ໂຄງການຕິດຕັ້ງໝໍ້ນັບໄຟທັນສະໄໝ ສະມາດ ມິເຕີ, ຢູ່ນະຄອນຫລວງວຽງຈັນໄດ້ລົງມືແລ້ວ, ຊຶ່ງປັດຈຸບັນຝ່າຍປະຕິບັດການໄຟຟ້ານະຄອນຫລວງ ພວມເລັ່ງຕິດຕັ້ງຢູ່ໃນ 4 ຕົວເມືອງຄື:
ເມືອງຈັນທະບູລີ, ໄຊເສດຖາ, ສີສັດຕະນາກ ແລະ ສີໂຄດຕະບອງ
ຄາດວ່າຈະໃຫ້ສໍາເລັດພາຍໃນປີນີ້, ເພື່ອການຈົດນັບໄຟໄດ້ຢ່າງອັດຕະໂນມັດ ແລະ ເຮັດໃຫ້ຝ່າຍຜູ້ສະໜອງ ແລະ ຜູ້ຊົມໃຊ້ໄຟຟ້າໄດ້ຮັບຄວາມຍຸຕິທໍາ.
ທ່ານ ເຄນ ເທບວົງສາ ຜູ້ຊ່ວຍຜູ້ອໍານວຍການໃຫຍ່ ລັດວິສາຫະກິດໄຟຟ້າລາວ ຫົວໜ້າຝ່າຍປະຕິບັດການໄຟຟ້ານະຄອນຫລວງ ໃຫ້ຮູ້ວ່າ:
ໂຄງການຕິດຕັ້ງໝໍ້ນັບໄຟທັນສະໄໝໃຫ້ປະຊາຊົນ ໃນ 4 ຕົວເມືອງຈະມີປະມານ 50.000 ໜ່ວຍ, ທີ່ເປັນໝໍ້ນັບໄຟດິຈີຕອນ ເພື່ອປ່ຽນແທນໝໍ້ນັບໄຟອານາລອກ 130.000 ກວ່າໜ່ວຍ.
ໂຄງການນີ້ໄດ້ຈັດຕັ້ງປະຕິບັດຢູ່ເມືອງຈັນທະບູລີກ່ອນໝູ່ໂດຍກໍານົດເອົາບ້ານໜອງສ້າງທໍ່ ແລະ ບ້ານອານຸ. ຈາກນັ້ນ, ກໍຈະສືບຕໍ່ຂະຫຍາຍໄປຍັງບ້ານອື່ນໆໃນ 4 ເມືອງໃຫ້ສໍາເລັດໃນທ້າຍປີ 2019 ຫລື ຕົ້ນປີ 2020 ໂດຍໄຟ ຟ້າລາວໄດ້ກໍານົດເອົານະຄອນຫລວງວຽງຈັນເປັນຕົວແບບ ແລ້ວຈຶ່ງຈະຂະຫຍາຍໄປເຂດແຂວງອື່ນໆ.
ສໍາລັບໝໍ້ນັບໄຟດິຈີຕອນແມ່ນຈະບໍ່ມີຄົນຈົດ, ບໍ່ສາມາດໄປສ້ອມແປງ ຫລື ງັດແງະ ຖ້າໄປແຕະຕ້ອງ ມັນກໍຈະຟ້ອງຂຶ້ນທັນທີຢູ່ສູນກາງ ເພາະມັນໃຊ້ລະບົບສາຍໄຍແກ້ວຄວບຄຸມ ແລະ ກໍລະນີຜູ້ໃຊ້ໄຟຫາກໃຊ້ເກີນມັນຈະຕັດແບບອັດຕະໂນມັດ ຍ້ອນລະບົບນີ້ໄດ້ປ້ອນຂໍ້ມູນຕົວເລກເຂົ້າການຊົມໃຊ້ຢູ່ໃນຂະຫນາດ 5/60 ອໍາແປ ແລະ ການຕັດຄັ້ງທໍາອິດເປັນການເຕືອນປະມານ 20-25 ນາທີ ຈຶ່ງກັບມາໃຊ້ໄດ້ປົກກະຕິ.
ເພື່ອໃຫ້ຜູ້ໃຊ້ໄຟຫລຸດການຊົມໃຊ້ໄຟລົງ ແຕ່ຖ້າຍັງບໍ່ປະຕິບັດຕາມການເຕືອນ ຂອງມັນແລ້ວ, ມັນກໍ່ຈະຕັດໄຟໄປເລີຍຖືວ່າໝໍ້ນັບໄຟແບບທັນສະໄໝນີ້ຈະເຮັດໃຫ້ຜູ້ຊົມໃຊ້ບໍ່ສາມາດຕົວະໄດ້ວ່າຕົນເອງໃຊ້ໄຟໜ້ອຍ ຫຼຼືຫລາຍຢ່າງໃດ.
ພ້ອມທັງສາມາດກວດກາການຊົມໃຊ້ໄດ້ທຸກຊົ່ວໂມງ ໂດຍເບິ່ງຜ່ານອິນເຕີເນັດທາງໂທລະສັບມືຖືໄດ້ ແລະ ສາມາດຮູ້ໄດ້ການໃຊ້ໄຟຟ້າແຕ່ລະວັນ ໂດຍສະເພາະໃນເວລາທີ່ຕົນເອງບໍ່ຢູ່ ກໍສາມາດເບິ່ງໄດ້ວ່າຜູ້ທີ່ຢູ່ເຮືອນໃຊ້ໄຟແບບໃດ.
ແຫຼ່ງຂໍ້ມູນ: ໜັງສືພິມລາວພັດທະນາ