ເພື່ອຊຸກຍູ້-ສົ່ງເສີມຊາວສວນ ໂດຍສະເພາະ ຊາວສວນເມືອງປາກຊ່ອງ ແຂວງຈຳປາສັກ ປູກກາເຟນ້ອຍ (ສາຍພັນຕີປີກ້າ) ໃຫ້ຫຼາຍຂຶ້ນ ທັງສາມາດຮັບປະກັນດ້ານປະລິມານ ຄຸນນະພາບ ມີຄວາມຍືນຍົງ ແລະ ສາມາດສ້າງລາຍຮັບໃຫ້ເຂົາເຈົ້ານັບມື້ຫຼາຍຂຶ້ນ ບໍລິສັດ GP Lao ຈຶ່ງໄດ້ຮ່ວມມືກັບສະຫະກອນຊາວສວນໃຈກາເຟ ເພື່ອຊຸກຍູ້ການປູກກາເຟສາຍພັນຕີປີກ້າໃຫ້ຫຼາຍຂຶ້ນ ເນື່ອງຈາກເປັນສາຍພັນທີ່ຕະຫຼາດຕ່າງປະເທດຕ້ອງການສູງ ແລະ ມີລາຄາແພງກວ່າສາຍພັນອື່ນ.
ພິທີລົງນາມເປີດໂຄງການຮ່ວມມືສົ່ງເສີມກາເຟໃຫ້ຍືນຍົງ ຈັດຂຶ້ນວັນທີ 1 ພະຈິກ 2019 ຢູ່ສະຫະກອນຊາວສວນໃຈກາເຟ ບ້ານພູໂອຍ ເມືອງປາກຊ່ອງ ແຂວງຈຳປາສັກ ລະຫວ່າງທ່ານ ບຸນເອື້ອນ ສີລາເພັດ ປະທານສະຫະກອນຊາວສວນໃຈກາເຟ ແລະ ທ່ານ Kazuaki Takemura ປະທານຜູ້ບໍລິຫານບໍລິສັດ GP Lao ໂດຍມີທ່ານ ວິຈິດ ແກ້ວບົວພາ ເຈົ້າເມືອງປາກຊ່ອງ ທ່ານ ຄຳເພັດ ພອນແກ້ວ ຜູ້ອຳນວຍການ ບໍລິສັດ GP Lao ພ້ອມດ້ວຍພາກສ່ວນກ່ຽວຂ້ອງ ເຂົ້າຮ່ວມ.
ທ່ານ Kazuaki Takemura ໃຫ້ສຳພາດວ່າ:
ປັດຈຸບັນ ການປູກກາເຟສາຍພັນຕີປີກ້າ ຢູ່ປະເທດຕ່າງໆທົ່ວໂລກ ມີທ່າອ່ຽງຫຼຸດລົງ ແຕ່ກາເຟສາຍພັນດັ່ງກ່າວມີລົດຊາດແຊບ ກິ່ນຫອມ ແລະ ເປັນທີ່ຕ້ອງການຫຼາຍຈາກຕະຫຼາດຕ່າງປະເທດ ຈຶ່ງຢາກສ້າງໃຫ້ປະເທດລາວ ໂດຍສະເພາະ ເຂດເມືອງປາກຊ່ອງ ປູກກາເຟສາຍພັນດັ່ງກ່າວ ໃຫ້ມີຄຸນນະພາບລະດັບສາກົນ ແລະ ມີຄວາມຍືນຍົງ ເນື່ອງຈາກເປັນເຂດທີ່ມີຄວາມອຸດົມສົມບູນດ້ານທຳມະຊາດ.
ພ້ອມນີ້ ພວກເຮົາຍັງໄດ້ກຳນົດລາຄາຊື້-ຂາຍທີ່ສົມເຫດສົມຜົນ ເນື່ອງຈາກມີຕະຫຼາດຮອງຮັບທີ່ແນ່ນອນ ສຳລັບປີທຳອິດນີ້ ພວກເຮົາຈະສະໜອງເບ້ຍກາເຟສາຍພັນຕີປີກ້າ 111.000 ເບ້ຍ ໃຫ້ຊາວສວນນຳໄປປູກໃຫ້ໄດ້ຄຸນນະພາບ ຈາກນັ້ນ ຈຶ່ງຈະຂະຫຍາຍຂຶ້ນເລື້ອຍໆ ເພື່ອຮອງຮັບຄວາມຕ້ອງການຂອງຕະຫຼາດ ແນໃສ່ໃຫ້ຊາວສວນມີລາຍຮັບ ແລະ ເຮັດໃຫ້ຊີວິດການເປັນຢູ່ຂອງເຂົາເຈົ້ານັບມື້ດີຂຶ້ນ.
ແຫຼ່ງຂໍ້ມູນ: ນສພ ວຽງຈັນໃໝ່