ປັດຈຸບັນ ສິນຄ້າອຸປະໂພກ-ບໍລິໂພກ ໃນສັງຄົມລາຄາສູງຂຶ້ນຫລາຍ ເຊິ່ງສົ່ງຜົນກະທົບຕໍ່ການດຳລົງຊີິວິດປະຈຳວັນຂອງຜູ້ມີລາຍຮັບຕ່ຳພໍສົມຄວນ.
ແຕ່ເຖິງຢ່າງໃດກໍຕາມ ພາກສ່ວນກ່ຽວຂ້ອງ ກໍໄດ້ເອົາໃຈໃສ່ຄຸ້ມຄອງລາຄາສິນຄ້າ ໃຫ້ຢູ່ໃນລະດັບທີ່ເໝາະສົມ ແລະ ບໍ່ໃຫ້ແມ່ຄ້າຊາວຂາຍສວຍໂອກາດຂຶ້ນລາຄາຕາມໃຈ ໂດຍສະເພາະສິນຄ້າປະເພດເຂົ້າ, ຊີ້ນ, ປາ… ດັ່ງຫ້ອງການອຸດສາຫະກຳ ແລະ ການຄ້າເມືອງນາຊາຍທອງ ນະຄອນຫລວງວຽງຈັນ ກໍໄດ້ເອົາໃຈໃສ່ຈັດຕັ້ງປະຕິ ບັດຕາມລະບຽບທີ່ຂັ້ນເທິງວາງອອກຢ່າງເຂັ້ມງວດ ແລະ ລົງຕິດຕາມກວດກາການຄ້າຂາຍໃນຕະຫລາດພາຍໃນເມືອງໃຫ້ມີຄວາມເປັນລະບຽບຮຽບຮ້ອຍ.
ຕາມການໃຫ້ສຳພາດຂອງທ່ານ ແສງອຸໄທ ດວງມະນີວົງ ຮອງຫົວໜ້າຫ້ອງການອຸດສາຫະກຳ ແລະ ການຄ້າເມືອງນາຊາຍທອງວ່າ:
ການຄຸ້ມຄອງລາສິນຄ້າພາຍໃນເມືອງ ໄດ້ອີງໃສ່ລະບຽບຂອງກະຊວງອຸດສາຫະກໍາ ແລະ ການຄ້າ ວາງອອກ ພ້ອມທັງຈັດກອງປະຊຸມເຜີຍແຜ່ໃຫ້ປະຊາຊົນ, ຫົວໜ່ວຍທຸລະກິດ, ອົງການປົກຄອງຂັ້ນເມືອງໄດ້ຮັບຮູ້ ແລະ ຈັດຕັ້ງປະຕິບັດຢ່າງເຂັ້ມງວດຕິດພັນກັບການລົງຕິດຕາມກວດກາການຊື້ຂາຍ, ການຕິດລາຄາສິນຄ້າເປັນເງິນກີບ ຢູ່ບັນດາຕະຫລາດຕ່າງໆພາຍໃນເມືອງ ຢ່າງເປັນປົກກະຕິ.
ນອກຈາກນີ້, ກໍໄດ້ເອົາໃຈໃສ່ສະກັດກັ້ນ ສິນຄ້າເຖື່ອນ ຫລື ສິນຄ້າລັກລອກນຳເຂົ້າ, ສິນຄ້າຜິດກົດໝາຍ ແລະ ສິນຄ້າໝົດອາຍຸນຳໃຊ້ ເພື່ອທຳລາຍຖິ້ມເປັນຈຳນວນຫລາຍ. ອັນພົ້ນເດັ່ນເມື່ອມໍ່ໆນີ້, ໄດ້ຢຶດໝູນ້ອຍແຊ່ແຂງທີ່ລັກລອບເຂົ້າມາບໍ່ຖືກກົດໝາຍ ໄດ້ຫລາຍກວ່າ 300 ໂຕ, ພ້ອມຈັດພິທີທຳລາຍຖິ້ມເປັນທີ່ຮຽບຮ້ອຍ.
ທ່ານຮອງຫົວໜ້າຫ້ອງການອຸດສາຫະກຳ ແລະ ການຄ້າ ຍັງໃຫ້ຮູ້ຕື່ມວ່າ:
ສິນຄ້າທີ່ມີການເໜັງຕີງໃນປັດຈຸບັນນີ້ ແມ່ນປະເພດເຂົ້າ ເຫັນວ່າເລີ່ມມີການເໜັງຕີງຫລາຍ ເຖິງຢ່າງໃດກໍຕາມຫ້ອງການອຸດສາຫະກຳ ແລະ ການຄ້າເມືອງ ກໍໄດ້ປະສານສົມທົບພາກທຸລະກິດເພື່ອກຳນົດລາຄາໃຫ້ສົມເຫດສົມຜົນ ໃຫ້ຢູ່ຕາມລະບຽບຂອງກະຊວງວາງອອກ.ແນວໃດກໍຕາມໃນຕໍ່ໜ້ານີ້, ກໍຈະໄດ້ສຸມໃສ່ປະຕິບັດຕາມລະບຽບຂອງຂັ້ນເທິງວາງອອກ ໂດຍສະ ເພາະແມ່ນຄຸ້ມຄອງລາຄາສິນຄ້າຊື້ຂາຍໄປຕາມກຳນົດ ເພື່ອບໍ່ໃຫ້ມີຜົນກະທົບຕໍ່ການດຳລົງຊີ-ວິດຂອງປະຊາຊົນ ກໍຄືສັງຄົມ ຕິດພັນກັບການກວດກາສິນຄ້າເກືອບຫ້າມ, ສິນຄ້າໝົດອາ ຍຸ, ເຊື່ອມຄຸນນະພາບ ເພື່ອບໍ່ໃຫ້ມີຜົນກະທົບຕໍ່ສຸຂະພາບຂອງປະຊາຊົນ, ສືບຕໍ່ແກ້ໄຂບັນຫາການຂາຍເຄື່ອງຕາມແຄມທາງທີ່ບໍ່ເປັນລະບຽບ ໃຫ້ເປັນຮູບປະທຳ ແລະ ມີຄວາມເປັນລະບຽບຮຽບຮ້ອຍ.
ແຫຼ່ງຂໍ້ມູນ: ສຳນັກຂ່າວສານປະເທດລາວ
