ທ່ານ ກິແກ້ວ ຈັນທະບູລີ ຮອງລັດຖະມົນຕີ ກະຊວງ ແຜນການ ແລະ ການລົງທຶນ ໄດ້ກ່າວວ່າ:
ການຂາດສານອາຫານ ເປັນບັນຫາສຳຄັນທີ່ກົດໜ່ວງຖ່ວງດຶງການພັດທະນາຂອງ ສປປ ລາວ ໃນທົ່ວປະເທດ ຫລາຍກວ່າໜຶ່ງສ່ວນສາມຂອງຈຳນວນເດັກລຸ່ມ 5 ປີ ທັງໝົດ ໄດ້ຮັບຜົນກະທົບຈາກການຂາດສານອາຫານ ແລະ ສະເພາະຢູ່ບັນດາແຂວງທີ່ເປັນເປົ້າໝາຍຂອງໂຄງການ, ຕົວເລກດັ່ງ ກ່າວມີລະດັບສູງເຖິງ 54%.
ການຂາດສານອາຫານຢ່າງຮຸນແຮງ ສາມາດສ້າງຄວາມເສຍຫາຍຕໍ່ການພັດທະນາຂອງສະໝອງ, ຕໍ່ຜົນການຮຽນຢູ່ໂຮງຮຽນ ແລະ ຈະກະທົບຕໍ່ຄວາມສຳເລັດໃນການຊອກຫາວຽກເຮັດງານທຳ, ເຊິ່ງຈະເຮັດໃຫ້ຄອບຄົວບໍ່ສາມາດຫລຸດພົ້ນ ອອກຈາກຄວາມທຸກຍາກໄດ້.
ທ່ານ ກິແກ້ວ ກ່າວຕື່ມວ່າ:
ການປັບປຸງໂພຊະນາການຂອງເດັກນ້ອຍ ແມ່ນກຸນແຈສຳຄັນເພື່ອກ້າວສູ່ເປົ້າໝາຍຂອງພວກເຮົາ ໃນການລົງທຶນໃສ່ການພັດທະນາຄົນ ແລະ ເພີ່ມທະວີຕົ້ນທຶນມະນຸດ ເພື່ອບັນລຸການເຕີບໂຕທາງດ້ານເສດຖະກິດຢ່າງສົມສ່ວນ ແລະ ທົ່ວເຖິງ.
ວິທີການແບບປະສານສົມ ທົບໜຶ່ງດຽວຫລາຍຂະແໜງການ ແມ່ນການເພີ່ມທະວີການເຮັດວຽກຮ່ວມກັນຂອງຫລາຍຂະແໜງການ ໃນເວລາດຽວກັນ ເພື່ອແກ້ໄຂສາເຫດໂດຍກົງ ແລະ ສາເຫດທີ່ເປັນພື້ນຖານຂອງການຂາດສານອາ ຫານຂອງເດັກນ້ອຍ.
ທ່ານ ນິໂກລາ ປອນຕາຣາ (Nicola Pontara) ຫົວໜ້າຫ້ອງການທະນາຄານໂລກ ປະຈໍາ ສປປ ລາວ ໄດ້ກ່າວວ່າ: ເດັກທີ່ເກີດຢູ່ ສປປ ລາວ ໃນວັນນີ້ ຈະມີຜະລິດຕະພາບພຽງແຕ່ເຄິ່ງໜຶ່ງຂອງລະດັບຜະລິດຕະພາບທີ່ເຂົາເຈົ້າຄວນມີ ຖ້າຫາກໄດ້ຮ່ຳຮຽນສຳເລັດ, ມີສຸຂະພາບສົມບູນ ແລະ ໄດ້ຮັບອາຫານທີ່ມີທາດບຳລຸງດີໃນເວລາຍັງນ້ອຍ.
ມັນມີຄວາມສຳຄັນທີ່ຕ້ອງເຮັດໃຫ້ພົນລະເມືອງລາວທຸກຄົນສາມາດ ບັນລຸທ່າແຮງບົ່ມຊ້ອນຂອງພວກເຂົາຢ່າງເຕັມສ່ວນ ເພື່ອໃຫ້ພວກເຂົາມີຄວາມພ້ອມໃນການປະເຊີນໜ້າກັບສິ່ງທ້າທາຍ ແລະ ການຍາດແຍ່ງເອົາໂອກາດໃນອະນາຄົດ.
ໃນປັດຈຸບັນ, ທະນາຄານໂລກ ໃຫ້ການສະໜັບສະໜູນທຶນແກ່ 19 ໂຄງການ ທີ່ກຳລັງດຳ ເນີນຢູ່ ສປປ ລາວ. ການລົງທຶນໃສ່ການພັດທະນາຄົນ ແມ່ນໜຶ່ງໃນບັນດາຂົງເຂດສໍາຄັນຕົ້ນຕໍ ທີ່ລະ ບຸໄວ້ໃນກອບການເປັນຄູ່ຮ່ວມມືລະຫວ່າງ ສປປ ລາວ ແລະ ທະນາຄານໂລກ ສຳລັບໄລຍະ 2017-2021.
ແຫຼ່ງຂໍ້ມູນ: ຂປລ
