ນະຄອນຫຼວງວຽງຈັນ ໄດ້ເປັນເຈົ້າພາບຈັດກອງປະຊຸມທ່ອງທ່ຽວບັນດາປະເທດລຸ່ມແມ່ນ້ຳຂອງຄັ້ງທີ 5 ຂຶ້ນວັນທີ 14 ຕຸລາ 2019 ທີ່ ໂຮງແຮມແມ່ຂອງລີເວີໄຊ ໂດຍເປັນປະທານຂອງທ່ານ ສິນລະວົງ ຄຸດໄພທູນ ເຈົ້າຄອງນະຄອນຫຼວງວຽງຈັນ ເປັນກຽດເຂົ້າຮ່ວມຂອງທ່ານ ອຸ່ນທວງ ຂາວພັນ ຮອງລັດຖະມົນຕີກະຊວງຖະແຫຼງຂ່າວ ວັດທະນະທຳ ແລະ ທ່ອງທ່ຽວ ພ້ອມດ້ວຍຄະນະຜູ້ແທນຈາກ 5 ນະຄອນປະເທດລຸ່ມແມ່ນ້ຳຂອງ ປະກອບມີ: ນະຄອນພະນົມເປັນ ລາຊະອານາຈັກກຳປູເຈຍ ນະຄອນ ຫຼວງວຽງຈັນ ສປປ ລາວ ນະຄອນຢາງກຸ້ງ ມຽນມາ ນະຄອນຫຼວງບາງກອກ ປະເທດໄທ ນະຄອນໂຮ່ຈີມິງ ສສ ຫວຽດນາມ ພ້ອມດ້ວຍ ຕາງໜ້າຈາກພາກລັດ-ເອກະຊົນ ທຸຕານຸທູດ ເຂົ້າຮ່ວມ.
ທ່ານ ສິນລະວົງ ຄຸດໄພທຸນ ໄດ້ກ່າວວ່າ:
ກອງປະຊຸມທ່ອງທ່ຽວ 5 ນະຄອນບັນດາປະເທດລຸ່ມແມ່ນ້ຳຂອງ 4 ຄັ້ງຜ່ານມາແມ່ນມີຜົນສຳເລັດເປັນຢ່າງດີ ເຮັດໃຫ້ບັນດານະຄອນປະເທດລຸ່ມແມ່ນ້ຳຂອງມີຄວາມໃກ້ຊິດກັນຫຼາຍຂຶ້ນ ໄດ້ມີການແລກປ່ຽນບົດຮຽນນຳກັນ ຕໍ່ກັບແນວທາງການພັດທະນາການທ່ອງທ່ຽວແບບເຊື່ອມຕໍ່ ແລະ ການທ່ອງທ່ຽວແບບຍືນຍົງ.
ສຳລັບກອງປະຊຸມທ່ອງທ່ຽວ 5 ນະຄອນປະເທດລຸ່ມແມ່ນ້ຳຂອງໃນຄັ້ງນີ້ ເຈົ້າໜ້າທີ່ອາວຸໂສໄດ້ເລືອກເອົາຄຳຂວັນ ຫຼື ຫົວຂໍ້ລວມທີ່ວ່າ ຄວາມເປັນໜຶ່ງດຽວໃນການເຊື່ອມໂຍງການຮ່ວມມືດ້ານການທ່ອງທ່ຽວ ເຊິ່ງປະກອບມີ 4 ຫົວຂໍ້ຄື:
ການເຊື່ອມໂຍງຜະລິດຕະພັນການທ່ອງທ່ຽວ ການເຊື່ອມໂຍງກິດຈະກຳໂຄສະນາການທ່ອງທ່ຽວ ການເຊື່ອມໂຍງການພັດທະນາບຸຄະລາກອນການທ່ອງທ່ຽວ ການເຊື່ອມໂຍງການເປັນເຈົ້າການດ້ານການທ່ອງທ່ຽວ ເຊິ່ງເບິ່ງລວມແລ້ວຄຳຂວັນ ແລະ ຫົວຂໍ້ກອງປະຊຸມຄັ້ງນີ້ ແມ່ນສອດຄ່ອງກັບຄວາມຮຽກຮ້ອງຕ້ອງການຂອງບັນດານະຄອນ ທັງສອດຄ່ອງກັບນະໂຍບາຍເຊື່ອມໂຍງອາຊຽນ ແລະ ແຜນປະຕິບັດງານໃນຂອບການທ່ອງທ່ຽວຂອງປະເທດລຸ່ມແມ່ນ້ຳຂອງທີ່ລັດຖະບານຂອງປະເທດເຮົາໄດ້ກຳນົດເອົາ.
ຄຽງຄູ່ກັນນັ້ນ ກອງປະຊຸມຄັ້ງນີ້ໄດ້ຈັດຂຶ້ນກົງກັບງານບຸນອອກພັນສາ ແລະ ຊ່ວງເຮືອປະຈຳປີ 2019 ຂອງຊາວນະຄອນຫຼວງວຽງຈັນ ເຊິ່ງເປັນງານບຸນປະເພນີທີ່ສຳຄັນໜຶ່ງຂອງຊາດ ແລະ ຕິດພັນກັບແມ່ນ້ຳຂອງທີ່ເປັນສັນຍະລັກແຫ່ງການຮ່ວມມືຂອງ 5 ນະຄອນ ທັງເປັນການຊຸກຍູ້ສົ່ງເສີມການພັດທະນາວຽກງານທ່ອງທ່ຽວສີຂຽວ ສະອາດ ແລະ ຍືນຍົງ ສອດຄ່ອງຕາມຍຸດທະສາດການເຕີບໂຕສີຂຽວຂອງລັດຖະບານ ກໍຄື ມາດຖານເງື່ອນໄຂເມືອງທ່ອງທ່ຽວສະອາດຂອງອາຊຽນ.
ກອງປະຊຸມຄັ້ງນີ້ ໄດ້ລົງນາມຮ່ວມກັນຈັດຕັ້ງປະຕິບັດເນື້ອໃນກອງປະຊຸມທ່ອງທ່ຽວບັນດາປະເທດລຸ່ມແມ່ນ້ຳຂອງຄັ້ງທີ 5 ໃນນັ້ນ ໄດ້ເຫັນດີຮ່ວມກັນສ້າງຜະລິດຕະພັນການທ່ອງທ່ຽວເຊື່ອມຕໍ່ສົ່ງເສີມສະໜັບສະໜູນກິດຈະກຳທ່ອງທ່ຽວຮ່ວມກັນ ແລກປ່ຽນຂໍ້ມູນຂ່າວສານທີ່ຮັບໃຊ້ເປັນພື້ນຖານຂອງການທ່ອງທ່ຽວ ແລກປ່ຽນບົດຮຽນໃນການສ້າງມາດຕະຖານການບໍລິການໃຫ້ເປັນອັນລວມ ສ້າງມາດຕະຖານປົກປັກຮັກສາມໍລະດົກທາງດ້ານວັດທະນະທຳ ແລະ ທຳມະຊາດ ແລະ ວິທີການຈັດມາດຕະຖານລະດັບຊາດ ມາດຕະຖານທ່ອງທ່ຽວອາຊຽນ ແລະ ຊຸມຊົນ.
ທັງຮ່ວມກັນພັດທະນາ ແລະ ສ້າງເສັ້ນທາງທ່ອງທ່ຽວໃໝ່ຢ່າງໜ້ອຍ 2 ຕົວເມືອງພາຍໃນ 5 ນະຄອນ ສະມາຊິກຕ້ອງລວມສູນ ເພີ່ມທະວີການຮ່ວມມືຟື້ນຟູມໍລະດົກວັດທະນະທຳ ແລະ ການແລກປ່ຽນບັນດາໂຄງການເຝິກອົບຮົມ ແລະ ແບບແຜນ ຮູບແບບ ການຟື້ນຟູມໍລະດົກ ວັດທະນະທຳ ຕົກລົງແຜນການປະຕິບັດການຮ່ວມມືດ້ານການທ່ອງທ່ຽວລະຫວ່າງບັນດານະຄອນລຸ່ມແມ່ນ້ຳຂອງດ້ານການທ່ອງທ່ຽວ 2018-2020 ສຳລັບເຈົ້າພາບກອງປະຊຸມທ່ອງທ່ຽວ 5 ປະເທດລຸ່ມນ້ຳຂອງຄັ້ງທີ 6 ໃນປີ 2020 ໂດຍໄດ້ຮັບການເປັນເຈົ້າພາບຂອງນະຄອນໂຮ່ຈິມິງ ສສ ຫວຽດນາມ.
ແຫຼ່ງຂໍ້ມູນ: ໜັງສືພິມວຽງຈັນໃໝ່
