ພິທີລົງນາມສັນຍາສະໜອງທຶນຊ່ວຍເຫຼືອ ໂຄງການສະໜັບສະໜູນຂະແໜງການ ແກ້ໄຂບັນຫາລະເບີດບໍ່ທັນແຕກ ທີ່ຕົກຄ້າງຢູ່ ສປປ ລາວ ໄລຍະປີ 2019-2022 ມູນຄ່າ 5,5 ລ້ານໂດລາສະຫະລັດ ຫຼື ປະມານ 47,75 ຕື້ກີບ ຈັດຂຶ້ນວັນທີ 14 ພຶດສະພາ 2019 ຢູ່ນະຄອນຫຼວງວຽງຈັນ ລະຫວ່າງທ່ານ ບຸນເພັງ ສີສະຫວັດ ຮັກສາການຫົວໜ້າຫ້ອງການ ຄະນະກຳມະການຄຸ້ມຄອງແຫ່ງຊາດ ເພື່ອແກ້ໄຂບັນຫາລະເບີດບໍ່ທັນແຕກທີ່ຕົກຄ້າງຢູ່ ສປປ ລາວ (ຄຊກລ) ທ່ານ ໂອ ຊູງຊູ ຜູ້ຕາງໜ້າອົງການຮ່ວມມືສາກົນ ສ ເກົາຫຼີ (KOICA) ປະຈຳລາວ ແລະ ທ່ານນາງ ຣິຄາດາ ຣິເອເຈີ ຜູ້ຕາງໜ້າອົງການສະຫະປະຊາຊາດເພື່ອການພັດທະນາ (UNDP) ປະຈຳ ສປປ ລາວ ມີທ່ານນາງ ໃບຄຳ ຂັດຕິຍະ ຮອງລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ທ່ານນາງ Lee Mi Kyung ປະທານອົງການ KOICA ແລະ ພາກສ່ວນກ່ຽວຂ້ອງເຂົ້າຮ່ວມ.
ທ່ານນາງ Lee Mi Kyung ກ່າວວ່າ: ໃນປີຜ່ານມາ “ລັດຖະບານ ສ ເກົາຫຼີ ໄດ້ມີເປົ້າໝາຍປະກອບສ່ວນຕໍ່ການພັດທະນາ ຂອງບັນດາປະເທດທີ່ເປັນຄູ່ຮ່ວມມືກັບ KOICA ໂດຍສຸມໃສ່ຍຸດທະສາດ 3P (ຄົນ ສັນຕິພາບ ຄວາມຈະເລີນຜາສຸກ) KOICA ຫວັງທີ່ຈະປະກອບສ່ວນຕໍ່ການສ້າງສັນຕິພາບຢູ່ ສປປ ລາວ ແລະ ຍົກລະດັບຄຸນນະພາບຊີວິດຂອງຜູ້ຖືກເຄາະຮ້າຍຈາກລະເບີດບໍ່ທັນແຕກ ແລະ ບັນລຸເປົ້າໝາຍຊີວິດທີ່ປອດໄພຈາກລະເບີດບໍ່ທັນແຕກ ເຊິ່ງເປັນເປົ້າໝາຍການພັດທະນາແບບຍືນຍົງແຫ່ງຊາດຂອງລາວ (ເປົ້າໝາຍທີ 18).
ພາຍໃຕ້ສັນຍາດັ່ງກ່າວ KOICA ຈະສະໜອງທຶນ 3 ລ້ານໂດລາສະຫະລັດ ຈັດຕັ້ງປະຕິບັດໂດຍການຮ່ວມມືກັບ UNDP ແລະ 2,5 ລ້ານໂດລາສະຫະລັດ ຈະຈັດຕັ້ງປະຕິບັດການຮ່ວມມືແບບສອງຝ່າຍ ເພື່ອນຳໃຊ້ໃນການຊ່ວຍເຫຼືອຜູ້ຖືກເຄາະຮ້າຍຈາກລະເບີດບໍ່ທັນແຕກທີ່ຕົກຄ້າງຢູ່ລາວ ເຊິ່ງເປັນການສະໜອງທຶນໄລຍະທີ 2 ທີ່ KOICA ໄດ້ສະໜອງໃຫ້ຂະແໜງການແກ້ໄຂບັນຫາລະເບີດ ເຊິ່ງມີເປົ້າໝາຍເພື່ອສືບຕໍ່ວຽກຈາກໄລຍະທຳອິດທີ່ໄດ້ຈັດຕັ້ງປະຕິບັດແຕ່ປີ 2015-2018 ເພື່ອສະໜັບສະໜູນໃຫ້ ຄຊກລ ປະຕິບັດພາລະກິດຂອງຕົນໃນການປະສານງານ ກ່ຽວກັບວຽກການຄຸ້ມຄອງຂະແໜງການລະເບີດບໍ່ທັນແຕກໃນລາວ ພ້ອມນີ້ KOICA ຍັງຈະສືບຕໍ່ສະໜັບສະໜູນດ້ານການເຝິກອົບຮົມ ພ້ອມທັງອຸປະກອນທີ່ຈຳເປັນ ແລະ ສະໜອງທຶນສຳລັບການປະຕິບັດງານ ໃຫ້ກອງກວດກູ້ລະເບີດບໍ່ທັນແຕກເພື່ອມະນຸດສະທຳຂອງກອງທັບ ເພື່ອປະຕິບັດງານຢູ່ແຂວງບໍລິຄຳໄຊ ເຊິ່ງເປັນພື້ນທີ່ ທີ່ຍັງບໍ່ທັນມີອົງການເກັບກູ້ລະເບີດເພື່ອມະນຸດສະທຳ ຈັດຕັ້ງປະຕິບັດຢູ່.
ທ່ານນາງ ຣິຄາດາ ຣິເອເກີ ກ່າວວ່າ: ລະເບີດບໍ່ທັນແຕກທີ່ຕົກຄ້າງ ເປັນອຸປະສັກຕໍ່ການຫຼຸດຜ່ອນຄວາມທຸກຍາກ ແລະ ການຫຼຸດພົ້ນອອກຈາກປະເທດດ້ອຍພັດທະນາ UNDP ໄດ້ຮ່ວມມືກັບລັດຖະບານໃນການແກ້ໄຂບັນຫາລະເບີດບໍ່ທັນແຕກທີ່ຕົກຄ້າງຢູ່ ສປປ ລາວ ເປັນເວລາຫຼາຍປີ ພວກເຮົາດີໃຈທີ່ໄດ້ສືບຕໍ່ເຮັດວຽກຮ່ວມກັບ KOICA ເພື່ອຮັບປະກັນວ່າການສະໜອງທຶນ ແລະ ຄວາມພະຍາຍາມຕ່າງໆ ຈະສາມາດບັນລຸຄາດໝາຍຂອງເປົ້າໝາຍການພັດທະນາແບບຍືນຍົງ ລຳດັບທີ 18 ໃຫ້ຫຼາຍທີ່ສຸດ ໄລຍະຜ່ານມາ KOICA ແລະ UNDP ໄດ້ເຮັດວຽກພັດທະນາຊົນນະບົດຮ່ວມກັນຢູ່ແຂວງສາລະວັນ ແລະ ສ ເກົາຫຼີ ໄດ້ສະໜອງບັນດາຊ່ຽວຊານໃຫ້ UNDP ເພື່ອການພັດທະນາ ໂດຍຜ່ານຊ່ອງທາງຕ່າງໆ ລວມທັງພະນັກງານກ່ຽວກັບແຜນງານການຮ່ວມມືຫຼາຍຝ່າຍຂອງ KOICA ແລະ ແຜນງານອາສາສະໝັກຂອງ UNDP ເພື່ອຮ່ວມມືໃນການພັດທະນາວຽກງານແຕ່ລະດ້ານໃຫ້ມີຜົນສຳເລັດອີກດ້ວຍ.
ທີ່ມາ: ໜັງສືພິມວຽງຈັນໃໝ່