ທີ່ຫ້ອງການກະສິກຳ ແລະ ປ່າໄມ້ ເມືອງຊ່ອນ ສົບທົບກັບຄະນະຄຸ້ມຄອງໂຄງການໄພພິບັດຂັ້ນເມືອງ ລົງກວດກາຕິດຕາມຄວາມຄືບໜ້າ ຂອງການກໍ່ສ້າງ-ສ້ອມແປງຊົນລະປະທານຈຳນວນ 7 ໂຄງການ.
ເຊິ່ງນຳໂດຍທ່ານ ຄຳພຽນ ໄຊສົມພັນ ຮອງເຈົ້າເມືອງໆຊ່ອນ ຜູ້ຊີ້ນຳວຽກງານຂົງເຂດເສດຖະກິດມີຄະນະຄຸ້ມຄອງໂຄງການໄພພິບັດຂັ້ນເມືອງເຂົ້າຮ່ວມນຳ.
7 ໂຄງການ ທີ່ຄະນະຄຸ້ມຄອງໂຄງການໄພພິບັດຂັ້ນເມືອງ ລົງກວດກາໃນຄັ້ງນີ້ມີ:
ໂຄງການກໍ່ສ້າງ-ສ້ອມແປງຊົນລະປະທານນ້ຳແອດ ບ້ານແລ້ງ ເຊິ່ງແມ່ນ ບໍລິສັດວຽງທອງ ກໍ່ສ້າງຈຳກັດຜູ້ດຽວເປັນຜູ້ຮັບເໝົາກໍ່ສ້າງ. ໂຄງການກໍ່ສ້າງ-ສ້ອມແປງຊົນລະປະທານນ້ຳຫ້ວຍເຢັນ ບ້ານວັດ, ຊົນລະປະທານນ້ຳມູ້ ບ້ານບົງ ແລະ ຊົນລະປະທານນ້ຳເປີ້ ບ້ານນາກຽນ ທັງ 3 ໂຄງການນີ້ແມ່ນ ບໍລິສັດສີມະນີກໍ່ສ້າງ ເປັນຜູ້ຮັບເໝົາກໍ່ສ້າງ.
ໂຄງການກໍ່ສ້າງ-ສ້ອມແປງຊົນລະປະທານນ້ຳຈັກ ບ້ານນາຈັກ, ຊົນລະປະທານນ້ຳງາວ ບ້ານຊ່ອນເໝືອ, ຊົນລະ ປະທານນ້ຳກົ້ວ ບ້ານມັ້ນ ທັງ 3 ໂຄງການນີ້ແມ່ນ ບໍລິສັດທີເຮົ້າກໍ່ສ້າງເປັນຜູ້ຮັບເໝົາກໍ່ສ້າງ.
ທັງ 7 ໂຄງການດັ່ງກ່າວແມ່ນໄດ້ເລີ່ມຈັດຕັ້ງປະຕິບັດແຕ່ຕົ້ນເດືອນ ພຶດສະພາ 2019 ທີຜ່ານມາປັດຈຸບັນເຫັນວ່າສຳເລັດແລ້ວ 100% ແຕ່ຕ້ອງໄດ້ກວດກາທາງດ້ານເຕັກນິກຕື່ມອີກ.
ແຫຼ່ງຂໍ້ມູນ: Media laos
Hits: 2
