ຢູ່ທີ່ຂົວເຊທ່າມວກ ເມືອງພີນໄດ້ຈັດພິທີ ມອບ-ຮັບ ແລະ ເປີດການນຳໃຊ້ຂົວເຊກຸມກາມ ແລະ ຂົວເຊທ່າມວກ ຢ່າງເປັນທາງການ ໂດຍການໃຫ້ກຽດເຂົ້າຮ່ວມຂອງທ່ານ ສະເຫຼີມໄຊ ກົມມະສິດ ລັດຖະມົນຕີກະຊວງການຕ່າງປະເທດ, ທ່ານ ສຸພັນ ແກ້ວມີໄຊ ລັດຖະມົນຕີກະຊວງແຜນການ ແລະ ການລົງທຶນ, ທ່ານ ນາງ ໂຕຊະໂກະ ອາເບະ ຮອງລັດຖະມົນຕີກະຊວງຕ່າງປະເທດ ຍີ່ປຸ່ນ, ແລະ ທ່ານ ໂພໄຊ ໄຊຍະສອນ ຮອງເຈົ້າແຂວງສະຫວັນນະເຂດ ພ້ອມມີບັນດາຕາງໜ້າກະຊວງ , ຄະນະກົມ-ພະແນກການ, ພາກສ່ວນຕ່າງໆທີ່ກ່ຽວຂ້ອງທັງສອງປະເທດ ລາວ-ຍີ່ປຸ່ນເຂົ້າຮ່ວມ.
ໃນພິທີ ທ່ານ ວັນທອງ ບຸດຕະນະວົງ ຮອງຫົວໜ້າກົມຂົວທາງກະຊວງໂຍທາທິການ ແລະ ຂົນສົ່ງ ກໍ່ໄດ້ລາຍງານກ່ຽວກັບຄວາມເປັນມາຂອງໂຄງການວ່າ:
ໃນປີ 2016 ລັດຖະບານແຫ່ງປະເທດຢີ່ປຸ່ນ,ໄດ້ຕົກລົງສະຫນັບສະໜູນໃນການຊ່ວຍເຫຼືອລ້າແກ່ ສປປ ລາວເພື່ອກໍ່ສ້າງຂົວ 2 ແຫ່ງ ຄືຂົວເຊກຸມກາມ ແລະ ຂົວເຊທ່າມວກ ໂດຍມີການເຊັນສັນຍາລະຫວ່າງກົມສາກົນ, ກະ ຊວງແຜນການ ແລະ ການລົງທຶນເຊິ່ງເປັນຕົວແທນໃຫ້ແກ່ລັດຖະບານແຫ່ງ ສປປລາວ ແລະ ອົງການຮ່ວມມືສາກົນແຫ່ງປະເທດຍີປຸ່ນທີ່ເປັນຕົວແທນໃຫ້ແກ່ລັດຖະບານຍີ່ປຸ່ນ.
ຂົວເຊກຸມກາມ ແລະ ເຊທ່າມວກ ມີໂຄງເສົາຂົວ ແລະ ຫນ້າຂົວ ເປັນເບຕົງເສີມເຫຼັກ ສາມາດຮັບນໍ້າຫນັກໄດ້11ໂຕນ/ເພົາ,ເປັນຂົວຂາງເຫຼັກ ທີ່ມີຄວາມສາມາດທົນທານຕໍ່ການເຂົ້າໝ້ຽງສູງ ຂົວເຊກຸມກາມມີຄວາມຍາວ160ແມັດ, ກ້ວາງ10ແມັດກ່ວາ, ແບ່ງອອກເປັນ 3 ຊ່ວງ ແລະ ຂົວເຊທ່າມວກຍາວ 160ແມັດ,ກວ້າງເກືອບ 12 ແມັດ,ແບ່ງອອກເປັນ 4 ຊ່ວງ ພ້ອມກັນນີ້ກໍໄດ້ກໍ່ສ້າງທາງເຂົ້າຂົວທັງ2ແຫ່ງ ເຊິ່ງປູດ້ວຍຢ່າງອັດສະຟານມີໄລຍະທາງທັງຫມົດ 2.056 ແມັດ.
ນອກນີ້ຍັງໄດ້ກໍ່ສ້າງລະບົບຕ້ານເຈື່ອນດ້ວຍກະຕ່າຫີນ-ປູກຫຍ້າ ແລະ ຕິດຕັ້ງລະບົບໄຟແສງສະຫວ່າງ ແລະ ເຄື່ອງຫມາຍຈະລາຈອນຄົບຊຸດໂດຍການຮັບເໝົາຂອງບໍລິສັດຮາຊາມາອັນໂດ ແລະ ບໍລິສັດເຈເອັຟຈີເອັນຈິເນຍລີ້ງ,ເຊິ່ງໃຊ້ໄລຍະເວລາ 31 ເດືອນໂດຍເລີ່ມແຕ່ວັນທີ 6 ທັນວາ 2016 ຫາວັນທີ 30 ມິຖຸນາ 2019 ຜ່ານການຈັດຕັ້ງປະຕິບັດໂຄງການແມ່ນໄດ້ສໍາເລັດກ່ອນກຳນົດເຊິ່ງມີມູນຄ່າການກໍ່ສ້າງທັງຫມົດ194 ຕື້ກີບໂດຍແມ່ນທຶນຊ່ວຍເຫຼືອລ້າຈາກລັດຖະບານຍີ່ປຸ່ນ ແລະ ທຶນຂອງລັດຖະບານລາວແມ່ນ 2 ຕື້ 790 ລ້ານກີບ.
ຈາກນັ້ນຮອງລັດຖະມົນຕີກະຊວງຕ່າງປະເທດຍີ່ປຸ່ນ ກໍ່ໄດ້ກ່າວມອບ ຂົວທັງ 2 ແຫ່ງໃຫ້ກັບລັດຖະບານລາວ. ແລ້ວທ່ານ ວຽງສະຫວັດ ສີພັນດອນ ຮອງລັດຖະມົນຕີກະຊວງໂຍທາ ທິການ ແລະ ຂົນສົ່ງ ກໍ່ໄດ້ກ່າວມອບຕໍ່ໃຫ້ກັບແຂວງເປັນຜູ້ຊົມໃຊ້.
ຈາກນັ້ນທ່ານ ໂພໄຊ ໄຍຍະສອນ ຮອງເຈົ້າແຂວງສະຫວັນນະເຂດກໍ່ໄດ້ກ່າວຮັບ ແລະ ກ່າວຄຳຂອບໃຈ ຕໍ່ລັດຖະ ບານຍີ່ປຸ່ນທີ່ເຫັນວ່າໂຄງການກໍ່ສ້າງຂົວເຊກຸມກາມ ແລະ ຂົວເຊທ່າມວກຕາມແລວເສັ້ນທາງເລກ 9 ເປັນໂຄງ ການທີ່ມີຄວາມສຳຄັນຫຼາຍໃນດ້ານການຂົນສົ່ງທາງບົກ ແລະ ເປັນໂຄງການທີ່ສຳຄັນທາງດ້ານ ເສດຖະກິດ ແລະ ສັງຄົມ ປະດອບສ່ວນເຂົ້າໃນການຈັດຕັ້ງຜັນຂະຫຍາຍແຜນພັດທະນາເສດຖະກິດແຫ່ງຊາດ 5 ປີ ເທື່ອທີ VIII ຂອງລັດຖະບານ.
ເວົ້າລວມເວົ້າສະເພາະ ແມ່ນແຜນພັດທະນາເສດຖະກິດ-ສັງຄົມຄົມ ແຂວງສະຫວັນນະເຂດ ຂໍໃຫ້ຄຳໝັ້ນສັນຍາວ່າຈະຊີ້ນຳພະແນກການ,ອຳນາດການປົກຄອງ ແລະ ປະຊາຊົນທີ່ກ່ຽວຂ້ອງ ຊ່ວຍກັນປົກປັກຮັກສາ ,ຖະນຸຖະໜອມ,ປົວແປງໃຫ້ຂົວຮັບປະກັນທາງເຕັກນິກ,ຄົງທົນຍາວນານ ຮັບໃຊ້ການຄົມມະນາຄົມຂົນສົ່ງປະກອບສ່ວນເຂົ້າໃນການພັດທະນາເສະຖະກິດ-ສັງຄົມໃຫ້ສົມກັບການສະໜັບສະໜູນຊ່ວຍເຫຼືອລ້າຈາກລັດຖະບານຍີ່ປຸ່ນແລະ ຫວັງຢ່າງຍິ່ງວ່າຈະໄດ້ຮັບການສະໜັບສະໜູນຊ່ວຍເຫຼືອໂຄງການອື່ນໆທີ່ສຳຄັນ ແລະ ມີຄວາມໝາຍຕື່ມອີກຈາກລັດຖະບານ ແລະປະຊາຊົນຍີ່ປຸ່ນ.
ແຫຼ່ງຂໍ້ມູນ: Media Laos