ພະແນກແຜນການ ແລະ ການລົງທຶນແຂວງໄຊຍະບູລີຕາງໜ້າອົງການປົກຄອງແຂວງກັບໂຄງການສູນມູນນິທິອະນຸລັກສັດ ສີວິໄລທ່ອງທ່ຽວຈໍາກັດຜູ້ດຽວ ໄດ້ຈັດພິທີເຊັນບົດບັນທຶກສັນຍາວ່າດ້ວຍການຄຸ້ມຄອງໂຄງການມູນນິທິອານຸລັກສັດ ແລະ ສິ່ງແວດລ້ອມລາວຂຶ້ນຢູ່ທີ່ຫ້ອງປະຊຸມພະແນກແຜນການ ແລະ ການລົງທຶນແຂວງໄຊຍະບູລີ.
ຈຸດປະສົງຂອງໂຄງການເພື່ອດຳເນີນກິດຈະການແບບອານຸລັກສັດບ້ານ-ສັດປ່າ ແລະ ສິ່ງແວດລ້ອມໃນຮູບແບບການມີສ່ວນຮ່ວມກັບປະຊາຊົນໃນທ້ອງຖິ່ນ, ສັດປະເພດຕ່າງໆຕ້ອງໄດ້ຮັບການຮັກສາສຸຂະພາບໃຫ້ໄດ້ຮັບການດູແລທີ່ດີ ເປັນຕົ້ນການໃຫ້ອາຫານ, ການປິ່ນປົວສັດເວລາເຈັບເປັນ, ມີການສັກຢາປ້ອງກັນພະຍາດສັດ, ຊ່ວຍ ເຫຼືອສັດເຖົ້າແກ່, ສັດພິການ ແລະ ສັດພົບໄພພິບັດຕ່າງໆ ເພື່ອໃຫ້ມີຄວາມຍືນຍົງ ແລະຕິດພັນກັບການທ່ອງ ທ່ຽວແບບອານຸລັກທຳມະຊາດ ແລະ ສິ່ງແວດລ້ອມ, ທັງກາຍເປັນສູນແລກປ່ຽນດ້ານການປິ່ນປົວສັດ, ຮັກສາສຸ ຂະພາບສັດ;
ພ້ອມນີ້ບໍລິເວນຂອງສູນຍັງໄດ້ອານຸລັກສິ່ງແວດລ້ອມໃຫ້ຢູ່ໃນສະພາບທີ່ດີເພື່ອການທ່ອງທ່ຽວໂດຍການມີສ່ວນ ຮ່ວມຂອງປະຊາຊົນໃນທ້ອງຖິ່ນເຊັ່ນ: ການອານຸລັກຕົ້ນໄມ້ທຳມະຊາດ, ຕົ້ນໄມ້ເປັນຢາປົວພະຍາດ, ດອກໄມ້ທຳມະຊາດ, ດອກໄມ້ປະດັບ;
ພ້ອມທັງປູກໄມ້ເສີມບາງຈຸດທີ່ຈຳເປັນເພື່ອປ້ອງກັນການເຊາະເຈື່ອນຈາກນໍ້າຝົນ ແລະ ສາຍນໍ້າຮຸ່ງ. ນອກນີ້ຍັງສ້າງກິດຈະການບໍລິການທ່ອງທ່ຽວແບບອານຸລັກຊ້າງທີ່ນຳມາປິ່ນປົວຢູ່ໃນສູນ, ມີບໍລິການຮ້ານອາຫານ ແລະ ຂີ່ເຮືອລ່ອງນໍ້າຮຸ່ງຊົມທຳມະຊາດໃນຂົງເຂດການດຳເນີນກິດຈະການດັ່ງກ່າວຕັ້ງຢູ່ຂອບເຂດບ້ານນາຕໍໃຫຍ່ ເມືອງໄຊຍະບູລີ ແຂວງໄຊຍະບູລີ ດິນດັ່ງກ່າວແມ່ນກຳມະສິດຂອງນາງ ສີວິໄລ ວົງສັກ ເຈົ້າຂອງກິດຈະການ ເຊິ່ງມີເນື້ອທີ່ທັັງໝົດ 8 ເຮັກຕາກວ່າ.
ໄລຍະດຳເນີນໂຄງການໄດ້ແບ່ງອອກເປັນສອງໄລຍະຄື: ໄລຍະທີ I ເລີ່ມແຕ່ວັນທີ 1 ມັງກອນ 2018 ຫາເດືອນທັນວາ 2019 ແມ່ນການດໍາເນີນເອກະສານ ແລະ ບຸກເບີກເນື້ອທີ່, ໄລຍະທີ II ເລີ່ມແຕ່ວັນທີ 1 ມັງກອນ 2020 ຫາວັນທີ 31 ທັນວາ 2023 ແມ່ນການພັດທະນາສະຖານທີ່ກໍ່ສ້າງພື້ນຖານໂຄງລ່າງຕ່າງໆ ການພັດທະ ນາລະບົບຂໍ້ມູນຂ່າວສານ, ການຕະຫຼາດ ແລະ ເປີດໃຫ້ບໍລິການ. ມູນຄ່າການລົງທຶນທັງໝົດ 12 ຕື້ 516 ລ້ານກວ່າກີບ.
ໃນນີ້ທຶນຄົງທີ່ 8 ຕື້ 762 ລ້ານກວ່າກີບ, ທຶນໝູນວຽນ 3 ຕື້ 754 ລ້ານກວ່າກີບ, ທຶນຈົດທະບຽນ 2ຕື້ 516 ລ້ານກ່ວາກີບ. ໂຄງການມູນນິທິອານຸລັກສັດ ແລະ ສິ່ງແວດລ້ອມລາວບໍ່ພຽງແຕ່ເປັນການອານຸລັກສັດ, ປິ່ນປົວສັດ, ອານຸລັກສິ່ງແວດລ້ອມ ແລະ ເພື່ອເປັນບ່ອນທ່ອງທ່ຽວເທົ່ານັ້ນແຕ່ຍັງເປັນການສ້າງວຽກເຮັດງານທຳໃຫ້ແກ່ຊຸມຊົນໃນທ້ອງຖິ່ນມີລາຍໄດ້ເຊັ່ນ:
ການປູກຫຍ້າລ້ຽງຊ້າງ, ເປັນແມ່ບ້ານ, ຄົນສວນ, ພະນັກງານລ້ຽງສັດ, ແປພາສາ, ແມ່ຄົວ ແລະອື່ນໆ. ຈາກນັ້ັນທັງສອງຝ່າຍໄດ້ຮ່ວມກັນເຊັນບົດບັນທຶກ ຝ່າຍແຂວງໄຊຍະບູລີໂດຍແມ່ນທ່ານ ຊົງທໍ່ ຮອງຫົວໜ້າພະແນກແຜນການ ແລະ ການລົງທຶນແຂວງ ແລະ ໂຄງການສູນມູນນິທິອານຸລັກສັດ ແລະ ສິ່ງແວດລ້ອມລາວ ໂດຍທ່ານນາງ ສີວິໄລ ວົງສັກ ອຳນວຍການບໍລິສັດສີວິໄລທ່ອງທ່ຽວຈໍາກັດ ໂດຍເຂົ້ົາຮ່ວມເປັນສັກຂີພິຍານ ຂອງທ່ານນາງ ບຸນພັກ ອິນທະປັນຍາຮອງເຈົ້າແຂວງໆໄຊຍະບູລີ, ມີຫົວໜ້າ, ຮອງຫົວໜ້າພະແນກການ, ເຈົ້າເມືອງໄຊຍະບູລີ ແລະ ພາກສ່ວນທີ່ກ່ຽວຂ້ອງທັງສອງຝ່າຍເຂົ້າຮ່ວມ
ແຫຼ່ງຂໍ້ມູນ: Midia Laos
