ທີ່ແຂວງເຊກອງ, ທ່ານ ສະຫວັນຄອນ ຣາຊມຸນຕຣີ ຮອງລັດຖະມົນຕີກະຊວງ ຖວທ ໄດ້ເນັ້ນໜັກ ໃຫ້ພະແນກ ຖວທ ແຂວງເຊກອງເອົາໃຈໃສ່ 6 ໜ້າວຽກທີ່ສໍາຄັນ ໃນປີ 2019 ເປັນຕົ້ນວຽກງານດ້ານການເມືອງແນວຄິດ ເຊິ່ງ ກ່ອນອື່ນໝົດຕ້ອງມີແນວຄິດເປັນເອກະພາບ ຕໍ່ກັບແນວທາງນະໂຍບາຍຂອງພັກ-ລັດ, ມີຄວາມເຊື່ອໝັ້ນຕໍ່ການນໍາພາຂອງພັກ-ການຄຸ້ມຄອງຂອງລັດ ແລະ ມີຄວາມເປັນເອກະພາບພາຍໃນຢ່າງແທ້ຈິງ ໃນການດໍາເນີນວຽກງານຕ່າງໆ, ຈະວາງແຜນອັນໃດ, ກໍານົດອັນໃດ ກໍ່ຕ້ອງເປັນເອກະພາບກັນບົນພື້ນຖານແນວທາງແຜນນະໂຍບາຍ ແລະ ຕາມຫຼັກການນຳພາ ແລະ ເຄື່ອນໄຫວຂອງພັກ, ຕົກລົງຮັບຮອງເປັນເອກະພາບນໍາກັນແລ້ວ ກໍ່ຕ້ອງປຸ້ມລຸມສາມັກຄີເປັນເອກະພາບກັນຈັດຕັ້ງປະຕິບັດໃຫ້ສໍາເລັດ; ໃຫ້ຄົ້ນຄວ້າ ແລະ ກຳແໜ້ນແນວທາງນະໂຍບາຍ, ມະຕິຄໍາສັ່ງ, ລະບຽບການຕ່າງໆຂອງພັກ-ລັດ ຢ່າງເລິກເຊິ່ງ, ຖີ່ຖ້ວນ ແລະ ລະອຽດ, ເພື່ອຜັນຂະຫຍາຍໃຫ້ຖືກຕ້ອງ ແລະ ທ່ວງທັນເວລາ.
ໂດຍສະເພາະແມ່ນບັນດາມະຕິທີ່ອອກມາໃໝ່ໆ ຂອງກອງປະຊຸມພັກ, ຂອງສະພາແຫ່ງຊາດ ແລະ ຂອງລັດຖະບານ ເປັນຕົ້ນແມ່ນມະຕິກອງປະຊຸມຄົບຄະນະ ຄັ້ງທີ 7 ຂອງຄະນະບໍລິຫານງານສູກາງພັກ ສະໄໝທີ X ແລະ ມະຕິ 057/ຄບສພ ວ່າດ້ວຍການເພີ່ມທະວີການນຳພາແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ ແລະ ສ້າງຄວາມເຂັ້ມແຂງ ການຄຸ້ມຄອງມະຫາພາກ; ມະຕິ 056/ຄບສພ ວ່າດ້ວຍການປັບປຸງຮາກຖານການເມືອງ ຂອງລະບອບປະຊາທິປະໄຕ ປະຊາຊົນລາວ ໃຫ້ເຂັ້ມແຂງ ແລະ ໜັກແໜ້ນ; ໃຫ້ມີການຄົ້ນຄວ້າ, ກວດກາຄືນລະອຽດຖີ່ຖ້ວນ ແລະ ແທດເໝາະກັບສະພາບຕົວຈິງວຽກງານໃນປັດຈຸບັນ; ດ້ານກົງຈັກການຈັດຕັ້ງ ແລະ ບຸກຄະລາກອນ ຖ້າເຫັນວ່າໜ່ວຍງານໃດວຽກບໍ່ຫຼາຍ ຫຼື ວຽກຄ້າຍຄືກັນ, ບຸກຄະລາກອນແຕ່ລະບ່ອນພັດມີໜ້ອຍນັ້ນ, ຂໍໃຫ້ໂຮມເຂົ້າກັນ ເຮັດໃຫ້ກົງຈັກການຈັດຕັ້ງຮັດກຸມ ແລະ ສອດຄ່ອງກັບໜ້າວຽກຕົວຈິງ; ກ້າຕັດສິນໃຈ, ກ້າປະຕິບັດຢ່າງແທ້ຈິງ, ກວດກາເບິ່ງຄືນບ່ອນໃດພະນັກງານເຫຼືອບໍ່ພໍ, ພະນັກງານບໍ່ມີຄຸນະພາບ, ເຮັດວຽກແປະໆບາງໆ ກໍຕ້ອງແກ້ໃຫ້ໄວ.
ທ່ານ ຮອງ ລັດຖະມົນຕີ ຖວທ ຍັງຮຽກຮ້ອງໃຫ້ຖວທແຂວງເຊກອງ ເອົາໃຈໃສ່ການກໍ່ສ້າງພະນັກງານຢ່າງມີຈຸດສຸມ, ກໍານົດເປົ້າໝາຍກໍ່ສ້າງພະນັກງານສືບທອດປ່ຽນແທນໃຫ້ຈະແຈ້ງ ແລະ ຊຸກຍູ້ກໍ່ສ້າງຕາມແຜນຢ່າງແທ້ຈິງ.
ຕໍ່ກັບວຽກງານຖະແຫຼງຂ່າວ, ຂະຫຍາຍຕາໜ່າງໂທລະໂຄ່ງພາຍໃນແຂວງ, ສົ່ງເສີມການຊົມໃຊ້ສື່ແບບໃໝ່ໃຫ້ຫຼາຍ, ສ້າງເວັບໄຊ, ເຟດບຸກ, ຢູທູບຕາມທ່າອ່ຽງນິຍົມໃຊ້ຂອງສັງຄົມ, ເຮັດໃຫ້ສາມາດຕິດຕາມຂໍ້ມູນຂ່າວສານຂອງແຂວງໄດ້ຢ່າງວ່ອງໄວທັນການ ແລະ ເອົາໃຈໃສ່ປັບປຸງດ້ານເນື້ອໃນຂໍ້ມູນຂ່າວສານໃຫ້ດີຂຶ້ນ ຫັນມາຜະລິດຂ່າວທີ່ຕິດພັນກັບການສ້າງສາພັດທະນາ, ຕິດພັນກັບການດໍາລົງຊີວິດ, ວຽກດີຄົນເດັ່ນທີ່ເປັນບົດຮຽນໃຫ້ແກ່ສັງຄົມ, ຄຽງຄູ່ກັນນັ້ນ ກໍຕ້ອງໃຫ້ມີຂ່າວຕໍານິວິຈານ ໃນສິ່ງທີ່ບໍ່ຖືກຕ້ອງໄປພ້ອມໆກັນ ແລະ ຕີຕ້ານການໃສ່ຮ້າຍປ້າຍສີຕ່າງໆໃຫ້ວ່ອງໄວ.
ແຂວງເຊກອງຄົ້ນຄວ້າເບິ່ງທ່າແຮງຂອງແຂວງປະສານສົມທົບກັບພາກສ່ວນຕ່າງໆທີ່ກ່ຽວຂ້ອງ ເພື່ອພ້ອມກັນແກ້ໄຂສິ່ງອຸດຕັນ, ກີດຂວາງແກ່ການທ່ອງທ່ຽວໃຫ້ໄດ້ໂດຍໄວ ເພື່ອເຮັດແນວໃດໃຫ້ສາມາດເອື້ອອໍານວຍຄວາມສະດວກ ແລະ ເປັນການກະຕຸກຊຸກຍູ້ແກ່ການທ່ອງທ່ຽວ ເພື່ອປະກອບສ່ວນດຶງດູດນັກທ່ອງທ່ຽວເຮັດໃຫ້ປີທ່ອງທ່ຽວລາວ-ຈີນ 2019 ບັນລຸຕາມຄາດໝາຍ.
ອ່ານເພີ່ມຕື່ມ: facebook.com/999909013546212