ປະເທດພວກເຮົາພວມຈະກາຍເປັນ LandLink -ປະເທດເຊື່ອມຈອດ ພາກພື້ນສົມຄວາມມຸ່ງມາດປາຖະໜາແລ້ວ ,ໂຄງການທາງລົດໄຟຈັດຕັ້ງປະຕິບັດຄືບໜ້າ ພ້ອມດຽວກັນໂຄງການທາງດ່ວນຂະໜານຢ່າງສວຍງາມກັບທາງລົດໄຟນັ້ນ ກໍ່ພວມເປັນຮູບເປັນຮ່າງແລ້ວ.
ໂຄງການທາງດ່ວນ ດັ່ງກ່າວ, ໄລຍະທຳອິດແມ່ນ ແຕ່ນະຄອນຫລວງວຽງຈັນ ຫາ ເມືອງວັງວຽງ ແຂວງ ວຽງຈັນ (ແມ່ນໄດ້ເລີ່ມຈັດຕັ້ງປະຕິບັດແລ້ວ), ສ່ວນໄລຍະທີ່ຍັງເຫລືອ ຈາກເມືອງວັງວຽງ ຫາ ນະຄອນຫລວງພະບາງ-ແຂວງອຸດົມໄຊ ແລະ ດ່ານສາກົນ ບໍ່ເຕ່ນ ແຂວງ ຫລວງນ້ຳທາ ເຊື່ອມຕໍ່ ບໍ່ຫານ ສປ ຈີນ ແມ່ນຈະໄດ້ຈັດຕັ້ງປະຕິ ບັດການສຶກສາສຳຫລວດຄວາມເປັນໄປໄດ້ ຕາມກອບເວລາທີ່ໄດ້ຕົກລົງກັນ ບົນພື້ນຖານກົດໝາຍທີ່ກ່ຽວຂ້ອງຂອງ ສປປ ລາວ, ເຊິ່ງຕ່າງຝ່າຍຕ່າງມີຜົນປະໂຫຍດ.
ໂຄງການທາງດ່ວນສາຍນີ້, ຖືເປັນຜົນຂອງການປະສານກັນ ລະຫວ່າງ ການລິເລີ່ມໝຶ່ງແລວ ໝຶ່ງເສັ້ນທາງ ແລະ ຍຸດທະສາດລະດັບຊາດ ຫັນປ່ຽນຈາກປະເທດ ບໍ່ມີທາງອອກສູ່ທະເລ ໃຫ້ກາຍເປັນປະເທດມີເສັ້ນທາງເຊື່ອມຕໍ່ຂອງລາວ, ໂດຍການເຊັນສັນຍາຮ່ວມທຶນໂຄງການ ແມ່ນພາຍໃຕ້ການເປັນສັກຂີພິຍານ ຂອງ ທ່ານ ບຸນຍັງ ວໍລະຈິດ ເລຂາທິການໃຫຍ່, ປະທານປະເທດ ແຫ່ງ ສປປ ລາວ ແລະ ທ່ານ ສີ ຈິ້ນ ຜິງ ເລຂາທິການໃຫຍ່ ປະທານປະທດແຫ່ງ ສປ ຈີນ.
ເຊິ່ງໄດ້ບັນທຶກໃສ່ຖະແຫລງການຮ່ວມ ລາວ-ຈີນມາແລ້ວ ຊຶ່ງກາຍເປັນສ່ວນໜຶ່ງ ຂອງແຜນປະຊາຄົມຮ່ວມຊະຕາກຳ ລາວ-ຈີນ ແລະ ເປັນໂຄງການກໍ່ສ້າງເສັ້ນທາງທີ່ໃຫຍ່ທີ່ສຸດ ຂອງການຮ່ວມມື ລະຫວ່າງ ລາວ-ຈີນ ໃນປັດຈຸບັນອີກດ້ວຍ.
ແຫຼ່ງຂໍ້ມູນ: Aero Laos