ສະພາບນໍ້າຖ້ວມຢູ່ເມືອງຈຳພອນແຂວງສະຫວັນນະເຂດຍັງໜ້າເປັນຫ່ວງ, ນໍ້າຍັງສືບຕໍ່ຍື່ງຂຶ້ນ, ເຂດເທສະບານເມືອງລະດັບນໍ້າທຽບໃສ່ເວລາຫົວຄໍ່າວານນີ້ເພີ່ມຂຶ້ນບໍ່ໜ້ອຍກວ່າ10 ຊັງຕີແມັດ, ປະຊາຊົນສືບຕໍ່ຍົກຍ້າຍອອກຈາກເຮືອນຂອງເຂົາເຈົ້າທີ່ຖືກນໍ້າຖ້ວມຂຶ້ນໄປຢູ່ບ່ອນສູງ, ທັງບ່ອນທີ່ທາງອໍານາດການປົກຄອງຈັດໃຫ້ແລະນໍາເຮືອນພີ່ນ້ອງທີ່ຢູ່ເຂດໃກ້ຄຽງ.
ຕາມການໃຫ້ສຳພາດຂອງທ່ານຄຳລຸຍ ຍາດຕິວົງ ເຈົ້າເມືອງຈຳພອນໃນມື້ວານນີ້ຮູ້ວ່າ:
ເມືອງຈຳພອນ ຖືກນໍ້າຖ້ວມບ້ານ17 ບ້ານ, ຖືກ, ມີ12 ບ້ານເສັ້ນທາງເຂົ້າບ້ານທຽວບໍ່ໄດ້, ຖ້ວມທົ່ງນາຢູ່ເກືອບ50 ບ້ານ. ເນື້ອທີ່ນາເສຍຫາຍ. ຍັງປະເມີນມູນຄ່າບໍ່ໄດ້. ວຽກຮີບດ່ວນຍັງແມ່ນການຊ່ວຍເຫລືອຍົກຍ້າຍປະຊາຊົນອອກຈາກເຂດນໍ້າຖ້ວມໄປຢູ່ບ່ອນປອດໄພ.
ຄວາມຕ້ອງການການຊ່ວຍເຫລືືອສຸກເສີນນີ້ຍັງແມ່ນປະເພດອາຫານແຫ້ງທີ່ພ້ອມກິນໄດ້ເລີຍ, ລວມເຖິງເຂົ້າ, ນໍ້າ, ສິ່ງຂອງເຄື່ອງໃຊ້ຈຳເປັນອື່ນໆ ພ້ອມທັງເຮືອ ( ຖ້າເປັນເຮືອຈັກຕ້ອງການພ້ອມຄົນຂັບ) ແລະອື່ນໆ.
ສຳລັບມື້ນີ້, ແຕ່ເຊົ້າເລີ່ມແຕ່6 ໂມງ, ທີ່ບ່ອນຂົນເຄື່ອງບ້ານແກ້ງກອກທົ່ງ, ປະຊາຊົນທະຍອຍຂົນເຄື່ອງຕົນເອງຂຶ້ນໄປຢູ່ບ່ອນປອດໄພ. ຄອບຄົວລຸງ ຄຳຜວນຟອງສີຫາລາດ ໄວ 70 ປີ ບ້ານແກ້ງກອກເໜືອເຊິ່ງມີສະມາຊິກຄອບຄົວ 7 ຄົນ ກໍ່ແມ່ນອີກຄອບຄົວທິ່ເຮືອນຖືກນໍ້າຖ້ວມພວມຂົນເຄື່ອງຍ້າຍໄປຢູ່ເຮືອນອີກຫລັງໜຶ່ງທີ່ບ້ານນາຄູຕັ້ງຢູ່ຫ່າງຈາກເຂດນໍ້າຖ້ວມເກືອບ10 ກິໂລແມັດ.
ຄອບຄົວລຸງຄຳຜວນ ຖືວ່າໄດ້ມີການຂົນເຄື່ອງຂອງອອກເຮືອນແຕ່ຫົວທີ, ແຕ່ກໍ່ຍັງມີເຄື່ອງຈໍານວນຫລາຍທີ່ຂົນອອກບໍ່ທັນຍ້ອນນໍ້າມາໄວສົມຄວນແລະຜ່ານມາກໍ່ບໍ່ມີປະສົບການຊີວິດໃນການໜີໃນການຫລົບໜີນໍ້າຖ້ວມ.
ແຫຼ່ງຂໍ້ມູນ: ສຳນັກຂ່າວສານປະເທດລາວ