ທີ່ສູນກາງແນວລາວສ້າງຊາດ (ສນຊ) ໄດ້ຮ່ວມກັບ ກຸ່ມບໍລິສັດ ກວາງໄຊ ໄດ້ປຶກສາຫາລືກ່ຽວກັບແຜນການທີ່ຈະສ້າງສວນວັດທະນະທໍາສາສະໜາພຸດ ໃນເຂດປາກຊ່ອງ ພູພຽງບໍລິເວນ ເປັນກຽດເຂົ້າຮ່ວມຂອງທ່ານ ຮສ. ດຣ ສົມອົກ ກິ່ງສະດາ ຮອງປະທານ ສນຊ ຜູ້ຊີ້ນໍາວຽກງານສາສະໜາ, ມີທ່ານ ຫຼີ່ລ້ຽງຈົງ ຮອງປະທານ ກຸ່ມບໍລິສັດ ຈີນ ກວາງໄຊ່ ພ້ອມດ້ວຍຄະນະ, ມີຜູ້ຕາງໜ້າມາຈາກ ອົງການສູນກາງພຸດທະສາສະໜາສໍາພັນລາວ, ສະພາແຫ່ງຊາດ, ກະຊວງພາຍໃນ ແລະ ພະນັກງານກົມສາສະໜາ ສນຊ ເຂົ້າຮ່ວມ.
ຈຸດປະສົງໃນການປຶກສາຫາລືຄັ້ງນີ້, ທ່ານ ຫຼີ່ລ້ຽງຈົງ ຮອງປະທານ ກຸ່ມບໍລິສັດ ຈີນ ກວາງໄຊ່ ໄດ້ໃຫ້ຮູ້ວ່າ: ກຸ່ມບໍລິສັດ ກວາງໄຊ ໄດ້ເຊັນບົດບັນທຶກຄວາມເຂົ້າໃຈ MOU ຮ່ວມກັບກະຊວງແຜນການ ແລະ ການລົງທຶນ ໃນຊຸມປີຜ່ານແລ້ວ.
ເຊິ່ງມີແຜນການຈະກໍ່ສ້າງເຂດສວນວັດທະນະທໍາ ສາສະໜາພຸດ ໃນເຂດເມືອງປາກຊ່ອງ ພູພຽງບໍລິເວນ ແລະ ບົດບັນທຶກຄວາມເຂົ້າໃຈ MOU ດ້ານການກໍ່ສ້າງສະໜາມບິນສາກົນ ເຂດພູພຽງບໍລິເວນ ເພື່ອເປັນການກະກຽມໃນການຈັດຕັ້ງປະຕິບັດກອງປະຊຸມພຸດທະສາສະໜາໂລກໃນຕໍ່ໜ້າ ແລະ ເປັນການເສີມຂະຫຍາຍການທ່ອງທ່ຽວ ລາວ-ຈີນ, ເພື່ອກາບໄວ້ສັກກາລະບູຊາ ແລະ ຂໍພອນ,
ພ້ອມກັນນີ້, ທ່ານໄດ້ສະເໜີ ປຶກສາຫາລືຂໍຂໍ້ມູນ ທາງດ້ານວຽກງານສາສະໜາເພື່ອປະກອບເຂົ້າໃນບົດວິພາກ, ກອງປະຊຸມດັ່ງກ່າວຜູ້ເຂົ້າຮ່ວມກອງປະຊຸມໄດ້ປຶກສາຫາລືແລກປ່ຽນບົດຮຽນຢ່າງກົງໄປກົງມາຕໍ່ກັບຂໍ້ສະເໜີດັ່ງກ່າວ.
ໃນໂອກາດນີ້, ທ່ານ ຮສ. ດຣ ສົມອົກ ກິ່ງສະດາ ໄດ້ມີບາງຄໍາເຫັນວ່າ:
ກ່ອນອື່ນຂໍສະແດງຄວາມຊົມເຊີຍຕໍ່ກຸ່ມບໍລິສັດ ກວາງໄຊ ທີ່ໄດ້ເອົາໃຈໃສ່ໃນການຄົ້ນຄວ້າ ແລະ ກະກຽມເນື້ອໃນເອກະສານຕ່າງໆ ເພື່ອຈະສ້າງເຂດສວນວັດທະນະທໍາ ສາສະໜາພຸດດັ່ງກ່າວນັ້ນ,
ຂ້າພະເຈົ້າຕາງໜ້າໃຫ້ສູນກາງແນວລາວສ້າງຊາດຈະສະໜອງຂໍ້ມູນກ່ຽວກັບວຽກງານສາສະໜາໃນຂົງເຂດສູນ ກາງແນວລາວສ້າງຊາດຮັບຜິດຊອບ ເພື່ອເປັນປະໂຫຍດປະກອບສ່ວນເຂົ້າໃນໂຄງການ ໂດຍພື້ນຖານກໍ່ເຫັນດີນໍາ ສ່ວນການຈະສ້າງສວນວັດທະນະທໍາ ສາສະໜາພຸດນີ້ ສົມທົບກັບພາກສ່ວນທີ່ກ່ຽວຂ້ອງຕື່ມເພື່ອປຶກສາຫາລື ຫຼື ອະນຸມັດໃນຕໍ່ໜ້າ.
ແຫຼ່ງຂໍ້ມູນ: ກົມໂຄສະນາ-ອົບຮົມ ສນຊ
