ຄາຣາວານສົ່ງເສີມແຫຼງທ່ອງທ່ຽວ ທີ່ພະແນກຖະແຫຼງຂ່າວ ວັດທະນະທໍາ ແລະ ທ່ອງທ່ຽວ ນະຄອນຫຼວງວຽງຈັນ ຮ່ວມກັບອົງການປົກຄອງເມືອງໄຊທານີ ໄດ້ຈັດຂຶ້ນໃນວັນທີ 23 ສິງຫາ 2019 ໄດ້ສໍາເລັດໄປດ້ວຍດີ.
ຈຸດປະສົງການຈັດຄາຣາວານລົດຄັ້ງນີ້ເພື່ອເປັນການສ້າງຂະບວນການຄໍານັບຮັບຕ້ອນກອງປະຊຸມໃຫຍ່ 3 ຂັ້ນຂອງເມືອງ ແລະ ພະ ແນກຖະແຫຼງຂ່າວ ວັດທະນະທໍາ ແລະ ທ່ອງທ່ຽວ ນະຄອນຫຼວງວຽງຈັນ ເປັນການສົ່ງເສີມການທ່ອງທ່ຽວລາວກໍຄືນະຄອນຫຼວງວຽງຈັນທ່ອງທ່ຽວນະຄອນຫຼວງວຽງຈັນ ແລະ ທັງເປັນການລະນຶກເຖິງວັນຍຶດອໍານາດ 23 ສິງຫາ ຄົບຮອບ 44 ປີ.
ນອກນັ້ນເພື່ອເປັນການຊອກຫາແຫຼງທ່ອງທ່ຽວພາຍໃນເມືອງໄຊທານີໃຫ້ມີລັກສະນະຍືນຍົງ ທັງເປັນການໂຄສະນາສົ່ງເສີມການທ່ອງ ທ່ຽວຂອງເມືອງໄຊທານີກໍຄືນະຄອນຫຼວງວຽງຈັນ ແນໃສ່ເປັນການຕ້ອນຮັບປີທ່ອງທ່ຽວລາວ-ຈີນ 2019 ນອກນີ້ເພື່ອສົ່ງເສີມການທ່ອງທ່ຽວພາຍໃນ ໂດຍການທ່ຽວຊົມບັນດາແຫຼງທ່ອງທ່ຽວທໍາມະຊາດ ວັດທະນະທໍາ ພູຜາປ່າໄມ້ ວັດທະນະທໍາຂອງປະຊາຊົນບັນດາເຜົ່າ ແລະ ອື່ນໆ ເຊິ່ງການທ່ອງທ່ຽວຄັ້ງນີ້ມີລົດເຂົ້າຮ່ວມຄາຣາວານທັງໝົດ 100 ກວ່າຄັນ.
ກິດຈະກໍາເທື່ອນີ້ແມ່ນໄດ້ທ່ຽວຊົມສະຖານທີ່ທ່ອງທ່ຽວທໍາມະຊາດ ເຊິ່ງປະກອບມີ ສະຖານທ່ອງທ່ຽວທໍາມະຊາດ ຕາດພັກຊ່ອຍວອຍ ຕາດຊາຍຂາວ ແລະ ຕາດວັງຫຼວງ.
ເຂົ້າຮ່ວມນປິດຈະກໍາຄັ້ງນີ້ມີ ທ່ານ ນາງ ວິໄລວອນ ຈັນທະລາຕີ ຫົວໜ້າພະແນກຖະແຫຼງຂ່າວ ວັດທະນະທໍາ ແລະ ທ່ອງທ່ຽວ ນະຄອນຫຼວງວຽງຈັນ ແລະ ທ່ານ ຄໍາປະດິດ ເຂັມມານິດ ເຈົ້າເມືອງໄຊທານີ ມີບັນດາພະແນກການ ຂະແໜງການກ່ຽວຂ້ອງອ້ອມຂ້າງນະຄອນຫຼວງວຽງຈັນເຂົ້າຮ່ວມເກືອບ 600 ຄົນ.
ແຫຼ່ງຂໍ້ມູນ: ໜັງສືພິມວຽງຈັນໃໝ່