ເພື່ອສ້າງໂອກາດ ແລະ ເງື່ອນໄຂໃຫ້ຜູ້ປະກອບການທຸລະກິດໂຮງແຮມ ຮ້ານອາຫານ ຮ້ານຄ້າຊຸບເປີມາເກັດ ແລະ ຊາວສວນຜູ້ທີ່ປູກຜັກອິນຊີໄດ້ຮ່ວມທຸລະກິດກັນ ດັ່ງນັ້ນໂຄງການພັດທະນາກະສິກຳສະອາດ ອົງການຮ່ວມມືສາກົນປະເທດຍີ່ປຸ່ນຮ່ວມກັບກົມປູກຝັງກະຊວງກະສິກຳ ແລະ ປ່າໄມ້ ແລະ ພະແນກກະສິກຳ ແລະ ປ່າໄມ້ນະຄອນຫຼວງວຽງຈັນ.
ໄດ້ຈັດກິດຈະກຳນຳເອົາຜູ້ປະກອບການທຸລະກິດເປົ້າໝາຍ ລົງໄປພົບປະກັບຊາວສວນປູກຜັກອິນຊີທີ່ຕະຫຼາດກະ ສິກຳອິນຊີ ນະຄອນຫຼວງວຽງຈັນ (ເດີ່ນສູນການຄ້າລາວ-ໄອເຕັກ) ນຳໂດຍທ່ານ ວາດສະໜາ ສີຈະເລີນ ຮອງຫົວໜ້າພະແນກກະສິກຳ ແລະ ປ່າໄມ້ ນະຄອນຫຼວງວຽງຈັນ ມີຜູ້ຕາງໜ້າຈາກກົມປູກຝັງ ຂະແໜງປູກຝັງ ນັກທຸລະກິດຈາກ 30 ພາກສ່ວນ ລູກຄ້າ ຊາວສວນ ແລະ ພາກສ່ວນກ່ຽວຂ້ອງເຂົ້າຮ່ວມ.
ທ່ານ ວາດສະໜາ ສີຈະເລີນ ໄດ້ກ່າວວ່າ:
ການຈັດກິດຈະກຳຄັ້ງນີ້ ເພື່ອໃຫ້ພາກສ່ວນທຸລະກິດ ກໍຄື ຜູ້ປະກອບການໄດ້ມາຈັບຄູ່ ແລະ ຮັບຮູ້ກ່ຽວກັບການຜະລິດກະສິກຳອິນຊີ ເນື່ອງຈາກວ່າກະສິກຳອິນຊີຂອງກຸ່ມຊາວສວນສະມາຊິກ ເນື້ອທີ່ປູກ ແລະ ຜົນຜະລິດແມ່ນເພີ່ມຂຶ້ນເລື້ອຍໆ ແຕ່ຜົນຜະລິດທີ່ຊາວສວນນຳມາຂາຍແຕ່ລະຄັ້ງ ຢູ່ຕະຫຼາດນັດແມ່ນບໍ່ໝົດ ດັ່ງນັ້ນ ຈຶ່ງຢາກໃຫ້ນັກທຸລະກິດເຂົ້າມາສຶກສາ ເພື່ອປະກອບສ່ວນຮ່ວມກັນນຳໃຊ້ກະສິກຳອິນຊີ ເພື່ອເຮັດໃຫ້ຊາວສວນສາມາດຈຳໜ່າຍພືດຜັກໃຫ້ໝົດໃນແຕ່ລະຄັ້ງ ທີ່ນຳມາຂາຍຢູ່ຕະຫຼາດນັດສ້າງລາຍຮັບໃຫ້ແກ່ເຂົາເຈົ້າ ປັດຈຸບັນກະສິກຳອິນຊີມີການຈຳໜ່າຍຢູ່ 4 ຈຸດໃຫຍ່ຄື:
ຢູ່ຫຼັກ 5 ຖະໜົນໄກສອນ ພົມວິຫານ ບ້ານຊ້າງຄູ້ ບ້ານຫ້ວຍຫົງ ເດີ່ນສູນການຄ້າລາວ-ໄອເຕັກ ແລະ ບ້ານໜອງດ້ວງ ສະເພາະຢູ່ເດີ່ນສູນການຄ້າລາວ-ໄອເຕັກມີຫຼາຍກວ່າ 200 ໂຕະ.
ສ່ວນກິດຈະກຳທີ່ຮ່ວມກັນຈັດຄັ້ງນີ້ ເພື່ອໃຫ້ລູກຄ້າມີຄວາມເຂົ້າໃຈກ່ຽວກັບການຜະລິດກະສິກຳອິນຊີ ມີການຈົກສະຫຼາກຖາມຕອບເອົາລາງວັນ ໂດຍມີຫຼາຍພາກສ່ວນທີ່ເຂົ້າມາຮ່ວມເຮັດກິດຈະກຳນຳ ເປັນຕົ້ນ ນັກທຸລະກິດ ລູກຄ້າຊາວສວນກະສິກຳ ແລະ ຊາວສວນ ອັນໄດ້ເຮັດໃຫ້ພາຍໃນງານມີຄວາມຟົດຟື້ນຫຼາຍສົມຄວນ ມີຄົນສາມາດຕອບຄຳຖາມຖືກ ສະແດງວ່າມີຄວາມເຂົ້າໃຈຕໍ່ກະສິກຳອິນຊີທີ່ດີ ຕໍ່ສຸຂະພາບຂອງຜູ້ປູກຜູ້ຂາຍຜູ້ບໍລິໂພກ ແລະ ເປັນມິດກັບສິ່ງແວດລ້ອມ ເຊິ່ງຜ່ານການຈັດກິດຈະກຳຄັ້ງນີ້ ເຊື່ອວ່າຈະເຮັດໃຫ້ຜູ້ປະກອບການກັບຊາວສວນຜັກອິນຊີ ຈະໄດ້ມີການຮ່ວມມືກັນໃນອະນາຄົດໃນການສົ່ງເສີມຕະຫຼາດຂອງຊາວສວນໃຫ້ເພີ່ມຂຶ້ນ ແລະ ເປັນການສົ່ງເສີມໃຫ້ຜູ້ບໍລິໂພກຫັນມາບໍລິໂພກຜັກອິນຊີຫຼາຍຂຶ້ນ.
ປັດຈຸບັນກຸ່ມກະສິກຳອິນຊີນະຄອນຫຼວງວຽງຈັນ ມີເນື້ອທີ່ປູກທັງໝົດ 245 ເຮັກຕາ ມີ 11 ບ້ານ 232 ຄອບຄົວ ແລະ ພືດຜັກຫຼັກໆທີ່ປູກຈະມີຜັກສະຫຼັດ ຜັກບົ່ວໃບ ຜັກບົ້ງ ຜັກກະລ່ຳ ຜັກກາດຫໍ່ຂາວ ກະລ່ຳດອກຂຽວ ໝາກແຕງ ຫົວກາຣົດ ໝາກເລັ່ນ ໝາກຖົ່ວຍາວ ໝາກເມືອກ ແລະ ອື່ນໆ ຊະນິດຜັກປ່ຽນແປງຕາມລະດູການ ສະເພາະຕະຫຼາດນັດອິນຊີຢູ່ເດີ່ນສູນການຄ້າລາວ-ໄອເຕັກ ຈັດຂຶ້ນອາທິດໜຶ່ງ 2 ວັນ ຄື: ທຸກຕອນເຊົ້າວັນພຸດ ແລະ ວັນເສົາ ດັ່ງນັ້ນ ຜູ້ທີ່ຕ້ອງການພືດຜັກອິນຊີມາບໍລິໂພກກໍສາມາດໄປຊື້ໄດ້.
ແຫຼ່ງຂໍ້ມູນ: ໜັງສືພິມວຽງຈັນໃໝ່
