ກອງປະຊຸມຄະນະຊີ້ນຳຂັ້ນສູນກາງ ສຳລັບໂຄງການຕາບີ ຄັ້ງທີ 12 ປີທີ 3-4 ຈັດຂຶ້ນຢູ່ສະຖາບັນຄົ້ນຄວ້າກະສິກຳ-ປ່າໄມ້ ແລະ ພັດທະນາຊົນນະບົດ ໂດຍມີທ່ານ ຄຳພອນ ຣາຊາຈັກ ຫົວໜ້າກົມຄຸ້ມຄອງ ແລະ ພັດທະນາທີ່ດິນກະສິກຳ ທ່ານ Martin Hasler ຜູ້ຕາງໜ້າອົງການ SDC ປະຈຳ ສປປ ລາວ ພ້ອມດ້ວຍຄະນະຊີ້ນຳໂຄງການຈາກສູນກາງ-ທ້ອງຖິ່ນ ເຂົ້າຮ່ວມ.
ເພື່ອປຶກສາຫາລື ແລະ ເອກະພາບກັນກ່ຽວກັບຜົນສຳເລັດໃນປີທີ 2 ແລະ ແຜນການປີທີ 3-4 ເຊິ່ງໂຄງການຕາບີ ຈະສິ້ນສຸດໃນປີ 2020 ໂຄງການດັ່ງກ່າວ ມີເປົ້າໝາຍເພື່ອພັດທະນາລະບົບນິເວດຊີວະນາໆພັນກະສິກຳ ພ້ອມທັງຊຸກຍູ້ການປົກປັກຮັກສາຟື້ນຟູຄຸ້ມຄອງ ແລະ ນຳໃຊ້ຊັບພະຍາກອນຊີວະນາໆພັນກະສິກຳໃຫ້ມີຄວາມຍືນຍົງ ເປັນເງື່ອນໄຂຍົກລະດັບຄຸນນະພາບຊີວິດຂອງປະຊາຊົນບັນດາເຜົ່າ ໃຫ້ຫຼຸດພົ້ນອອກຈາກຄວາມທຸກຍາກຕາມທິດສີຂຽວ.
ການຈັດຕັ້ງປະຕິບັດໂຄງການຕາບີ ປີທີ 3-4 ມີເປົ້າໝາຍປະກອບສ່ວນຫຼຸດຜ່ອນຄວາມທຸກຍາກ ແລະ ຍົກລະດັບຊີວິດການເປັນຢູ່ຂອງປະຊາຊົນບັນດາເຜົ່າ ຢູ່ເຂດພູດອຍ ດ້ວຍການນຳໃຊ້ ແລະ ຄຸ້ມຄອງຊີວະນາໆພັນກະສິກຳໃນຂົງເຂດ ພູມສັນຖານໃຫ້ມີຄວາມຍືນຍົງ ເຊິ່ງໄດ້ເລັ່ງໃສ່ການພັດທະນາອາຊີບດ້ານຊີວະນາໆພັນກະສິກຳ ແກ່ປະຊາຊົນບັນດາເຜົ່າ ເປັນຕົ້ນ ການເຮັດຟອຍກວາດຈາກແຂມ ໝາກກ້ຽງພື້ນເມືອງ ວັງສະຫງວນສັດນ້ຳ ຍານປ່າ ຂ່າປ່າ ເຫັດທຳມະຊາດ ນ້ຳເຜິ້ງ ເຂົ້າໄກ່ນ້ອຍ ໜໍ່ໄມ້ ແລະ ອື່ນໆ.
ແຫຼ່ງຂໍ້ມູນ: ໜັງສືພິມວຽງຈັນໃໝ່
Hits: 30
