ພິທີລົງນາມບົດບັນທຶກຄວາມເຂົ້າໃຈ ວ່າດ້ວຍການຮ່ວມມືໃນວຽກງານເຝີກອົບຮົມສຳລັບນັກການທູດ ຈັດຂຶ້ນຢູ່ກະຊວງການຕ່າງປະເທດ ລະຫວ່າງທ່ານ ຄຳສວຍ ແກ້ວດາ ລາວົງ ຫົວໜ້າສະຖາບັນການຕ່າງປະເທດ ແລະ ທ່ານ Dinkar n Asthana ເອກອັກຄະລັດຖະທູດແຫ່ງສາທາລະນະລັດ ອິນເດຍປະຈຳລາວ ມີທ່ານ ແສງເພັດ ຮຸ່ງບຸນຍວງ ຮອງລັດຖະມົນຕີກະຊວງການຕ່າງປະເທດ ແລະ ພາກສ່ວນກ່ຽວຂ້ອງສອງຝ່າຍເຂົ້າຮ່ວມ.
ການລົງນາມຄັ້ງນີ້ ເປັນການຮັດແໜ້ນ ແລະ ເສີມຂະຫຍາຍສາຍພົວພັນຮ່ວມມືມິດຕະພາບ ລະ ຫວ່າງ ລາວ-ອິນເດຍ ໂດຍສະເພາະ ການຊຸກຍູ້ສົ່ງເສີມການຮ່ວມມືລະຫວ່າງສອງສະຖາບັນການຕ່າງ ປະເທດ ລາວ-ອິນເດຍ ເພື່ອສ້າງຂີດຄວາມສາມາດໃນການປະຕິບັດວຽກງານ ກໍຄື ການພັດທະນານັກການທູດໃຫ້ມີຄວາມເຂັ້ມແຂງ ເປັນຕົ້ນ ການຈັດເຝິກອົບຮົມວຽກງານການທູດ ການຄົ້ນຄວ້າ ການສົ່ງ ເສີມ ແລະ ແລກປ່ຽນຊ່ຽວຊານ ນັກວິຊາການ ແລະອື່ນໆ.
ລາວ-ອິນເດຍ ໄດ້ສ້າງຕັ້ງສາຍພົວພັນການທູດນຳກັນ ປີ 1956 ນັບແຕ່ນັ້ນມາສາຍພົວພັນສອງ ປະເທດໄດ້ຮັບການພັດທະນາຢ່າງຕໍ່ເນື່ອງ ອິນເດຍໄດ້ໃຫ້ການສະໜັບສະໜູນລາວທຸກຂົງເຂດວຽກງານໃນເວທີພາກພື້ນ ແລະ ສາກົນ ສອງປະເທດໄດ້ມີການແລກປ່ຽນຢ້ຽມຢາມໃນລະດັບຕ່າງໆເປັນປົກກະຕິ ແລະ ມີການຮ່ວມມືກັນຢູ່ຫຼາຍຂະແໜງ ພ້ອມນັ້ນ ຍັງໄດ້ສ້າງຕັ້ງຄະນະກຳມາທິການຮ່ວມວ່າດ້ວຍການຮ່ວມມືສອງຝ່າຍ ລາວ-ອິນເດຍ ເຊິ່ງທຸກສອງປີຈະຜັດປ່ຽນກັນເປັນເຈົ້າພາບ ເພື່ອຄົ້ນ ຄວ້າການຮ່ວມມືໃນແຕ່ລະຂົງເຂດວຽກງານຂອງສອງປະເທດ.
ແຫຼ່ງຂໍ້ມູນ: ໜັງສືິມວຽງຈັນໃໝ່