ມະຫາວິທະຍາໄລ ວິທະຍາສາດ ສຸຂະພາບ ແຫ່ງ ສປປ ລາວ ແລະ ມະຫາວິທະຍາໄລ ລາຊະພັດ ນະຄອນລາດຊະສີມາ ປະເທດໄທ ໄດ້ຈັດກອງປະຊຸມ ວິຊາການ ດ້ານການຄົ້ນຄວ້າ ວິທະຍາສາດ ຄັ້ງທີ 5 ຂຶ້ນໃນວັນທີ 10 ພຶດສະພາ 2019 ພາຍໃຕ້ການເປັນປະທານ ຂອງ ທ່ານ ມາຍຟອງ ມາຍຊາຍ ຮອງອະທິການບໍດີ ມະຫາວິທະຍາໄລ ວິທະຍາສາດ ສຸຂະພາບ, ທ່ານ ອະດິສອນ ເນົາວະດົນ ຜູ້ວ່າການ ອະທິການບໍດີ ມະຫາວິທະຍາໄລ ລາຊະພັດ ນະຄອນລາດຊະສີມາ, ພ້ອມດ້ວຍຄູ-ອາຈານ ແລະ ນັກສຶກສາ ຈາກສອງມະຫາວິທະໄລ ເຂົ້າຮ່ວມ.
ທ່ານ ມາຍຟອງ ມາຍຊາຍ ກ່າວວ່າ: ກອງປະຊຸມຄັ້ງນີ້, ແມ່ນມີຄວາມໝາຍ ຄວາມສຳຄັນຫລາຍ ຕໍ່ 2 ມະຫາວິທະຍາໄລ ເຊິ່ງໃນໄລຍະ 4 ປີ ຜ່ານມາເຫັນວ່າ ການຮ່ວມມືດ້ານຕ່າງໆ ນັບມື້ນັບມີການພົວ ພັນຮ່ວມມືອັນແໜ້ນແຟ້ນ ສະແດງອອກ ໂດຍໄດ້ມີການ ພົບປະການແລກປ່ຽນບົດຮຽນເຊິ່ງກັນ ແລະ ກັນ ທາງດ້ານວິຊາການເປັນປະຈຳ, ຮ່ວມກັນພັດທະນາ ຄວາມຮູ້ດ້ານວິທະຍາສາດ ສຸຂະພາບ ໃຫ້ມີຄວາມທັນສະໄໝ ແລະ ອື່ນໆ ໂດຍມີເປົ້າໝາຍພັດທະນາຊຸກຍູ້ ແລະ ສົ່ງເສີມພະນັກງານໃນຂົງເຂດ ສາທາລະນະສຸກ, ຄູ-ອາຈານ ແລະ ນັກສຶກສາ ທີ່ເຮັດການຄົ້ນຄວ້າວິທະຍາສາດ ໄດ້ເຜີຍແຜ່ຜົນງານຈາກການຄົ້ນ ຄວ້າ ທີ່ເປັນປະໂຫຍດ ແລະ ຖືກຕ້ອງຕາມຫລັກຈັນຍາທຳແພດ ນຳໄປສູ່ການພັດທະນາ ໃນຂົງເຂດ ສາ ທາລະນະສຸກຮ່ວມກັນ.
ທ່ານ ອະດິສອນ ເນົາວະດົນ ກ່າວວ່າ: ມະຫາວິທະຍາໄລ ລາຊະພັດ ນະຄອນລາດຊະສີມາ ຈະສືບຕໍ່ສົ່ງເສີມການພົວພັນຮ່ວມມື ກັບ ມະຫາວິທະຍາໄລ ວິທະຍາສາດ ສຸຂະພາບ ສປປ ລາວ ໂດຍ ການໃຫ້ທຶນນັກສຶກສາໄປຮຽນຕໍ່, ການແລກປ່ຽນນັກສຶກສາຂອງສອງສະຖາບັນ, ການຄົ້ນຄວ້າ ວິທະຍາ ສາດຕ່າງໆ ຮ່ວມກັນຫລາຍຂຶ້ນ ເພື່ອພັດທະນາວຽກງານສຸຂະພາບໃຫ້ດີຂຶ້ນເທື່ອລະກ້າວ, ມີຄວາມທັນສະໄໝ ແລະ ອື່ນໆ.
ໃນໂອກາດດຽວກັນ, ຜູ້ເຂົ້າຮ່ວມກອງປະຊຸມ ຍັງໄດ້ຟັງການເຜີຍແຜ່ ກ່ຽວກັບຜົນກະທົບຈາກການປ່ຽນດິນຟ້າອາກາດ ທີ່ສົ່ງຜົນກະທົບຕໍ່ສຸຂະພາບ ຢູ່ສປປ ລາວ ແລະ ຮັບຟັງການເຜີຍແຜ່ ກ່ຽວກັບປ່ຽນແປງຂອງສະພາບດິນຟ້າອາກາດ ແລະ ສຸຂະພາບ ຢູ່ໃນປະເທດໄທ ຕື່ມອີກ.
ທີ່ມາ: ໜັງສືພິມປະເທດລາວ