ທ່ານ ພູວົງ ພະມີສິດ ເຈົ້າຂອງສວນພຶກສາ
ທີ່ສວນພຶກສາ ເມືອງນາຊາຍທອງ ນະຄອນຫລວງວຽງຈັນ, ໃນໂອກາດສະເຫລີມສະຫລອງ ສວນພຶກສາ ຄົບຮອບ 2 ປີ ທ່ານ ພູວົງ ພະມີສິດ ເຈົ້າຂອງສວນພຶກສາໄດ້ໃຫ້ສຳພາດວ່າ: ປັດຈຸບັນສວນພຶກສາ ມີການພັດທະນາຄືບໜ້າໄປໃນຫລາຍດ້ານ ແລະ ໄດ້ຮັບຄວາມສົນໃຈ ຈາກນັກທ່ອງທ່ຽວທັງພາຍໃນ ແລະ ຕ່າງປະເທດ.
ໃນລະຍະບຸນປີໃໝ່ນີ້, ຄາດວ່າຈະມີນັກທ່ອງທ່ຽວເຂົ້າມະທ່ຽວສວນພຶກສາປະມານ 6 ພັນກວ່າຄົນ, ເຊິ່ງທາງສວນພຶກສາ ກໍໄດ້ມີການກະກຽມດ້ານການບໍລິການ ໃຫ້ວ່ອງໄວທັນໃຈດ້ານອາຫານ ແລະ ສະຖານທີ່ກໍໄດ້ມີການຕົບແຕ່ງໃຫ້ສວຍງາມຂຶ້ນຕື່ມ. ໃນສວນພຶກສາມີຮ້ານອາຫານ 3 ແຫ່ງ ຄື: ຮ້ານອາຫານຢູ່ສະໂມສອນ ຈະມີອາ ຫານລາວ, ຮ້ານອາຫານຕ່າງປະເທດ ແລະ ຮ້ານອາຫານສະໄລເດີ້ນ້ຳ.
ທ່ານ ພູວົງ ພະມີສິດ ຍັງໃຫ້ຮູ້ຕື່ມວ່າ: ການເຮັດສວນພຶກສາບໍ່ໄດ້ເນັ້ນດ້ານທຸລະກິດ ຫລື ຫວັງຜົນກຳໄລ, ແຕ່ຈະເຮັດເປັນສະຖານທີ່ພັກຜ່ອນທີ່ສວຍງາມ ໄວ້ຕ້ອນຮັບນັກທ່ອງທ່ຽວ ແລະ ປີຕໍ່ໄປແມ່ນມີແຜນຈະສ້າງສະຖານທີ່ປະຕິບັດທຳ ເພື່ອໄວ້ໃຫ້ຜູ້ທີ່ມັກຄວາມສະຫງົບມາປະຕິບັດທຳ. ພ້ອມນີ້, ຍັງເປັນບ່ອນສ້າງວຽກເຮັດງານທຳໃຫ້ປະຊາຊົນ ແລະ ນ້ອງນັກສຶກສາ ພາຍໃນບ້ານດ່ານຊ້າງ ແລະ ບ້ານດ່ານຊີ ຕື່ມອີກ.
ສວນພຶກສາ ເປັນສະຖານທີ່ທ່ອງທ່ຽວແຫ່ງໃໝ່ ຕັ້ງຢູ່ບ້ານດ່ານຊີ ເມືອງນາຊາຍທອງນະຄອນຫລວງວຽງຈັນ, ມີເນື້ອທີ່ 35 ເຮັກຕາ. ພາຍໃນສວນພຶກສາ ມີຫລາກຫລາຍກິດຈະກຳ ເປັນຕົ້ນ ຕຶກເບັດ, ໃຫ້ເຊົ່າລົດຖີບ, ຂີ່ມ້າ, ຂີ່ລົດໄຟຟ້ານໍາທ່ຽວ, ຂີ່ລົດ A-TV, ໄຕ່ສະລິງ, ສະໄລເດີນໍ້າ, ມີຂອງຫລີ້ນເດັກ 10 ກວ່າຊະນິດ, ບໍລິການອາຫານ ແລະ ເຄື່ອງດື່ມ, ມີດົນຕີເອເລັກໂທນ; ມີສວນດອກໄມ້ນາໆຊະນິດ. ພ້ອມນີ້, ຍັງມີພິພິທະພັນບັນດາເຜົ່າ ແລະ ຊຸດປະຈຳເຜົ່າ ໃຫ້ນັກທ່ອງທ່ຽວໄດ້ສວມໃສ່ນຳອີກ.
ທີ່ມາ: ຂປລ