ຫໍຫຼັກເມືອງແຂວງໄຊຍະບູລີ ແມ່ນບົ່ງບອກເຖິງສັນຍາລັກແຫ່ງຄວາມສາມັກຄີ, ຄວາມເປັນສີລິມຸງຄຸນ, ຄວາມຜາສຸກ, ຄວາມອຸດົມສົມບູນຢູ່ເຢັນເປັນສຸກ ແລະ ຄວາມສີວິໄລທາງດ້ານຈິດໃຈ ແລະຍັງເປັນການຢັ້ງຢືນເຖິງຄວາມອົງອາດກ້າຫານ ໃນການຕໍ່ສູ້ປົກປັກຮັກສາບ້ານເມືອງ ອີກດ້ານໜຶ່ງກໍ່ເປັນຫຼັກຖານສຳຄັນຂອງແຂວງກໍ່ຄືປວງຊົນລາວທັງຊາດ ໄດ້ກາຍເປັນສັນຍາລັກສູນລວມທາງດ້ານຈິດໃຈ ຂອງປະຊາຊົນແຂວງໄຊຍະບູລີຍຸກໃໝ່ແຫ່ງຄວາມຈະເລີນສີວິໄລທັນສະໄໝ ພາຍໃຕ້ການນຳພາຂອງພັກແລະລັດຖະບານແຫ່ງ ສປປ ລາວ.
ທ່ານ ສຸລິເດດ ວັນຄຳ ຮອງອຳນວຍການບໍລິສັດເດດທະວີຊັບສຳຫຼວດອອກແບບແລະທີ່ປຶກສາໄດ້ເປີດເຜີຍຕໍ່ທີມຂ່າວແຂວງໃນການກໍ່ສ້າງຫໍຫຼັກເມືອງແຂວງໄຊຍະບູລີວ່າ: ການກໍ່ສ້າງຫໍຫຼັກເມືອງແຂວງໄຊຍະບູລີໄດ້ດຳເນີນພິທີວາງສີລາລຶກ ແລະກໍ່ສ້າງມາແຕ່ວັນທີ 20 ມີນາ 2018.
ແລະມາຮອດປະຈຸບັນຄວາມຄືບໜ້າຂອງໜ້າວຽກທັງໝົດແມ່ນສຳເລັດແລ້ວເກືອບ 60% ຄາດວ່າທ້າຍປີ 2019 ແມ່ນຈະໃຫ້ສໍາເລັດ 100%, ໜ້າວຽກທີ່ສໍາເລັດ ແລະ ພວມສືບຕໍ່ມີ: ວຽກກະກຽມພື້ນທີ່ກໍ່ສ້າງສໍາເລັດ 100%, ວຽກຖົມດິນຍົກລະດັບປັບສະຖານທີ່ກໍ່ສ້າງສໍາເລັດ 100%, ວຽກກໍ່ຝາກັນດິນ ແລະ ຖົມດິນຍົກລະດັບສໍາເລັດ 100%, ວຽກກໍ່ສ້າງອາຄານຫໍຫຼັກເມືອງປະຕິບັດໄດ້ 53,30%, ວຽກກໍ່ສ້າງພາຍນອກທັງໝົດປະຕິບັດໄດ້ 40,95%. ຫໍຫຼັກເມືອງດັ່ງກ່າວມີລັກສະນະຮູບຊົງຫໍປະສາດ ມີໜ້າມຸກ 4 ດ້ານ, 4 ໜ້າປະດັບດ້ວຍດອກດວງ ລວດລາຍອັນວິຈິດບັນຈົງ ເຊິ່ງສະແດງໃຫ້ເຫັນເຖິງການດຳລົງຊີວິດຮີດຄອງປະເພນີອັນດີງາມ ທີ່ນຳເອົາສະຖາປັດຕະຍະກຳທີ່ເປັນເອກະລັກທາງດ້ານວັດທະນະທຳມາລວມຢູ່ຫໍຫຼັກເມືອງແຫ່ງນີ້.
ເຊິ່ງມີຄວາມສູງ 19 ແມັດ, ສ່ວນຖ້ານເທິງມີ 4 ດ້ານ, ມີຄວາມກ້ວາງດ້ານລະ 9 ແມັດ, ມີເສົາຫຼັກເມືອງທີ່ເຮັດດ້ວຍໄມ້ຈັນຫອມ 1 ເສົາ ປະດິດສະຖານຢູ່ພາຍໃນ ມີຄວາມສູງ 9 ແມັດ ເສັ້ນຜ່າສູນກາງ 60 cm ສ່ວນອີກ 8 ເສົາ ແມ່ນມີຄວາມສູງຕົ້ນລະ 8 ແມັດ ອ້ອມຮອບສະຖານທີ່ຫໍຫຼັກເມືອງຈະມີປະຕູໂຂງເຂົ້າທັງ 4 ດ້ານຕັ້ງຢູ່ບົນເນື້ອທີ່ 1,5 ເຮັກຕາ ລວມມູນຄ່າກໍ່ສ້າງທັງໝົດ 8 ຕື້ 398 ລ້ານກີບ.
ໂດຍແມ່ນບໍລິສັດ ສ. ມະນີວົງກໍ່ສ້າງຈໍາກັດເປັນຜູ້ຮັບເໝົາກໍ່ສ້າງ ແລະ ບໍລິສັດເດດທະວີຊັບສຳຫຼວດອອກແບບແລະທີ່ປຶກສາຈໍາກັດຜູ້ດຽວ ໂດຍແມ່ນທຶນພັດທະນາທ່ອງຖິ່ນແລະ ທຶນປຸກລະດົມສົມທົບຂອງປະຊາຊົນພາຍໃນແຂວງ, ຕ່າງແຂວງ ແລະ ຕ່າງປະເທດ.
ແຫຼ່ງຂໍ້ມູນ: Midia Laos
