ທີ່ຄະນະວິສະວະກຳສາດ ໂສກປ່າຫລວງ ໄດ້ຈັດງານຕະຫລາດນັດແຮງງານ ຄັ້ງທີ 8 ຂຶ້ນ, ໂດຍການຮ່ວມມື ລະຫວ່າງ ຄະນະວິສະວະກຳສາດ ມະຫາວິທະຍາໄລແຫ່ງຊາດ, ສະພາການຄ້າ ແລະ ອຸດສາຫະກຳແຫ່ງຊາດລາວ ແລະ ສະພາການຄ້າ ແລະ ອຸດສາຫະກຳສະຫະພາບເອີລົບ, ໂດຍມີ ທ່ານ ແກ້ວອຸດົມ ແສນສະຫວັດ ຮອງຄະນະບໍດີຄະນະວິສະວະກຳສາດ ແລະ ທ່ານ ລາມອນ ບຸດສະເລີ ຜູ້ອຳນວຍການ ສະພາການຄ້າ ແລະ ອຸດສາຫະກຳສະຫະພາບເອີລົບ, ພ້ອມດ້ວຍພາກສ່ວນກ່ຽວຂ້ອງ ແລະ ນ້ອງນັກສຶກສາເຂົ້າຮ່ວມເປັນຈຳນວນຫລວງຫລາຍ.
ໃນໂອກາດດັ່ງກ່າວ, ທ່ານ ວັນທອງ ສິດທິກຸນ ຮອງປະທານສະພາການຄ້າ ແລະ ອຸດສາຫະກຳແຫ່ງຊາດລາວ ກ່າວວ່າ: ໃນການຈັດງານຕະຫລາດນັດແຮງງານໃນຄັ້ງນີ້, ຈະຊ່ວຍສ້າງໂອກາດໃຫ້ນັກສຶກສາ ໄດ້ພົບປະກັບຫົວໜ້ວຍທຸລະກິດ ເພື່ອເປັນການແລກປ່ຽນບົດຮຽນ ແລະ ຫົວໜ່ວຍທຸລະກິດ ກໍໄດ້ຊອກຫາເພື່ອນຮ່ວມງານທີ່ຖືກຕ້ອງກັບຄວາມຕ້ອງການ ຂອງການພັດທະນາທຸລະກິດ, ພ້ອມທັງເປັນການສ້າງສາຍພົວພັນທີ່ດີ ລະຫວ່າງບໍລິສັດ ກັບມະຫາວິທະຍາໄລ ແລະ ໂຮງຮຽນ, ທັງເປັນການຊ່ວຍເອື້ອອຳນວຍຄວາມສະດວກໃນການຊອກວຽກເຮັດງານທຳ ແລະ ສ້າງໂອກາດໃຫ້ນັກສຶກສາ ທີ່ກຳລັງຈະຈົບ ຫລາຍກວ່າ 1 ພັນຄົນ ແລະ ນັກສຶກສາກຳລັງຮຽນ ປະມານ 4 ພັນຄົນ.
ພ້ອມນີ້, ພາຍໃນງານດັ່ງກ່າວ ນັກສຶກສາຈາກສະຖາບັນການສຶກສາຕ່າງໆ ຍັງໄດ້ເຂົ້າຮ່ວມຮັບຟັງ ການບັນຍາຍ ຈາກຕົວແທນຂອງບໍລິສັດຕ່າງໆ ແລະ ມີຫລາກຫລາຍຕຳແໜ່ງງານໃນການສະໝັກ ເປັນຕົ້ນແມ່ນ ຂະແໜງບໍ່ແຮ, ໄອທີ, ປະກັນໄພ, ທະນາຄານ, ການໂຮງແຮມ, ກະສິກຳ-ປ່າໄມ້ ແລະ ອື່ນໆ. ພາຍໃນງານ ມີ 31 ບໍລິສັດ ເຂົ້າຮ່ວມ ແລະ ໄດ້ເປີດໂອກາດ ໃຫ້ນ້ອງນັກສຶກສາຕິດຕໍ່ກັບບັນດາຫົວໜ່ວຍທຸລະກິດໂດຍກົງ, ພ້ອມທັງ ສ້າງໂອກາດໃຫ້ນັກສຶກສາ ໄດ້ຮັບປະສົບການຈາກບັນດາບໍລິສັດ ເພື່ອກຽມພ້ອມເຂົ້າສູ່ຕະຫລາດແຮງງານ.
ທີ່ມາ: ໜັງສືພິມປະເທດລາວ
