ເພື່ອເປັນການເປີດໂອກາດໃຫ້ແກ່ນັກວິສະວະກອນ ແລະນັກວິທະຍາສາດໜຸ່ມທີ່ມີຄວາມຮູ້-ຄວາມສາມາດ ທາງດ້ານວິທະຍາສາດ ທີ່ກຳລັງສຶກສາຢູ່ໃນມະຫາວິທະຍາໄລແຫ່ງຊາດເວົ້າລວມ; ເວົ້າສະເພາະແມ່ນ ນັກສຶກສາ ຄະ ນະວິສະວະກຳສາດ, ຄະນະວິທະຍາສາດທຳມະຊາດ ແລະຄະນະຊັບພະຍາກອນນໍ້າ ໄດ້ເຂົ້າຮ່ວມການແຂ່ງຂັນເພື່ອຊີງທຶນການສຶກສາ ຈາກມູນນິທິລາງວັນຮອນດາ.
ທີ່ສະຖາບັນພັດທະນາຊັບພະຍາກອນມະນຸດລາວ-ຢີ່ປຸ່ນ ໄດ້ຈັດປະຖົມນິເທດລາງວັນຮອນດາ ສຳລັບນັກວິທະ ຍາສາດ ແລະນັກວິທະຍາສາດໜຸ່ມ ໃຫ້ແກ່ນັກສຶກສາ 3 ຄະນະວິຊາ( ຄະນະວິສະວະກໍາສາດ, ຄະນະຊັບພະຍາ ກອນນໍ້າ ແລະຄະນະວິທະຍາສາດທໍາມະຊາດ) ເພື່ອສະໝັກເຂົ້າຮ່ວມແຂ່ງຂັນຊີງລາງວັນຮອນດາ Y-E-S Award ປະຈຳປີ 2019, ໂດຍການນໍາສະເໜີໂດຍ ທ່ານ ຮສ. ປອ. ບຸນລ້ວນ ດວ້ງເງິນ ຜູ້ອຳນວຍການສະຖາ ບັນພັດທະນາຊັບພະຍາກອນມະນຸດລາວ-ຍີ່ປຸ່ນ, ພາຍໃນແຕ່ລະຄະນະວິຊາ ມີບັນດາຫົວໜ້າພາກວິຊາ, ບັນດາຄະນະກໍາມະການຮັບຜິດຊອບໂຄງການລາງວັນຮອນດາ, ພະນັກງານ, ຄູ-ອາຈານ ແລະນັກສຶກສາເຂົ້າຮ່ວມຮັບຟັງ.
ໃນທີ່ປະຊຸມ, ທ່ານ ຮສ. ປອ. ບຸນລ້ວນ ດວ້ງເງິນ ນໍາສະເໜີໃຫ້ຮູ້ກ່ຽວກັບທຶນການສຶກສາ ຈາກມູນນິທິຮອນດາ ທ່ານໃຫ້ຮູ້ວ່າ:
ລາງວັນຮອນດາ Y-E-S Award ແມ່ນທຶນການສຶກສາ ຈາກມູນນິທິນຮອນດາ ປະເທດຍີ່ປຸ່ນ ເຊິ່ງປະທານຂອງທຶນການສຶກສາດັ່ງກ່າວແມ່ນ ທ່ານ ຮິໂຣະໂຕະ ອິຊິດະ (Hiroto Ishida), ເຊິ່ງເປັນທຶນການສຶກສາໃຫ້ແກ່ນັກສຶກສາຜູ້ທີ່ມີຄວາມຮູ້ ຄວາມສາມາດ ທັງນີ້ກໍເພື່ອແນໃສ່ສົ່ງເສີມ ແລະສ້າງໃຫ້ນັກສຶກສາກາຍເປັນຜູ້ນໍາທາງດ້ານວິທະຍາສາດເຕັກໂນໂລຊີໃຫ້ມີຄວາມກ້າວໜ້າ.
ນອກນັ້ນ ທ່ານໄດ້ແນະນໍາເຖິງວິທີການສະໝັກທຶນ, ການຄັດເລືອກ ແລະຄວາມສໍາຄັນຂອງທຶນການສຶກສາ ຈາກມູນນິທິຮອນດາ, ໂດຍເປີດຮັບສະໝັກນັກສຶກສາປີລະຄັ້ງ ແລະເປັນນັກສຶກສາທີ່ກໍາລັງສຶກສາມະຫາວິທະ ຍາໄລແຫ່ງຊາດ ຢູ່ໃນປີ 3,4 ຂອງຄະນະວິສະວະກຳສາດ, ຄະນະວິທະຍາສາດທຳມະຊາດ ແລະຄະນະຊັບພະຍາ ກອນນໍ້າເທົ່ານັ້ນ, ເຊິ່ງການສະໝັກແມ່ນເລີ່ມແຕ່ ວັນທີ 31 ພຶດສະພາ ໄປຈົນເຖິງ 20 ມິຖຸນາ 2019.
ຫຼັງຈາກນັ້ນ ທາງຄະນະກໍາມະການຂອງໂຄງການລາງວັນຮອນດາ ຈະຄັດເລືອກເອົາພຽງ 35 ຄົນ ເຂົ້າຮ່ວມການສອບເສັງພາກຂຽນພາສາລາວ ແລະພາສາອັງກິດ, ຈາກນັ້ນຄັດໃຫ້ເຫຼືອພຽງ 15 ຄົນສຸດທ້າຍ ເຂົ້າຮອບການສຳ ພາດ ແລະສໍາພາດເປັນພາສາອັງກິດ ສຸດທ້າຍຄັດເອົາ ນັກສຶກສາພຽງ 2 ຄົນເທົ່ານັ້ນ ເປັນຜູ້ຊະນະ.
ນັກສຶກສາຜູ້ຊະນະ ຈະໄດ້ຮັບທຶນການສຶກສາຈຳນວນ 3.000 ໂດລາສະຫະລັດ ຫຼືປະມານ 24.000.000(ຊາວສີ່ລ້ານກີບ) ພ້ອມທັງໄດ້ຮັບສິດທິໃນການເລືອກສຶກສາຕໍ່ໃນລະດັບ ປະລິນຍາໂທ ຫຼື ປະລິນຍາເອກ ທີ່ປະເທດຍີ່ປຸ່ນ ໂດຍການໃຫ້ທຶນຂອງມູນນິທິຮອນດາ.
ຂະນະດຽວກັນ, ນັກສຶກສາທີ່ເຂົ້າຮ່ວມຍັງໄດ້ຮັບຟັງການເລົ່າປະສົບການ ແລະເທັກນິກການເຂົ້າຮ່ວມແຂ່ງຂັນ ຈາກນັກສຶກສາທີ່ໄດ້ຮັບລາງວັນຮອນດາໃນປີຜ່ານມາ ທັງນີ້ກໍເພື່ອເປັນແນວທາງ ແລະແຮງຈູງໃຈແກ່ນັກສຶກສາອີກດ້ວຍ.
ແຫຼ່ງຂໍ້ມູນ: National University of Laos