ກອງປະຊຸມລັດຖະບານປະຈໍາເດືອນພຶດສະພາ 2019 ໄດ້ຈັດຂຶ້ນໃນທ້າຍອາທິດຜ່ານມານີ້, ທ່ານນາຍົກລັດຖະ ມົນຕີ ທອງລຸນ ສີສຸລິດ ໄດ້ເນັ້ນຫລາຍບັນຫາໃຫ້ສະມາຊິກລັດຖະບານເພີ່ມທະວີຄວາມເອົາໃຈໃສ່ໃນຕໍ່ໜ້າຄື:
ສືບຕໍ່ເພີ່ມທະວີການຮັກສາຄວາມສະຫງົບເປັນລະບຽບຮຽບຮ້ອຍ ແລະ ແກ້ໄຂປະກົດການຫຍໍ້ທໍ້ຕ່າງໆໃນສັງ ຄົມ, ໂດຍສະເພາະບັນຫາອຸປະຕິເຫດບົນທ້ອງຖະໜົນ, ການຄ້າຂາຍຢາເສບຕິດ, ການປຸ້ນຈີ້-ຊິງຊັບ, ແກ້ງກວນເມືອງ, ອັກຄີໄພ, ການຄ້າຂາຍເຖື່ອນ ແລະ ສະພາບການບິດເບືອນຄວາມຈິງຂອງສື່ອອນລາຍຕ່າງໆ.
ເອົາໃຈໃສ່ວຽກງານພັດທະນາຊົນນະບົດ, ແກ້ໄຂບັນຫາຄວາມຫຍຸ້ງຍາກຂອງການລົງທຶນ, ຄັງສໍາຮອງເງິນຕາ, ການປັບປຸງລັດວິສາຫະກິດໄຟຟ້າ, ການບິນລາວ, ການອອກໃບຕາດິນທີ່ມີຄວາມສັບສົນ ແລະ ກວດກາຄືນການແກ້ໄຂຄະດີຕາມຂະບວນຍຸຕິທໍາ.
ສືບຕໍ່ເພີ່ມທະວີການຮ່ວມມືທາງດ້ານການຄ້າ-ການຜະລິດກະສິກໍາເພື່ອສົ່ງອອກ, ເອົາໃຈໃສ່ຊຸກຍູ້ການຜະລິດລະ ດູຝົນໃຫ້ທ່ວງທັນຕາມລະດູການ, ສືບຕໍ່ປັບປຸງບັນຊີໄມ້ ແລະ ຜະລິດຕະພັນໄມ້ທີ່ເຫັນສົມຄວນສົ່ງອອກ ເພື່ຶອປົດລ໋ອກທຸລະກິດໄມ້ໃຫ້ສາມາດເຄື່ອນໄຫວມີປະສິດທິຜົນທາງດ້ານເສດຖະກິດ ເພື່ອສ້າງລາຍຮັບເຂົ້າງົບປະ ມານຕາມລະບຽບກົດໝາຍກໍານົດ.
ສືບຕໍ່ເອົາໃຈໃສ່ກວດກາການນໍາເຂົ້າສິນຄ້າອຸປະໂພກ-ບໍລິໂພກ, ອາຫານທະເລນໍາເຂົ້າຈາກຕ່າງປະເທດ ເພື່ອສະກັດກັ້ນອາຫານທີ່ມີສານເຄມີປົນເປື້ອນ, ພ້ອມທັງກວດກາດ້ານສຸຂະອານາໄມຢູ່ບັນດາໂຮງງານຂ້າສັດ ແລະ ຕະ ຫລາດຕ່າງໆ, ກວດກາຄຸ້ມຄອງລາຄາສິນຄ້າ ແລະ ການບໍລິການໃຫ້ມີຄວາມເໝາະສົມ ເພື່ອບໍ່ໃຫ້ກະທົບຕໍ່ການດໍາລົງຊີວິດຂອງປະຊາຊົນ, ສືບຕໍ່ປັບປຸງພື້ນຖານໂຄງລ່າງ ແລະ ອໍານວຍຄວາມສະດວກການບໍລິການຕ່າງໆໃຫ້ມີມາດຕະຖານ ແລະ ຄຸນນະພາບ ເພື່ອສົ່ງເສີມການທ່ອງທ່ຽວລາວໃຫ້ມີບັນຍາກາດຟົດຟື້ນ ແລະ ດຶງດູດນັກທ່ອງ ທ່ຽວໃຫ້ເພີ່ນຂຶ້ນ.
ພ້ອມນີ້, ກໍໃຫ້ເພີ່ມທະວີເອົາໃຈໃສ່ການກະກຽມດໍາເນີນການສອບເສັງຈົບຊັ້ນປະຈໍາປີ 2019 ຂອງນັກຮຽນ-ນັກສຶກສາ ໃຫ້ຖືກຕ້ອງ, ໂປ່ງໃສ ແລະ ຮັບປະກັນຄຸນນະພາບ. ສືບຕໍ່ປັບປຸງການບໍລິການຂອງໂຮງໝໍ, ສຸກສາລາ ໃຫ້ດີຂຶ້ນ, ໄປຄຽງຄູ່ກັບການເອົາໃຈໃສ່ວຽກງານປ້ອງກັນພະຍາດຕ່າງໆ ເປັນຕົ້ນແມ່ນໄຂ້ຍຸງ, ໄຂ້ຫວັດ ແລະ ພະຍາດສັດອື່ນໆ ທີ່ອາດເກີດຂຶ້ນໃນລະດູຝົນ.
ນອກນີ້, ກໍໃຫ້ສືບຕໍ່ຕິດຕາມເຝົ້າລະວັງການປ່ຽນແປງຂອງສະພາບດິນຟ້າອາກາດຢ່າງໃກ້ຊິດ, ພ້ອມທັງມີການແຈ້ງເຕືອນ, ແນະນໍາວິທີປ້ອງກັນ ແລະ ມາດຕະການແກ້ໄຂໃຫ້ສັງຄົມຢ່າງທັນການ.
ແຫຼ່ງຂໍ້ມູນ: ໜັງສືພິມລາວພັດທະນາ
