ພາຍຫຼັງໄດ້ຮັບການລາຍງານຂອງພົນລະເມືອງດີປະຊາຊົນບ້ານໂພນ ເມືອງລະມາມ ແຂວງເຊກອງ ຜູ້ຄົ້ນພົບວັດຖຸບູຮານປະເພດເຄື່ອງປະດັບຂອງຄົນສະໄໝກ່ອນ, ມາທ່ານ ບູ່ໄຊ ໄຊຍະເສນ ຫົວໜ້າພະ ແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ແຂວງເຊກອງ ພ້ອມດ້ວຍຂະແໜງທີ່ກ່ຽວຂ້ອງ ແລະ ຫ້ອງການຖະແຫຼງຂ່າວ, ວັດທະນະທໍາ ແລະ ທ່ອງທ່ຽວເມືອງລະມາມ ໄດ້ລົງເກັບກໍາຂໍ້ມູນຕົວຈິງວັດຖຸພັນດັ່ງກ່າວ ເພື່ອນໍາມາເກັບຮັກສາໄວ້ຢູ່ຫໍພິພິທະພັນມູນເຊື້ອຂອງແຂວງເຊກອງເປັນມໍລະດົກຂອງຊາດຕາມລະບຽບກົດໝາຍ.
ທ່ານ ວັນນາ ປະຊາຊົນບ້ານໂພນ ເມືອງລະມາມ ແຂວງເຊກອງໄດ້ລາຍງານໃຫ້ຮູ້ວ່າ:
ໄດ້ຄົ້ນພົບວັດຖຸພັນຈໍານວນດັ່ງກ່າວໃນບໍລິເວນພື້ນທີ່ດິນນາຂອງຕົນເອງ ຂະນະທີ່ຕົນກໍາລັງຂຸດດິນໂພນເພື່ອບຸກເບີກເນື້ອທີ່ດິນນາ ໃນລະຫວ່າງຕົ້ນເດືອນ ກຸມພາ ປີ 2019 ຜ່ານມາເຊິ່ງປະກອບມີ: ປອກແຂນຊະນິດແປ 2 ອັນ, ຊະນິດກົມຕັນ 1 ອັນ, ຊະນິດກົມໂກນກາງ 5 ອັນ, ກະດິ່ງຊະນິດຕ່າງໆທັງນ້ອຍ ແລະ ໃຫຍ່ທັງໝົດ ຈໍານວນ 53 ອັນ.
ວັດຖຸພັນຈໍານວນດັ່ງກ່າວພົນລະເມືອງດີຜູ້ຄົ້ນພົບຄື: ທ່ານ ວັນາ ມີຄວາມຍິນດີມອບໃຫ້ການຈັດຕັ້ງພະແນກ ຖວທ ແຂວງ ເພື່ອນໍາມາເກັບຮັກສາໄວ້ຢູ່ຫໍພິພິທະພັນມູນເຊື້ອຂອງແຂວງເປັນມໍລະດົກຂອງຊາດ, ກ່າວຮັບໂດຍແມ່ນທ່ານ ບູ່ໄຊ ໄຊຍະເສນ ຫົວໜ້າພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວແຂວງ ຊ້ອງໜ້າພາກສ່ວນທີ່ກ່ຽວຂ້ອງ, ອົງການປົກຄອງບ້ານ ແລະ ຄອບຄົວຜູ້ກ່ຽວ ເຊິ່ງມີບົດບັນທຶກມອບ-ຮັບຢ່າງເປັນທາງການ, ໃນດ້ານນະໂຍບາຍຕໍ່ຜູ້ທີ່ຄົ້ນພົບນັ້ນ ຈະໄດ້ຄົ້ນຄວ້າປະຕິບັດຕາມລະບຽບກົດໝາຍທີ່ໄດ້ກໍານົດໄວ້ ຢ່າງຖືກຕ້ອງ ແລະ ເໝາະສົມ.
ຕາມການສັນນິຖານເປື້ອງຕົ້ນຂອງວິຊາການຫໍພິພິທະພັນມູນເຊື້ອ ແຂວງເຊກອງໃຫ້ຮູ້ວ່າ:
ວັດຖຸພັນດັ່ງກ່າວ ແມ່ນເຄື່ອງປະດັບຂອງຄົນຍົກສະໄໝລ້ານຊ້າງ ຜະລິດດ້ວຍທອງສໍາລິດ ແຕ່ແນວໃດກໍ່ຕາມ ເພື່ອຄວາມຊັດເຈນ ຈະໄດ້ເຊີນວິຊາການຈາກກົມມໍລະດົກລົງມາວິໄຈຂໍ້ມູນ ແລະ ຂຽນປະຫວັດໃຫ້ລະອຽດຈະແຈ້ງ, ພ້ອມທັງຈົດທະບຽນ ຂື້ນບັນຊີວັດຖຸພັນດັ່ງກ່າວໃຫ້ຖືກຕ້ອງຕາມລະບຽບຫຼັການ ແລ້ວນໍາມາວາງສະແດງຢູ່ຫໍພິພິທະພັນມູນເຊື້ອຂອງແຂວງ ເຊກອງ ເພື່ອໃຫ້ແຂກທັງພາຍໃນ ແລະ ຕ່າງປະເທດ ເຂົ້າມາທ່ຽວຊົມ ແລະ ສຶກສາຄົ້ນຄ້ວາຕໍ່ໄປ.
ແຫຼ່ງຂໍ້ມູນ: o ຂ່າວ-ພາບ: ສົມບູນ. Midia Laos