ບໍລິສັດບີເຄເອັນ ຈຳກັດ ຈັດພິທີມອບລາງວັນໃຫ້ຄອບຄົວດີເດັ່ນໃນການສ້າງຂະບວນການປູກເສີມ ແລະ ປົກຮັກຮັກສາໄມ້ຕີ້ວ ຄຽງຄູ່ກັບປ່າໄມ້ທຳມະຊາດໃນດິນຄຸ້ມຄອງປະຊາຊົນເຂດເມືອງທ່າພະບາດ ແຂວງບໍລິຄຳໄຊ ປະຈຳສົກປີ 2018-2019 ຂຶ້ນຢູ່ບ້ານຫ້ວຍເລິກ ເມືອງທ່າພະບາດ ໂດຍມີທ່ານ ບົວລີ ພະເມືອງ ຮອງຫົວໜ້າກົມປ່າໄມ້ ກະຊວງກະສິກຳ ແລະ ປ່າໄມ້ ທ່ານ ບຸນອູ້ມ ພັນທະປັນຍາ ຜູ້ອຳນວຍການບໍລິສັດບີເຄເອັນ ຈຳກັດ ປະທານກຸ່ມຜູ້ຜະລິດຖ່ານຂາວເພື່ອສົ່ງອອກ ແລະ ພາກສ່ວນກ່ຽວຂ້ອງເຂົ້າຮ່ວມ.
ທ່ານ ບຸນອູ້ມ ພັນທະປັນຍາ ກ່າວວ່າ: ຜ່ານການລົງຕິດຕາມກວດກາ ແລະ ເກັບກຳຂໍ້ມູນລະອຽດຂອງຄະນະກຳມະການ ເຊິ່ງປະກອບມີໜ່ວຍງານປ່າໄມ້ ອຳນາດການປົກຄອງບ້ານ ເຈົ້າຂອງສວນ ແລະ ຕາງໜ້າບໍລິສັດບີເຄເອັນ ຈຳກັດ ສົກປີ 2018-2019 ມີປະຊາຊົນທີ່ໄດ້ຖືກຄັດເລືອກໃຫ້ເປັນຄອບຄົວຕົວແບບ ແລະ ດີເດັ່ນໃນການປູກເສີມ ປົກປັກຮັກສາ ແລະ ບູລະນະສວນປ່າໄມ້ຕີ້ວ ຄຽງຄູ່ກັບປ່າໄມ້ທຳມະຊາດໃນດິນຄຸ້ມຄອງຂອງຕົນ ຢູ່ເມືອງທ່າພະບາດ 53 ຄອບຄົວ ເນື້ອທີ່ 58,87 ເຮັກຕາ ເປັນເງິນ 58 ລ້ານກວ່າກີບ ໃນນີ້ ເດັ່ນປະເພດ 1 ມີ 4 ຄອບຄົວ ປະເພດ 2 ມີ 10 ຄອບຄົວ ປະເພດ 3-4 ປະເພດລະ 12 ຄອບຄົວ ປະເພດ 5 ມີ 9 ຄອບຄົວ ແລະ ປະເພດ 6 ມີ 4 ຄອບຄົວ ເຊິ່ງແຕ່ລະຄອບຄົວ ແມ່ນໄດ້ຮັບເງິນລາງວັນຂອງແຕ່ລະປະເພດຕາມລຳດັບ.
ຂະບວນການປູກເສີມ ແລະ ປົກປັກຮັກສາໄມ້ຕີ້ວ ໄດ້ເລີ່ມແຕ່ສົກປີ 2007-2008 ແລະ ເກີດຂຶ້ນຄັ້ງທຳອິດຢູ່ເມືອງທ່າພະບາດ ປັດຈຸບັນກຸ່ມຜູ້ຜະລິດຖ່ານຂາວເພື່ອສົ່ງອອກ ມີສະມາຊິກເຂົ້າຮ່ວມໂຄງການ 344 ຄອບຄົວ 3 ອົງກອນ ແລະ 2 ເນື້ອທີ່ຂອງບໍລິສັດໃນທົ່ວປະເທດ ເນື້ອທີ່ 1.803,71 ເຮັກຕາ ທຽບໃສ່ປີຜ່ານມາ ເພີ່ມຂຶ້ນ 30,18% ໃນນີ້ ມີທະບຽນສວນຟື້ນຟູ ສວນປູກ 540,42 ເຮັກຕາ ທຽບໃສ່ປີຜ່ານມາ ເພີ່ມຂຶ້ນ 53,62% ເພື່ອເຮັດໃຫ້ຄາດໝາຍເນື້ອທີ່ສີຂຽວປົກຫຸ້ມ 70% ທົ່ວປະເທດ ໃນປີ 2020.
ໄລຍະຜ່ານມາກຸ່ມບໍລິສັດຜູ້ຜະລິດຖ່ານຂາວເພື່ອສົ່ງອອກ ໄດ້ປະກອບສ່ວນໃນການຈັດຕັ້ງປະຕິບັດຍຸດທະສາດດັ່ງກ່າວ ດ້ວຍການເຮັດສັນຍາຜູກພັນກັບປະຊາຊົນຜູ້ທີ່ມີດິນປ່າ ເພື່ອໃຫ້ເຈົ້າຂອງດິນປູກເສີມ ປົກປັກຮັກສາໄມ້ຕີ້ວ ຄຽງຄູ່ກັບປ່າໄມ້ທຳມະຊາດໃນເນື້ອທີ່ດິນຄຸ້ມຄອງຂອງປະຊາຊົນໃນຮູບແບບ 2+3 ປະກອບສ່ວນເຮັດໃຫ້ປະຊາຊົນມີລາຍຮັບຈາກການຂາຍໄມ້ຕີ້ວ ແກ້ໄຂຄວາມທຸກຍາກ ບໍລິສັດມີວັດຖຸດິບໄວ້ປ້ອນໂຮງງານ ແລະ ອື່ນໆ ນອກນີ້ ບໍລິສັດບີເຄເອັນຈຳກັດ ຍັງໄດ້ມອບໂຕະ-ຕັ່ງ 60 ໜ່ວຍ ມູນຄ່າ 5 ລ້ານກີບ ໃຫ້ຫ້ອງການບ້ານຫ້ວຍເລິກ ແລະ ເຄື່ອງບໍລິໂພກ-ອຸປະໂພກຈຳນວນໜຶ່ງໃຫ້ຫ້ອງການກະສິກຳ ແລະ ປ່າໄມ້ ເມືອງທ່າພະບາດ ເພື່ອນຳໄປຊ່ວຍເຫຼືອຜູ້ໄດ້ຮັບຜົນກະທົບຈາກໄພນ້ຳຖ້ວມ ຕື່ມອີກ.
ແຫຼ່ງຂໍ້ມູນ: ໜັງສືພິມວຽງຈັນໃໝ່