ທີ່ສະຖານທູດໄທ, ນະຄອນຫຼວງວຽງຈັນ. ຄະນະມູນລະນິທິລາງວັນສົມເດັດເຈົ້າຟ້າມະຫາຈັກກຣີ ( Princess Mahachakri Award: PMCA ) ໄດ້ເດີນທາງມາຢ້ຽມຢາມ ຄູລາວ ທີ່ໄດ້ຮັບລາງວັນວັນສົມເດັດເຈົ້າຟ້າມະຫາຈັກກຣີ ຄົນທຳອິດ ໃນປີ 2015 ຄູ ຄຳສ້ອຍ ວົງສຳພັນ ຄູຈາກໂຮງຮຽນ ມສ ວຽງຈັນ ແລະ ຜູ້ທີ 2 ໃນປີ 2017 ຄູ ຄູນວິໄລ ເຄນກິຕິສັກ ຄູຈາກໂຮງຮຽມປະຖົມທົ່ງກາງ ແລະ ຈາກນັ້ນກໍໄດ້ເດີນທາງໄປພົບປະຢ້ຽມຢາມ ຄູຜູ້ທີ 3 ທີໄດ້ຮັບລາງວັນ ໃນປີນີ້ ຢູ່ທີ່ແຂວງຫຼວງພະບາງ.
ນຳພາຄະນະໂດຍທ່ານ ດ.ຣ ກິດຕິພົງ ກິລະຕິກອນ ປະທານຄະນະກຳມະການ PMCA , ທ່ານ ຈັກກະພັດ ວະທາ ແລະ ທ່ານ ນາງ ເບັນຈະລັດ ນໍ້າຟ້າ ຜູ້ຈັດການຄະນະກຳມະການມູນລະນິທິ PMCA.
ຄູລາງວັນສົມເດັດເຈົ້າຟ້າ ມາຫະຈັກກຣີ ໄດ້ເລີ່ມຈັດຕັ້ງຂຶ້ນໃນປີ 2015 ເປັນຕົ້ນມາ ເປັນລາງວັນທີໃຫ້ກັບ ຄູຜູ້ສ້າງຄວາມປ່ຽນແປງໃຫ້ແກ່ຊີວິດນັກຮຽນ ແລະ ໃຫ້ການຊ່ວຍເຫຼືອຕໍ່ການສຶກສາໃນປະເທດອາຊຽນ ລວມເຖິງປະເທດ ຕິມໍ ເລສເຕ. ເພາະວ່າຖ້າ ຄູມີຄຸນນະພາບ ກໍຈະສາມາດສ້າງຄົນໃຫ້ມີຄຸນນະພາບ ລາງວັນເຈົ້າຟ້າ ມະຫາຈັກກຣີ ຫຼື Princess Mahachakri Award ເປັນລາງວັນພຣະຣາດຊະທານລະດັບນານາຊາດ ເພື່ອເຊິດຊູກຽດຕິຍົດ ຄູ ທີ່ດີເດັ່ນໃນລະດັບການສຶກສາຂັ້ນພື້ນຖານ ອະນຸບານ, ປະຖົມ ແລະ ມັດທະຍົມ ຂອງປະເທດໃນອາຊຽນ ລວມເຖິງປະເທດ ຕີມໍ ເລສເຕ ທັງໝົດ 11 ປະເທດ.
ກໍ່ຕັ້ງໂຄງການນີ້ຂຶ້ນມາ ເພື່ອເຖີດພະກຽດສົມເດັດພຣະການິຖາທິລາດ ເຈົ້າກົມສົມເດັດພະເທບພະລັດລາດສຸດາ ສະຫຍາມບໍລົມລາຊະກຸມາລີ ຄົບຮອບ 60 ພັນສາ ໃນປີ 2015 ເຊິ່ງທ່ານເປັນຜູ້ຊົງມີພະຄຸນຢ່າງຍິ່ງຕໍ່ການສຶກສາທັງພາຍໃນ ແລະ ຕ່າງປະເທດ, ໂດຍມີການດຳເນີນໂຄງການໂດຍມູນລະນິທິລາງວັນສົມເດັດເຈົ້າຟ້າມະຫາຈັກກຣີ ໂດຍມີການຈັດຕັ້ງມອບທຸກໆ 2 ປີ ແລະ ປີນີ້ ກໍເປັນຄັ້ງທີ 3 ແລ້ວ.
ສຳລັບປີນີ້, ຄູ ຕົວແທນປະເທດລາວທີ່ໄດ້ຮັບລາງວັນອັນຊົງກຽດນີ້ໄດ້ແກ່ ຄູ ໄພສະນິດ ປັນຍາສະຫວັດ ຄູພາສາລາວ ແລະ ວັນນະຄະດີ ໂຮງຮຽນມັດທະຍົມສຶກສາສັນຕິພາບ ແຂວງຫຼວງພະບາງ ຜູ້ທີ່ມີຜົນງານດ້ານສາລະຄະດີກ່ຽວກັບຄວາມຂາດແຄນຂອງເມືອງພູຄູນ ແລະ ໄດ້ຮັບລາງກຽດຕິຍົດລະດັບປະເທດຫຼາຍລາງວັນມາແລ້ວ ແລະ ໃນວັນທີ 15 ເດືອນຕຸລາ 2019 ທີ່ຈະເຖິງນີ້ ຄູ ໄພສະນິດ ກໍຈະໄດ້ເດີນທາງໄປຮັບລາງວັນກັບສົມເດັດພຣະເທບ ຢູ່ປະເທດໄທ ຮ່ວມຄູຜູ້ອື່ນໆ ທັງໝົດ 10 ປະເທດອາຊຽນ ລວມ ປະເທດຕີມໍ ເລສເຕ.
ສຳລັບ, ການຄັດເລືອກເອົາຄູ ຜູ້ທີ່ຈະໄດ້ຮັບລາງວັນສົມເດັດເຈົ້າຟ້າມະຫາຈັກກຣີ ເປັນຕົວແທນຂອງແຕ່ລະປະເທດອາຊຽນ ປະເທດລະ 1 ຄົນ ຕ້ອງມີຄຸນສົມບັດເປັນຄູຜູ້ສາມາດສ້າງການປ່ຽນແປງໃຫ້ແກ່ຊີວິດຂອງລູກສິດ ແລະ ໃຫ້ການຊ່ວຍເຫຼືອສະໜັບສະໜູນຕໍ່ວົງການສຶກສາຂອງປະເທດຕົນເອງ. ໂດຍຈະໄດ້ຮັບພຣາດຊະທານລາງວັນປະກອບດ້ວຍ ຫຼຽນລາງວັນ, ປະກາດສະນີຍະບັດ, ຂັນລາງວັນ ແລະ ເຂັ້ມຂັດຄຳເຊີດຊູພະກຽດ ແລະ ເງິນລາງວັນ 10.000 ໂດລາສະຫະລັດ.
ແຫຼ່ງຂໍ້ມູນ: ວາລະສານ ທາເກັດ