ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ລັດຖະມົນຕີກະຊວງແຜນການ ແລະການລົງທຶນໄດ້ຊີ້ແຈງຕອບຄໍາຊັກຖາມຂອງ ສສຊ ໃນວາລະດໍາເນີນກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດຊຸດທີ VIII ໂດຍການເປັນປະທານຂອງ ທ່ານນາງ ປານີ ຢາທໍ່ຕູ້ ປະທານສະພາແຫ່ງຊາດ,ໂດຍໄດ້ເນັ້ນກ່ຽວກັບຜົນຂອງການກວດສອບ-ກວດກາ ຊຶ່ງການຈັດຕັ້ງປະຕິບັດໂຄງການລົງທຶນຂອງລັດຍັງມີຫຼາຍບັນຫາທີ່ຍັງບໍ່ຖືກແກ້ໄຂເປັນຕົ້ນແມ່ນໂຄງການນອກແຜນຢູ່ 2 ແລະນະຄອນຫຼວງວຽງຈັນຈໍານວນ 6 ໂຄງການ, ໂຄງການບໍ່ໄດ້ປະເມີນ ແລະປະມູນຕາມຂັ້ນຕອນ, ການດັດແກ້ມູນຄ່າໂຄງການລົງທຶນຂອງລັດຈໍານວນໜຶ່ງບໍ່ໄດ້ດໍາເນີນຕາມຂັ້ນຕອນທີ່ກໍານົດໄວ້ໃນກົດໝາຍ.
ໃນນັ້ນມີ 6 ໂຄງການທີ່ໄດ້ຍົກຂຶ້ນຄື:
ຢູ່ແຂວງຜົ້ງສາລີ 1 ໂຄງການ (ກໍ່ສ້າງສ້ອມແປງເດີ່ນຮົ່ມດອກປີກໄກ່) ມູນຄ່າສັນຍາ 1.760 ລ້ານກີບ ຊໍາລະຜ່ານມາ 1.600 ລ້ານກີບ, ຢູ່ແຂວງຫຼວງພະບາງ 2 ໂຄງການ (ຍົກລະດັບທາງປູຢາງ 2 ຊັ້ນ ເລກທີ2571) ແຕ່ສະໜາມບິນ-ທາງ ເວັ້ນຕົວເມືອງຫຼວງພະບາງມູນຄ່າສັນຍາ 180 ລ້ານກີບ ຊໍາລະຜ່ານມາ 1.000 ລ້ານ ກີບ, ໂຄງການກໍ່ສ້າງທາງຢາງເທສະ ບານນະຄອນຫຼວງພະບາງ 4 ແຍກຕະ ຫຼາດດາລາໄປຕາມເສັ້ນທາງໂຮງຮຽນປະຖົມສີຖານມູນຄ່າສັນຍາ 4.700 ລ້ານກີບ ຊໍາລະຜ່ານມາ 1.000 ລ້ານກີບ.
ສໍາລັບນະຄອນຫຼວງວຽງຈັນ 3 ໂຄງການຄື: ໂຄງການຕິດຕັ້ງໄຟເຍືອງທາງພະລັງງານແສງຕາເວັນຕາມຈຸດຕ່າງໆໃນນະຄອນຫຼວງວຽງຈັນ ມູນຄ່າສັນຍາ 3.700 ລ້ານກີບ, ໂຄງການກໍ່ສ້າງຫ້ອງການບໍ່ແຮ່ເມືອງສັງທອງມູນຄ່າສັນຍາ 1.240 ລ້ານກີບ ແລະ ໂຄງການຂັ້ນຫ້ອງບັນດາຂະແໜງການພາຍໃນພະແນກພະລັງງານ ແລະບໍ່ແຮ່ມູນຄ່າສັນຍາ 100 ລ້ານກີບ ທັງ 3 ໂຄງການຍັງບໍ່ທັນໄດ້ຊໍາລະ.
ທັງ 6 ໂຄງການແມ່ນນໍາໃຊ້ແຫຼ່ງທຶນລະດົມຈາກສັງຄົມ ແລະເງິນເກີນແຜນ, ສໍາຫຼັບເງິນລະດົມຈາກສັງຄົມບໍ່ແມ່ນງົບປະມານທີ່ນອນໃນການຈັດສັນໃຫ້ໂຄງການລົງທຶນຂອງລັດຕາມມາດຕາ 2 ຂອງກົດໝາຍວ່າດ້ວຍການລົງທຶນຂອງລັດຊຶ່ງໄດ້ກໍານົດວ່າຕ້ອງແມ່ນທຶນທີ່ຕ້ອງຜ່ານລະບົບງົບປະມານເທົ່ານັ້ນ.
ຕໍ່ບັນຫາດັ່ງກ່າວ, ກະຊວງແຜນການ ແລະການລົງທຶນຈະສືບຕໍ່ຊຸກຍູ້ໃຫ້ບັນດາຂະແໜງການ ແລະທ້ອງຖິ່ນທີ່ເປັນເຈົ້າຂອງໂຄງການມີຄວາມເຂັ້ມງວດໃນການປະຕິ ບັດກົດໝາຍການລົງທຶນຂອງລັດ ແລະບັນດານິຕິກໍາກ່ຽວຂ້ອງຢ່າງຮັດກຸມໂດຍການເຜີຍແຜ່ນໍານິຕິກໍາກ່ຽວຂ້ອງໃຫ້ເລິກເຊິ່ງ, ຕິດຕາມກວດກາບັນດາໂຄງການຮ່ວມກັບສະພາທ້ອງຖິ່ນ ແລະອົງການກວດກາກ້າວໄປເຖິງການປະຕິບັດວິໄນຕໍ່ຜູ້ທີ່ຍັງລະເມີດ.
ພ້ອມດຽວກັນນັ້ນ, ຕໍ່ກັບໂຄງການທີ່ບໍ່ໄດ້ປະເມີນຜົນ, ປະເມີນຕາມຂັ້ນຕອນ, ດັດແກ້ມູນຄ່າໂຄງການບໍ່ໄປຕາມຂັ້ນຕອນທີ່ກໍານົດໄວ້ໃນກົດໝາຍເຫັນວ່າເຈົ້າຂອງໂຄງ ການຍັງບໍ່ທັນເຂັ້ມງວດໃນການຈັດຕັ້ງປະຕິບັດບົດແນະນໍາກ່ຽວກັບການສ້າງ ແລະຄຸ້ມຄອງຈັດຕັ້ງປະຕິບັດໂຄງການລົງທຶນຂອງລັດທີ່ກະຊວງແຜນການ ແລະ ການລົງ ທຶນແຈ້ງອອກແຕ່ລະປີ, ຕໍ່ບັນຫາດັ່ງກ່າວ ກະຊວງແຜນການ ແລະການລົງທຶນ
ຈະສືບຕໍ່ປະສານສົມທົບກັບພາກສ່ວນກ່ຽວຂ້ອງເພື່ອແກ້ໄຂບັນຫາດັ່ງກ່າວຮ່ວມກັບເຈົ້າຂອງໂຄງການໃຫ້ແກ້ໄຂກັບທີ່ໂດຍການເຈາະໂຄງການ, ປະກອບເອກະສານກ່ຽວຂ້ອງໄປຜ່ານຂັ້ນຕອນຕາມລະບຽບກົດໝາຍກໍານົດແລ້ວຈຶ່ງສະເໜີຄືນໃໝ່ ແລະຈະຢຸດການຈັດສັນງົບປະມານປະຈໍາປີໃນບ້ວງລົງທຶນລັດປົກກະຕິຈົນກວ່າບັນຫາທີ່ຕິດພັນກັບໂຄງການນັ້ນໄດ້ຮັບການແກ້ໄຂ.
ແຫຼ່ງຂໍ້ມູນ: ໜັງສືພິມເສດຖະກິດ-ສັງຄົມ
