄໍ້າປະກັນການອອກຈໍາໜ່າຍຮຸ້ນ, ນາຍໜ້າຊື້-ຂາຍຫຼັກຊັບ, ຄ້າຫຼັກຊັບ ແລະອ່ື່ນໆ. ສ່ວນການຈໍາໜ່າຍຮຸ້ນ ທຄຕລ ຈໍານວນ 19%ແມ່ນຈໍາໜ່າຍ 2 ຮູບແບບຄື: ຈໍາໜ່າຍໃຫ້ນັກລົງທຶນທົ່ວໄປ ພາຍໃນ ແລະຕ່າງປະເທດ 10% ແລະຈໍາໜ່າຍຄູ່ຮ່ວມຍຸດທະສາດທີ່ໄດ້ຮັບການຄັດເລືອກ ຈາກກະຊວງການເງິນ ຈໍານວນ 9%.
ຜ່ານມາ, ບໍລິສັດຫຼັກຊັບ ລາວ-ຈີນ ຈໍາກັດ ຍັງມີປະສົບການຮ່ວມວຽກກັບ ທຄຕລ ໃນການອອກຈໍາໜ່າຍຮຸ້ນເພີ່ມທຶນໃຫ້ແກ່ຜູ້ຖືຮຸ້ນເດີມ (RO) ແລະມວນຊົນທົ່ວໄປ (PO) ໃນປີ 2017. ສໍາລັບຄັ້ງນີ້ ທຄຕລ ແລະບໍລິສັດ ຫຼັກຊັບລາວ-ຈີນ ກໍ່ຈະຮ່ວມກັນຈັດຕັ້ງປະຕິບັດການອອກຈຳໜ່າຍຮຸ້ນ 19% ທີ່ກະຊວງການເງິນຖືຄອງນັ້ນ ໃຫ້ປະສົບຜົນສຳເລັດຕາມຄາດໝາຍພາຍໃນເດືອນ ມິຖຸນາ 2019 ນີ້ ເຊິ່ງຄາດວ່າການຈຳໜ່າຍຮຸ້ນຄັ້ງນີ້ ຈະສາມາດດຶງດູດນັກລົງທຶນທົ່ວໄປທັງພາຍໃນ ແລະຕ່າງປະເທດໄດ້ຢ່າງກວ້າງຂວາງ ພ້ອມທັງຍັງເປັນການຊອກຫານັກລົງທຶນລາຍໃໝ່ ໂດຍສະເພາະ ແມ່ນຄູ່ຖືຮຸ້ນຍຸດທະສາດ ທີ່ຈະເຂົ້າມາຊ່ວຍກັນພັດທະນາວຽກງານດ້ານການເງິນ-ການທະນາຄານຂອງ ທຄຕລ ໃຫ້ເຂັ້ມແຂງຂຶ້ນຢ່າງບໍ່ຢຸດຢັ້ງ ພ້ອມທັງເປັນການຊ່ວຍຍົກລະດັບສະພາບຕະຫຼາດທຶນໃນລາວເຮົາໃຫ້ມີຄວາມຄຶກຄື້ນ ແລະ ເຕີບໃຫຍ່ຂະຫຍາຍຕົວ, ສາມາດປະກອບສ່ວນສ້າງສາເສດຖະກິດຂອງຊາດ ໃຫ້ມີຄວາມກ້າວໜ້າຂຶ້ນໄປເລື້ອຍໆ.
Hits: 12
