ສື່ມວນຊົນຈໍານວນ 27 ຄົນ ຈາກ 5 ປະເທດກໍາລັງພັດທະນາ ຄື: ລາວ, ອຸສເບກິສຖານ, ລີບັງ, ເອທີໂອປີ ແລະ ອຸລຸກວາຍ ໄດ້ຮັບການເຝິກອົບຮົມໃນຫົວຂໍ້: “ສື່ມວນຊົນສໍາລັບປະເທດກໍາລັງພັດທະນາ ປະຈໍາປີ 2019” ທີ່ກະຊວງ ການຄ້າຈີນ ຮ່ວມກັບກົມວິທະຍຸ ແລະ ໂທລະພາບແຫ່ງຊາດຈີນ ຈັດຂຶ້ນຢູ່ນະຄອນຫລວງປັກກິ່ງລະຫວ່າງວັນທີ 10 ຫາ 30 ພຶດສະພາ 2019.
ເພື່ອແນໃສ່ຍົກລະດັບຄວາມຮູ້ກ່ຽວກັບການລາຍງານຂ່າວໃຫ້ສື່ມວນຊົນໃນປະເທດ ກຳລັງພັດທະນາໃຫ້ດີຂຶ້ນກ່ວາກ່ວາ, ເຮັດໃຫ້ສໍາມະນາກອນໄດ້ຮັບຮູ້, ແລກປ່ຽນບົດຮຽນ ແລະ ປະສົບການກ່ຽວກັບການລາຍງານຂ່າວ ແລະ ອື່ນຯ ກັບຜູ້ຊ່ຽວຊານທີ່ກ່ຽວຂ້ອງຈາກຫລາຍພາກສ່ວນຂອງຈີນ. ນອກຈາກນີ້ ເພື່ອເຮັດໃຫ້ສື່ມວນຊົນຈາກປະເທດກຳລັງພັດທະນາ ໄດ້ມີໂອກາດຮັບຮູ້ ແລະ ເຫັນຕົວຈິງກ່ຽວກັບສະພາບການພັດທະນາເສດຖະ ກິດ-ສັງຄົມຂອງຈີນທີ່ນັບມື້ເຕີບໃຫຍ່ຂະຫຍາຍຕົວຢ່າງຕໍ່ເນື່ອງ.
ໃນຊຸດເຝິກອົບຮົມຄັ້ງນີ້ ນອກຈາກສື່ມວນຊົນ ຈຳນວນ 27 ຄົນ ຈາກ 5 ປະເທດກຳລັງພັດທະນາ ໄດ້ຮັບຟັງການບັນຍາຍ, ແລກປ່ຽນບົດຮຽນ ແລະ ປະສົບການຈາກຜູ້ຊ່ຽວຊານທີ່ກ່ຽວຂ້ອງຂອງຈີນຫລາຍຫົວຂໍ້ ຍັງຈະໄດ້ໄປທັດສະນະສຶກສາເບິ່ງຫລາຍສະຖານທີ່ສໍາຄັນຂອງຈີນ ເປັນຕົ້ນ: ເຂົ້າຮ່ວມເວທີສົນທະນາກ່ຽວກັບອາລິຍະທໍາອາຊີ, ກຳແພງເມືອງຈີນ, ຫໍພິພິດຕະພັນກະສິກໍາຈີນ, ພະລາດຊະວັງເຈົ້າຈັກກະພັດຈີນ, ສະຖານີວິທະຍຸກວາງຊີ, ບໍລິສັດລິເຄືອຂ່າຍວິທະຍຸ ແລະ ໂທລະພາບກວາງຊີ, ໜັງສືພິມກວາງຊີ, ຫໍພິພິດຕະພັນແຫ່ງຊາດກວາງຊີ, ຫໍພິພິຕະພັນແຫ່ງຊາດຈີນ ແລະ ອື່ນຯ.
ທ່ານ ນາງ Liu Ying ຮອງປະທານສະຖາບັນວິໄຈ ແລະ ເຝິກອົບຮົມ, ກົມວິທະຍຸ ແລະ ໂທລະພແຫ່ງຊາດຈີນ ສະແດງຄວາມຫວັງວ່າຊຸດເຝິກອົບຮົມຄັ້ງນີ້ຈະຊ່ວຍຍົກລະດັບຄວາມຮູ້ດ້ານວິຊາການ ກໍ່ຄື ການລາຍງານຂ່າວຂອງສື່ມວນຊົນໃນປະເທດກໍາລັງພັດທະນາທີ່ເຂົ້າຮ່ວມອົບຮົມດີຂຶ້ນກ່ວາເກົ່າ ແລະ ຮັບຮູ້ຈັກກ່ຽວກັບສະພາບການພັດທະນາເສດຖະກິດ-ສັງຄົມຂອງຈີນຫລາຍຂຶ້ນ ເພາະນອກຈາກສື່ມວນຊົນທີ່ເຂົ້າຮ່ວມການເຝິກອົບຮົມໄດ້ຮຽນຮູ້ຈາກຜູ້ຊ່ຽວ ຊານດ້ານຕ່າງຯ ຂອງຈີນແລ້ວ ຍັງມີໂອກາດໄດ້ແລກປ່ຽນບົດຮຽນ ແລະ ປະສົບການດ້ານວິຊາຊີບຮ່ວມກັນຕື່ມອີກ.
ທີ່ມາຂໍ້ມູນ: ມີເດຍລາວ Midia Laos
