ໂຄງການກໍ່ສ້າງເຮືອນພັກພະນັກງານປະຈໍາດ່ານດາກຕະອອກ ເມືອງດາກຈຶງ ແຂວງເຊກອງ ເລີ່ມກໍ່ສ້າງມາເປັນເວລາ 8 ເດືອນ ປະຈຸບັນສໍາເລັດ ແລະກໍໄດ້ຈັດພິທີມອບ-ຮັບໃນວັນທີ 10 ພຶດສະພາ 2019 ໂດຍມີທ່ານ ສີສຸພັນ ມະຫາວົງ ຮອງຫົວໜ້າຫ້ອງວ່າການແຂວງເຊກອງ (ສປປ ລາວ) ແລະທ່ານ ພັນເອກ ຫງວຽນ ຮິວ ຖັງ ຫົວໜ້າກອງບັນຊາການທະຫານຊາຍແດນແຂວງກວາງນາມ (ສສ ຫວຽດນາມ), ພ້ອມດ້ວຍຄະນະຮັບຜິດຊອບໂຄງການ ແລະວິຊາການກ່ຽວຂ້ອງເຂົ້າຮ່ວມ.
ໂຄງການກໍ່ສ້າງເຮືອນພັກພະນັກງານປະຈໍາດ່ານດາກຕະອອກ ແມ່ນໂຄງການໜຶ່ງທີ່ມີຄວາມໝາຍສໍາຄັນນອນໃນແຜນພັດທະນາເສດຖະກິດ-ສັງຄົມຂອງລັດຖະບານ ກໍຄືແຂວງເຊກອງ ໂດຍມີຈຸດປະສົງ ເພື່ອກຽມຄວາມພ້ອມໃຫ້ແກ່ການຍົກລະດັບດ່ານດາກຕະອອກເມືອງດາກຈຶງແຂວງເຊກອງ ສປປ ລາວ-ດ່ານນໍ້າຢາງ ແຂວງກວາງນາມ ສສ ຫວຽດນາມ ຂຶ້ນເປັນດ່ານສາກົນໃນຕໍ່ໜ້າ.
ໂດຍໂຄງການດັ່ງກ່າວ ເປັນອາຄານຊັ້ນດຽວ, ປະກອບມີ 14 ຫ້ອງນອນ, 1 ຫ້ອງອາຫານ, 1 ຫ້ອງຄົວ, 1 ຫ້ອງສາງເຄື່ອງ, ພ້ອມດ້ວຍເຄື່ອງເຟີນີເຈີ້, ລະບົບໄຟຟ້າ ແລະນໍ້າປະປາ, ແບບແຜນຜັງຂອງອາຄານເປັນຮູບແບບຊົງລາວປະຍຸກ, ລວມມູນຄ່າການກໍ່ສ້າງທັງໝົດ 13 ຕື້ກວ່າດົ້ງ (ສະກຸນເງິນຫວຽດນາມ) ໂດຍແມ່ນບໍລິສັດຮຸ້ນສ່ວນລົງທຶນ ແລະກໍ່ສ້າງດ່າຍຮົງຟຸກ (ສສ ຫວຽດນາມ) ເປັນຜູ້ຮັບເໝົາກໍ່ສ້າງ ໂດຍເລີ່ມລົງມືກໍ່ສ້າງມາແຕ່ເດືອນສິງຫາ 2018 ແລະສໍາເລັດໃນເດືອນມີນາ 2019.
ທ່ານ ສີສຸພັນ ມະຫາວົງ ກ່າວວ່າ: ໂຄງການກໍ່ສ້າງເຮືອນພັກພະນັກງານປະຈໍາດ່ານດາກຕະອອກ ແມ່ນໂຄງການໜຶ່ງທີ່ໄດ້ຮັບການສະໜັບສະໜູນທຶນໃນການກໍ່ສ້າງຈາກລັດຖະບານ ກໍຄືກອງບັນຊາການທະຫານຊາຍແດນແຂວງກວາງນາມ (ສສ ຫວຽດນາມ) ໂດຍໃນໄລຍະຜ່ານມາ, ກອງບັນຊາການທະຫານຊາຍແດນແຂວງກວາງນາມ ສສ ຫວຽດນາມ ຍັງໃຫ້ທຶນຊ່ວຍເຫຼືອໃນການກໍ່ສ້າງອາຄານດ່ານ 1 ຫຼັງເປັນອາຄານ 2 ຊັ້ນໃນມູນຄ່າເກືອບ 50 ຕື້ດົ້ງ ຊຶ່ງກໍ່ສ້າງສໍາເລັດໃນເດືອນທັນວາ 2016 ແລະໄດ້ມອບ-ຮັບໃຫ້ອຳນາດການປົກຄອງແຂວງເຊກອງໃນປີ 2017 ຜ່ານມາ.
ທີ່ມາ: Media Laos