ສະຖາບັນພັດທະນາສີມືແຮງງານລາວ-ເກົາຫຼີ ໄດ້ຮ່ວມມືກັບ ບໍລິສັດ ລາວຄວາລິຕີ ຈຳກັດ, ເປີດສອນການຝຶກສີມືແຮງງານ ສາຂາ ຊ່າງຖັກວິກຜົມ .
ໃນວັນທີ 8 ພຶດສະພາ 2019, ທີ່ ສະຖາບັນພັດທະນາສີມືແຮງງານລາວ-ເກົາຫຼີ, ໄດ້ມີພິທີລົງນາມບົດບັນທຶກການຮ່ວມມື ລະຫວ່າງ ສະຖາບັນພັດທະນາສີມືແຮງງານລາວ-ເກົາຫຼີ ແລະ ບໍລິສັດ ລາວຄວາລິຕີ ຈຳກັດ, ຕາງໜ້າເຊັນໂດຍ ທ່ານ ປອ ບຸນມາ ສິດທິໂສມ ຫົວໜ້າສະຖາບັນພັດທະນາສີມືແຮງງານລາວ-ເກົາຫຼີ ແລະ ທ່ານ Hitoshi Akatsaka ຜູ້ຈັດການ ບໍລິສັດ ລາວຄວາລິຕີ ຈຳກັດ, ມີທ່ານຮອງຫົວໜ້າຫ້ອງການ, ພະນັກງານວິຊາການ ແລະ ຄູອາຈານທີ່ກ່ຽວຂ້ອງເຂົ້າຮ່ວມເປັນສັກຂີພິຍານ.
ການຮ່ວມມືໃນຄັ້ງນີ້;ມີໄລຍະ 3 ປີ ແລະ ສາມາດຕໍ່ອາຍຸໄດ້ຖ້າຫາກຜົນການປະເມີນເປັນທີ່ພໍໃຈຂອງທັງສອງຝ່າຍ. ການຮຽນສາຂາຊ່າງຖັກວິກຜົມ ເປັນໄລຍະສັ້ນ 2 ເດືອນຕໍ່ຊຸດ, ພ້ອມອອກໃບຢັ້ງຢືນໃຫ້ພ້ອມ, ນັກຮຽນທີ່ມາຝຶກອົບຮົມໃນສາຂາ ວິຊາຊີບດັ່ງກ່າວ ແມ່ນຟຣີ ຄ່າຮຽນ, ຄ່າຫໍພັກ, ຄ່າອຸປະກອນການຮຽນ ແລະ ລ້ຽງເຂົ້າມື້ລະ 3 ຄາບ, ຫລັງຈາກຮຽນຈົບຫລັກສູດແລ້ວສາມາດ ເຂົ້າເຮັດວຽກກັບບໍລິສັດ ລາວຄວາລິຕີ ຈຳກັດໄດ້ທັນທີ, ພ້ອມນີ້ ເພື່ອເປັນການຝຶກສີມືແຮງງານໃນສາຂາ ຊ່າງຖັກວິກຜົມ ເພື່ອສະໜອງແຮງງານໃຫ້ແກ່ ບໍລິສັດ ລາວຄວາລິຕີ ຈຳກັດ, ທັງເປັນການສ້າງວຽກເຮັດງານທຳໃຫ້ແກ່ກຳລັງແຮງງານງານລາວທີ່ຫວ່າງງານ, ໃຫ້ມີລາຍໄດ້ສາມາດກຸ້ມຕົວເອງ ແລະ ຄອບຄົວ.
ຖ້າຫາກນັກຮຽນນັກສຶກສາ ຫຼື ທ່ານໃດທີ່ຍັງບໍ່ມີວຽກເຮັດງານທໍາ ແມ່ນສາມາດມາລົງທະບຽນ ຫຼື ຕິດຕໍ່ພົວພັນກັບ ສະຖາບັນພັດທະນາສີມືແຮງງານລາວ-ເກົາຫຼີ ໄດ້ໃນໂມງລັດຖະການວັນຈັນ-ວັນສຸກ, ສະຖານທີ່ໂຮງຮຽນຕັ້ງຢູ່: ຖະໜົນໂພນຕ້ອງ-ດົກໂດກ, ບ້ານຄໍາຮຸ່ງ, ເມືອງໄຊທານີ, ນະຄອນຫລວງວຽງຈັນ, ໂທ: 020 22145483 ອາຈານ ບຸນຍົງ; 02059561631 ອາຈານສຸກັນ, ສ່ວນເອກກະສານສະໝັກມີ: ໃບຢັ້ງຢືນທີຢູ່ ຫຼື ກອບປີ້ສຳມະໂນຄົວ ຫຼື ບັດປະຈຳຕົວ, ເອົາພຽງ 1 ໃນສາມເທົ່ານັ້ນກໍ່ສາມາດເຂົ້າຮຽນໄດ້ທັນທີ.
ທີ່ມາ: ຂ່າວສານ ແຮງງານ ແລະ ສະຫວັດດີການສັງຄົມ
Hits: 29
