ຫວຍພັດທະນາ ຕ້ອງດໍາເນີນທຸລະກິດຢ່າງໂປ່ງໃສ ເພື່ອສ້າງຄວາມເຊື່ອໝັ້ນໃຫ້ສັງຄົມ

ທ່ານ ສົມ​ດີ ດວງ​ດີ ຮອງ​ນາ­ຍົກ­ລັດ­ຖະ­ມົນ­ຕີ ລັດ­ຖະ­ມົນ­ຕີ​ກະ­ຊວງ​ການ​ເງິນ ລົງ​ຊຸກ­ຍູ້​ວຽກ​ງານ​ການດຳ­ເນີນ​ທຸ­ລະ​ກິດ​ຫວຍ​ພັດ­ທະ­ນາ ຢູ່​ບໍ­ລິ­ສັດ​ລັດ​ວິ​ສາ​ຫະ​ກິດ​ຫວຍ​ພັດ­ທະ­ນາ ວັນ​ທີ 9 ສິງ­ຫາ 2019 ໂດຍ​ໄດ້​ຮັບ​ການ​ຕ້ອນ­ຮັບ​ຈາກ​ຄະ­ນະ​ສະ­ພາ​ບໍ­ລິ­ຫານ ຄະ­ນະ​ອຳ­ນວຍ​ການ ແລະ ພະ­ນັກ­ງານ​ກ່ຽວ­ຂ້ອງ.

ທ່ານ ອັກ​ຄະ​ວອນ​ຫຼວງ ສຸ­ວັນ­ນະ​ວົງ ຜູ້­ອຳ­ນວຍ­ການ​ບໍ­ລິ­ສັດ​ລັດ​ວິ​ສາ​ຫະ​ກິດ​ຫວຍ​ພັດ­ທະ­ນາ ກ່າວ​ວ່າ:

ບໍ­ລິ­ສັດ​ລັດ​ວິ​ສາ​ຫະ​ກິດ​ຫວຍ​ພັດ­ທະ­ນາ ສ້າງ­ຕັ້ງ​ຂຶ້ນ​ວັນ​ທີ 14 ທັນ­ວາ 1982 ເປັນ​ທຸ­ລະ​ກິດ​ຂອງ​ລັດ ມີ​ການ​ລົງ­ທຶນ 500.000 ກີບ ມາ​ຮອດ​ເດືອນ​ມິ­ຖຸ­ນາ 2019 ບໍ­ລິ­ສັດ​ມີ​ທຶນ 195,32 ຕື້​ກີບ ປະ­ກອບ​ມີ 6 ພະ​ແນກ ພະ­ນັກ­ງານ 56 ຄົນ ມີ 44 ຕົວ​ແທນ​ຈຳ­ໜ່າຍ​ທົ່ວ​ປະ­ເທດ ມີ​ຜູ້​ຂາຍ​ຫວຍ​ແບບ​ທັນ​ສະ­ໄໝ​ທີ່​ຂຶ້ນ​ທະ­ບຽນ 37.980 ຄົນ ປັດ­ຈຸ­ບັນ​ມີ​ຜະ­ລິດ​ຕະ​ພັນ​ຂາຍ​ຫວຍ 2 ປະ­ເພດ ຄື:

ປະ­ເພດ​ຫວຍ​ພັດ­ທະ­ນາ ມີ​ຫວຍ​ເລກ 2 ໂຕ 3 ໂຕ 4 ໂຕ ເລກ​ສາມ​ນາມ​ສັດ 3/40 ຊື້​ຂາຍ​ແບບ​ທັນ​ສະ­ໄໝ ລະ­ບົບ​ໂປຣ​ແກມ​ຈຳ­ໜ່າຍ​ຫວຍ​ທັນ​ສະ­ໄໝ​ມີ 4 ລະ­ບົບ​ທີ່​ລົງ­ທຶນ​ຂອງ 4 ຕົວ​ແທນ ແລະ ສາ­ມາດ​ເລືອກ​ຊື້​ໄດ້​ຫຼາຍ​ຊ່ອງ​ທາງ ເປັນ­ຕົ້ນ ຂາຍ​ຜ່ານ​ແທັບ​ເລດ (Table) ຂາຍ​ຜ່ານ​ໂທລະ­ສັບ​ມື​ຖື (SMS) ຂາຍ​ຜ່ານ​ຕູ້​ເອ​ທີ​ເອັມ​ທະ­ນາ­ຄານ ນອກ​ນີ້ ຍັງ​ກະ­ກຽມ​ຂາຍ​ຕື່ມ 2 ຊ່ອງ​ທາງ ຄື:

ຂາຍ​ຜ່ານ​ຕູ້​ຂາຍ​ຫວຍ (Kiosk) ແລະ ຂາຍ​ຜ່ານ​ເຄືອ​ຄ່າຍ (POS) ຈາກ​ເມື່ອ​ກ່ອນ​ອອກ 3 ຄັ້ງ​ຕໍ່​ອາ­ທິດ ທ້າຍ​ປີ 2017 ໄດ້​ປັບ­ປຸງ​ມາ​ເປັນ 1 ຄັ້ງ​ຕໍ່​ອາ­ທິດ ອອກ​ທຸກໆ​ວັນ​ພຸດ.

6 ເດືອນ​ຕົ້ນ​ປີ 2019 ສ້າງ​ລາຍ​ຮັບ​ໄດ້ 25,85 ຕື້​ກີບ ເທົ່າ​ກັບ 109,20% ຂອງ​ແຜນ­ການ ລາຍ​ຈ່າຍ 8,96 ຕື້​ກີບ ກຳ­ໄລ 16,88 ຕື້​ກີບ ເທົ່າ​ກັບ 65,32% ຂອງ​ລາຍ​ຮັບ​ລວມ ປະ­ຕິ­ບັດ​ພັນ­ທະ​ເຂົ້າ​ງົບ ປະ­ມານ 14,48 ຕື້​ກີບ ສ່ວນ 6 ເດືອນ​ທ້າຍ​ປີ 2019 ຈະ​ສືບ­ຕໍ່​ປັບ­ປຸງ​ການ­ຈັດ­ຕັ້ງ​ປະ­ຕິ­ບັດ​ໃຫ້​ແທດ­ເໝາະ​ກັບ​ວຽກ​ງານ​ວິ­ຊາ​ສະ­ເພາະ​ແຕ່​ລະ​ໄລ­ຍະ ຄົ້ນ­ຄວ້າ​ສະ­ກັດ​ກັ້ນ​ມາດ​ຕະ­ການ​ຫວຍ​ເຖື່ອນ ຄົ້ນ­ຄວ້າ​ຜະ­ລິດ​ຕະ​ພັນ​ຫວຍ​ປະ­ເພດ​ອື່ນ​ທີ່​ເໝາະ​ສົມ ເພື່ອ​ເປັນ​ມາດ​ຕະ­ການ​ໃນ​ການ​ເພີ່ມ​ເຕີມ​ໃນ​ການ​ສະ­ກັດ​ກັ້ນ​ຫວຍ​ເຖື່ອນ ຄາດ​ຄະ­ເນ​ລາຍ​ຮັບ​ລວມ 23,67 ຕື້​ກີບ ລາຍ​ຈ່າຍ 9,15 ຕື້​ກີບ ກຳ­ໄລ 14,52 ຕື້​ກີບ ມອບ​ພັນ­ທະ​ງົບ­ປະ­ມານ 12,68 ຕື້​ກີບ ນອກ​ນີ້ ຍັງ​ໄດ້​ຮັບ​ຟັງ​ການ​ປະ­ກອບ​ຄຳ​ເຫັນ​ທີ່​ເປັນ​ສິ່ງ​ທ້າ​ທາຍ​ຕໍ່​ທຸ­ລະ​ກິດ​ຫວຍ​ພັດ­ທະ­ນາ ເປັນ­ຕົ້ນ ບັນ­ຫາ​ຫວຍ​ເຖື່ອນ (ອອກ​ທຸກ​ມື້) ຄ່າ​ຄອງ​ຊີບ​ສູງ ອັດ­ຕາ​ເງິນ​ເຟີ້ ແລະ ອື່ນໆ

ທ່ານ​ຮອງ​ນາ­ຍົກ ກໍ​ໄດ້​ຊີ້​ນຳ​ໃຫ້​ຄະ­ນະ​ສະ­ພາ​ບໍ­ລິ­ຫານ ຄະ­ນະ​ອຳ­ນວຍ​ການ ແລະ ພະ­ນັກ­ງານ​ບໍ­ລິ­ສັດ​ລັດ​ວິ​ສາ​ຫະ​ກິດ​ຫວຍ​ພັດ­ທະ­ນາ ສືບ­ຕໍ່​ແກ້​ໄຂ​ບັນ­ຫາ​ທີ່​ຄົງ​ຄ້າງ ຍົກ​ລະ­ດັບ​ພະ­ນັກ­ງານ​ໃຫ້​ມີ​ຄວາມ​ຮູ້-ຄວາມ​ສາ­ມາດ​ຕາມ​ຄວາມ​ຕ້ອງ­ການ​ຂອງ​ວຽກ​ງານ ເພື່ອ​ເຮັດ​ໃຫ້​ວຽກ​ງານ​ວິ­ຊາ​ສະ­ເພາະ​ໄປ​ສູ່​ລະ­ບົບ​ທັນ​ສະ­ໄໝ ເພື່ອ​ແຂ່ງ­ຂັນ​ກັບ​ພາກ​ເອ­ກະ​ຊົນ ຄະ­ນະ​ອຳ­ນວຍ​ການ ຫົວ­ໜ້າ​ພະ​ແນກ ແລະ ວິ­ຊາ​ການ ຕ້ອງ​ປຶກ­ສາ​ຫາ­ລື​ກັນ​ເຮັດ​ວຽກ​ຢ່າງ​ວ່ອງ­ໄວ ເພື່ອ​ເຮັດ​ໃຫ້­ການ​ດຳ­ເນີນ​ທຸ­ລະ​ກິດ​ປະ­ສົບ​ຜົນ­ສຳ­ເລັດ ສິ່ງ​ສຳ­ຄັນ​ການ​ດຳ­ເນີນ​ທຸ ລະ​ກິດ​ຕ້ອງ​ໂປ່ງ​ໃສ ແລະ ບໍ­ລິ­ການ​ດີ ເພື່ອ​ສ້າງ​ຄວາມ​ເຊື່ອ​ໝັ້ນ​ໃຫ້​ສັງ­ຄົມ.

ແຫຼ່ງຂໍ້ມູນ: ໜັງສືພິມວຽງຈັນໃໝ່