ໃນປັດຈຸບັນຢູ່ປະເທດເຮົາເງິນຕາຕ່າງປະເທດແຂງຄ່າສູງຂຶ້ນທຽບໃສ່ເງິນກີບ ຄືອັດຕາແລກປ່ຽນເງິນໂດລາສະຫະລັດ 1 ໂດລາ ອັດຕາຊື້ 8.662 ກີບ ແລະ ອັດຕາຂາຍ 8.680 ກີບ ແລະ ເງິນບາດໄທ 1 ບາດ ອັດຕາຊື້ 285,54 ກີບ ແລະ ອັດຕາຂາຍ 287,70 ກີບ ອັນໄດ້ເຮັດໃຫ້ກະທົບເຖິງຄ່າຄອງຊີບຂອງພະນັກງານ ທະຫານ ຕຳຫຼວດ ພໍ່ຄ້າ ຊາວຂາຍ ແລະ ປະຊາຊົນບັນດາເຜົ່າ ເນື່ອງຈາກບາງປະເພດສິນຄ້າຢູ່ຕາມຕະຫຼາດປັບສູງຂຶ້ນເລັກໜ້ອຍ ໂດຍສະເພາະ ແມ່ນປະເພດສິນຄ້າທີ່ນຳເຂົ້າຈາກຕ່າງປະເທດທີ່ຄິດໄລ່ຕາມອັດຕາແລກປ່ຽນລະຫວ່າງເງິນກີບກັບເງິນຕາຕ່າງປະເທດ ເປັນຕົ້ນ ແມ່ນເງິນບາດ ແລະ ເງິນໂດລາ.
ທີມງານຂ່າວພວກເຮົາໄດ້ລົງເກັບກຳຂໍ້ມູນການຊື້-ຂາຍຂອງແມ່ຄ້າຢູ່ຕະຫຼາດໂນນຄໍ້ ເມືອງໄຊເສດຖາ ນະຄອນຫຼວງວຽງຈັນ ຜ່ານການລົງສອບຖາມຂໍ້ມູນລາຄາສິນຄ້າປະເພດພືດຜັກ ແລະ ເຂົ້າ ສານ ເຫັນວ່າແມ່ຄ້າຊາວຂາຍໄດ້ປະຕິບັດຕາມລາຄາທີ່ກົມການຄ້າພາຍໃນ ກໍຄື ພະແນກອຸດສາຫະກຳ ແລະ ການຄ້ານະຄອນຫຼວງວຽງຈັນ ແລະ ຫ້ອງການອຸດສາຫະກຳ ແລະ ການຄ້າເມືອງໄຊເສດຖາທີ່ໄດ້ແຈ້ງລົງມາຈະບໍ່ໄດ້ປັບລາຄາສິນຄ້າຂຶ້ນຕາມໃຈ ເຊິ່ງລາຄາສິນຄ້າປົກກະຕິໃນຕະຫຼາດ ຄື:
ປະເພດສິນຄ້າເປັນກິໂລ ຜັກກະລ່ຳປີ 7.000 ກີບ ໜາກເຂືອ ໝາກຊູ ໝາກນາວ 5.000 ກີບ ໝາກຖົ່ວຍາວ 10.000 ກີບ ໝາກເຜັດ 12.000 ກີບ ຜັກກາດຂາວ ຫົວສີໄຄ 4.000 ກີບ ຫອມປ້ອມ 25.000 ກີບ ຊີ້ນໝູປະເພດ 1 ລາຄາ 35.000 ກີບ ປະເພດ 2 ກະດູກ 25.000 ກີບ ຊີ້ນງົວ ຄວາຍ ປະເພດ 1 ລາຄາ 70.000 ກີບ ປະເພດ 2 ກະດູກ 30.000 ກີບ ເຄື່ອງໄນ 50.000 ກີບ ໄຂ່ໄກ່ພັນເປັນແຕະລາຄາ 22-28.000 ກີບ.
ສ່ວນສິນຄ້າປະເພດເຂົ້າສານຕາມການໃຫ້ຂໍ້ມູນຈາກແມ່ຄ້າຂາຍເຂົ້າເຫັນວ່າ ມີການເໜັງຕີງຈາກໄລຍະຜ່ານມາ ລາຄາ 50-70.000 ກີບ ມາເປັນ 70.000-110.000 ກີບຕໍ່ໝື່ນໃນປັດຈຸບັນ ເນື່ອງຈາກຕົ້ນທຶນເຂົ້າຢູ່ໂຮງສີເຂົ້າປັບຕົວສູງຂຶ້ນ ຈຶ່ງເຮັດໃຫ້ແມ່ຄ້າຕ້ອງເພີ່ມລາຄາຂຶ້ນຕາມເພື່ອໃຫ້ມີກຳໄລ ເຊິ່ງລາຄາເຂົ້າສານສູງ ມັນໄດ້ກະທົບເຖິງຊາວຄ້າຂາຍເຂົ້າ ຈາກເມື່ອກ່ອນລູກຄ້າມັກຊື້ເຂົ້າເປັນເປົາ ແລະ ເປັນໝື່ນ (12 ກິໂລ) ໄດ້ຫຼຸດລົງມາຊື້ເປັນໝື່ນ ແລະ ເປັນກິໂລເພື່ອໄປແກ້ໄຂຄອບຄົວແຕ່ລະວັນໄປ ແລະ ການຊື້ເຂົ້າປະລິມານໜ້ອຍລົງຂອງລູກຄ້ານັ້ນກໍຍ້ອນອີງໃສ່ລາຍຮັບເຂົາເຈົ້າບາງຄອບຄົວມີລາຍຮັບປົກກະຕິ ແຕ່ການໃຊ້ຈ່າຍຜັດເພີ່ມຂຶ້ນ ຍ້ອນສິນຄ້າຫຼາຍປະເພດທີ່ນຳເຂົ້າຈາກຕ່າງປະເທດມີການປັບສູງຂຶ້ນ ດັ່ງນັ້ນ ຈຶ່ງຕ້ອງຫຼຸດປະລິມານການຊື້ລົງ ຈະຊື້ແນວລະເລັກລະນ້ອຍເພື່ອຄວາມຢູ່ລອດໄປແຕ່ລະວັນ ໃນເມື່ອລາຄາເຂົ້າສູງຂຶ້ນເຮັດໃຫ້ມີຜົນກະທົບຕໍ່ແມ່ຄ້າຊາວຂາຍ ແລະ ຜູ້ບໍລິໂພກ ໂດຍສະເພາະ ຜູ້ທີ່ມີລາຍຮັບຕ່ຳ ດັ່ງນັ້ນ ຈຶ່ງຝາກເຖິງພາກລັດ ກໍຄື ພາກສ່ວນກ່ຽວຂ້ອງໃຫ້ມີການຄຸ້ມຄອງລາຄາເຂົ້າ ເປືອກຈາກຜູ້ຜະລິດ ແລະ ເຂົ້າສານຢູ່ຫົວໜ່ວຍທຸລະກິດໂຮງສີເຂົ້າ.
ແຫຼ່ງຂໍ້ມູນ: ໜັງສືພິມວຽງຈັນໃໝ່