ທີ່ນະຄອນຫລວງວຽງຈັນ, ໄດ້ມີພິທີ ເຊັນສັນຍາກູ້ຢືມເງິນ ຈຳນວນ 20 ລ້ານໂດລາສະຫະລັດ ຈາກສະມາຄົມ ເພື່ອການ ພັດທະນາ ສາກົນ (IDA) ເພື່ອປະຕິບັດໂຄງການ ປັບປຸງຄຸ້ມຄອງ ລະບົບການເງິນແຫ່ງລັດ ເປັນທັນ ສະໄໝ (E-FITS) ໂດຍມີ ທ່ານ ນາງ ທິບພະກອນ ຈັນທະວົງສາ ຮອງລັດຖະມົນຕີ ກະຊວງການເງິນ ແລະ ທ່ານ ນິໂກລາ ປອນຕາຣາ ຫົວໜ້າຫ້ອງການ ທະນາຄານໂລກ ປະຈຳ ສປປ ລາວ ເປັນຜູ້ຮ່ວມ ລົງນາມເຊັນສັນຍາ. ໂຄງການດັ່ງກ່າວ, ຈະສ້າງລະບົບຄຸ້ມຄອງ ຂໍ້ມູນຂ່າວສານ ການເງິນ ແລະ ການຝຶກອົບຮົມຄວາມຮູ້ກ່ຽວກັບການຄຸ້ມຄອງການເງິນແຫ່ງລັດແບບໃໝ່ ໃຫ້ແກ່ກະຊວງການເງິນ. ລະບົບໃໝ່ນີ້, ຈະຊ່ວຍປັບປຸງໃຫ້ແກ່ການສະໜອງຂໍ້ມູນການເງິນ ແລະ ການລາຍງານການຈັດຕັ້ງປະຕິບັດແຜນງົບປະມານໄວຂຶ້ນ, ລວມທັງການເຜີຍແຜ່ຂໍ້ມູນທີ່ຈະແຈ້ງ ທາງອອນລາຍຫລາຍຂຶ້ນ.
ທ່ານ ນາງ ທິບພະກອນ ຈັນທະວົງສາ ກ່າວວ່າ: ພິທີເຊັນສັນຍາໃນຄັ້ງນີ້, ຢັ້ງຢືນເຖິງການຮ່ວມມື ລະຫວ່າງລັດຖະບານ ສປປ ລາວ ແລະ ທະນາຄານໂລກ ໃນການສະໜັບ ສະໜູນ ການຈັດຕັ້ງປະຕິບັດ ບູລິມະສິດ ຂອງລັດຖະບານ ທີ່ນອນຢູ່ໃນແຜນ ພັດທະນາ ເສດຖະກິດ-ສັງຄົມແຫ່ງຊາດ. ໂຄງ ການດັ່ງກ່າວ, ແມ່ນປັບປຸງ ແລະ ສ້າງຄວາມເຂັ້ມແຂງ ໃຫ້ແກ່ການຄຸ້ມຄອງ ການເງິນແຫ່ງລັດ, ຊິ່ງຈະຊ່ວຍໃຫ້ມີການຂະຫຍາຍຕົວ ທາງດ້ານເສດຖະກິດ ແບບຍືນຍົງ ແລະ ໝັ້ນຄົງ. ປັດຈຸບັນ ຖືວ່າບັນດາວຽກ ພື້ນຖານ ໄດ້ຖືກວາງໄວ້ແລ້ວ, ຂັ້ນຕອນຕໍ່ໄປ ແມ່ນປັບປຸງປະສິດທິພາບ ແລະ ຄວາມໂປ່ງໃສຂອງ ລະບົບການຄຸ້ມຄອງການເງິນແຫ່ງລັດໃຫ້ດີຂຶ້ນ.
ທ່ານ ນິໂກລາ ປອນຕາຣາ ກ່າວວ່າ: ພວກເຮົາມີຄວາມຍິນດີ ທີ່ຈະສະໜັບສະໜູນ ບັນດາເປົ້າໝາຍການພັດທະນາລະດັບສູງຂອງລັດຖະບານ ເພື່ອສ້າງຄວາມເຂັ້ມແຂງດ້ານການເງິນແຫ່ງລັດ ເພື່ອປະກອບສ່ວນເຂົ້າ ໃນການພັດທະນາເສດຖະກິດທີ່ໝັ້ນຄົງ, ປະສິດທິພາບໃນການຄຸ້ມຄອງລາຍຈ່າຍພາກລັດ ຍັງຖືເປັນບັນຫາ ຍ້ອນຂັ້ນຕອນ ແລະ ລະບົບເກັບກຳຂໍ້ມູນບໍ່ທັນກັບເວລາ, ລະບົບການຄຸ້ມຄອງຂໍ້ມູນຂ່າວສານການເງິນແບບໃໝ່ ຈະຊ່ວຍໃຫ້ລັດຖະບານ ສະໜອງຂໍ້ມູນຄັງເງິນສົດດີຂຶ້ນ, ສະ ໜອງຂໍ້ມູນບັນດາແຫລ່ງເງິນຕ່າງໆ ທີ່ມີໄດ້ທັນເວລາ, ການລາຍງານທັນກັບສະພາບຕົວຈິງ ແລະ ການຈັດຕັ້ງປະຕິບັດງົບປະມານໄວຂຶ້ນ. ລະບົບດັ່ງກ່າວ, ຍັງຊ່ວຍໃຫ້ການຕິດຕາມໜີ້ຄ້າງຈ່າຍ, ຊັບ ພະຍາກອນທາງດ້ານການເງິນ ແລະ ການຂາດດຸນງົບປະມານ ຢ່າງໃກ້ຊິດຂຶ້ນຕື່ມອີກ.
ໂຄງການ E-FITS ຈະໄດ້ຖືກຈັດຕັ້ງປະຕິບັດ ໄປພ້ອມກັນກັບ ໂຄງການ ປະຕິຮູບ ລະບົບຄຸ້ມຄອງ ການເງິນພາກລັດ ທີ່ມີທຶນຊ່ວຍເຫລືອຈາກສະຫະພາບເອີຣົບ ຈຳນວນ 1.5 ລ້ານຢູໂຣ. ໂຄງ ການນີ້, ຈະສ້າງຂີດຄວາມສາມາດໃຫ້ກັບກະຊວງການເງິນ ດ້ານສ່ວຍສາອາກອນ ແລະ ການເກັບລາຍໄດ້, ການສ້າງແຜນງົບປະມານ ແລະ ຂະບວນການຈັດຕັ້ງປະຕິບັດງົບປະມານ, ພ້ອມທັງຊ່ວຍໃນການຈັດຕັ້ງປະຕິບັດກົດໝາຍໃໝ່ ວ່າດ້ວຍການຈັດຊື້-ຈັດຈ້າງດ້ວຍທຶນຂອງລັດ. ໂຄງການດັ່ງກ່າວ, ດຳເນີນຕໍ່ຈາກແຜນງານ.
ທີ່ມາ: ສຳນັກຂ່າວສານປະເທດລາວ