ລັດຖະບານ ສ ເຢຍລະມັນ ປະກອບສ່ວນ 4 ລ້ານເອີໂຣ 38 ຕື້ກວ່າກີບ ເພື່ອຈັດຕັ້ງປະ ຕິບັດ ໂຄງການພັດທະນາ ອະຊີວະສຶກສາ ສປປ ລາວ ໄລຍະທີ 2 (VELA) ໂດຍການສະຫນັບສະຫນູນ ຍົກລະດັບຄວາມສາມາດ ແລະ ໂຄງຮ່າງການຈັດຕັ້ງ ຂອງບັນດາວິທະຍາໄລເຕັກນິກ-ວິຊາຊີບ ໃຫ້ກາຍເປັນວິທະ ຍາໄລຕົວແບບຄວບຄູ່ ແລະ ມີຄວາມສອດຄ່ອງຫລາຍຂຶ້ນ, ທັງສາມາດຕອບສະໜອງຄວາມຕ້ອງ ການຂອງຕະຫລາດ ແຮງງານລາວໄດ້ໄວກວ່າເກົ່າ.
ພ້ອມນັ້ນ ຕ້ອງປັບປຸງ ຄຸນນະພາບ ດ້ານການບໍລິການ ບັນດາວິທະຍາໄລດັ່ງກ່າວ ໃຫ້ກາຍເປັນຕົວແບບ ແກ່ໂຮງຮຽນວິຊາຊີບໃນແຂວງອື່ນໆ ເຊິ່ງໂຄງ ການນິີ້ ໄດ້ເລີ່ມມາແຕ່ຕົ້ນປີ 2019 ຈົນຮອດ ຕົ້ນປີ 2022.
ການລົງນາມອະນຸມັດທຶນຊ່ວຍເຫລືອ ຄັ້ງນີ້ ໄດ້ມີຂຶ້ນໃນວັນທີ 23 ສິງຫາ 2019 ທີ່ໂຮງແຮມ ຄຣາວພາຊາ ນະຄອນຫລວງວຽງຈັນ ລະຫວ່າງທ່ານ ໜູພັນ ອຸດສາ ຫົວໜ້າກົມອະຊີວະສຶກສາ ກະຊວງສຶກສາທິການ ແລະ ກິລາ ກັບທ່ານ ເລັກແຊນເດີ ມົນເດີນ ຫົວຫນ້າໂຄງການ VELA ອົງການຮ່ວມມືເຢຍລະມັນ, ໂດຍການເຂົ້າຮ່ວມ ເປັນສັກຂີພິຍານຂອງທ່ານ ກິແກ້ວ ຈັນທະບູລີ ຮອງລັດຖະມົນຕີກະ ຊວງແຜນການ ແລະ ການລົງທຶນ, ທ່ານ ເຢນ ລຸດເຄນແຮມ ເອກອັກຄະລັດ ຖະທູດເຢຍລະມັນ ປະຈຳ ສປປ ລາວ ແລະ ມີບັນດາ ພະນັກງານທີ່ກ່ຽວຂ້ອງເຂົ້າຮ່ວມ.
ນັບແຕ່ປີ 2014 ເປັນຕົ້ນມາ ໂຄງການ VELA ໄດ້ໃຫ້ການສະໜັບສະໜູນ ວິທະຍາໄລອະຊີວະສຶກສາ ຈຳນວນ 6 ແຫ່ງ ແລະ ບໍລິສັດ ຄູ່ຮ່ວມງານຈຳນວນ 50 ແຫ່ງ ຢູ່ແຂວງຈຳປາສັກ, ຫລວງພະບາງ, ຄຳມ່ວນ,ແຂວງວຽງຈັນ ແລະ ນະຄອນຫລວງວຽງຈັນ ເຊິ່ງໄດ້ພັດທະນາ ແລະ ໄດ້ທົດລອງຈັດຕັ້ງປະຕິບັດ ຫລັກສູດ ອະຊີວະສຶກສາ ແບບຄວບຄູ່ ໃນ 3 ສາຂາ ຄື:
ກະສິກຳ, ບໍລິການອາຫານ/ເຄື່ອງດື່ມ ແລະ ປຸງແຕ່ງອາຫານແບບມືອາຊີບ ແລະ ຊ່າງສ້ອມແປງລົດຍົນ.
ຂ່າວ: ມະນີທອນ-ພາບ:ເກດ ສຳນັກຂ່າວສານປະເທດລາວ