ທີ່ ພະແນກກະສິກຳ ແລະ ປ່າໄມ້ ແຂວງຄຳມ່ວນ ໄດ້ນຳສະເໜີການລິເລີ່ມ ໂຄງການຈັດຕັ້ງປະຕິບັດ ສົ່ງເສີມລະບົບຕ່ອງໂສ້ການຜະລິດກະສິກຳເປັນສິນຄ້າ ທີ່ເປັນມິດຕໍ່ສິ່ງແວດລ້ອມ ຫຼື (ຄສກສ) ໂດຍການເປັນປະທານຂອງທ່ານ ບຸນມີ ພິມມະສອນ ຮອງເຈົ້າແຂວງໆຄຳມ່ວນ, ມີຄະນະພະແນກກະສິກຳ ແລະ ປ່າໄມ້ແຂວງ, ຄະນະນຳຂັ້ນເມືອງ ແລະ ຫ້ອງການກະສິກຳ ແລະ ປ່າໄມ້ 3 ເມືອງຄື:
ເມືອງໜອງບົກ, ເຊບັ້ງໄຟ ແລະ ເມືອງຫີນບູນ ພ້ອມດ້ວຍພະນັກງານວິຊາການທີ່ກ່ຽວຂ້ອງເຂົ້າຮ່ວມ.
ທ່ານ ແກ້ວວິໄລ ຂຸນບໍລົມ ຜູ້ປະສານງານໂຄງການຂັ້ນແຂວງ ໄດ້ນຳສະເໜີສະພາບລວມຂອງໂຄງການ ເຊິ່ງໂຄງການ ຄສກສ ແມ່ນໂຄງການທີ່ຟື້ນຟູໂຄງລ່າງດ້ານຊົນລະປະທານຂະໜາດນ້ອຍ ແລະ ທາງຊົນນະບົດ, ຍົກລະດັບສູນຄົ້ນຄວ້າ, ສູນພັດທະນາກະສິກຳ ແລະ ໂຄງລ່າງພື້ນຖານດ້ານການກວດກາຄຸນນະພາບ, ສຸຂະອະນາໄມຂອງພືດ, ການປັບໃຊ້ແນວພັນເຂົ້າ ແລະ ແນວພັນພືດທີ່ທົນທານຕໍ່ສະພາບແວດລ້ອມ, ການສະໜັບສະໜູນດ້ານການເງິນໃຫ້ແກ່ຄອບຄົວຜູ້ຜະລິດຂະໜາດນ້ອຍ.
ໂດຍພື້ນທີ່ເປົ້າໝາຍຂອງໂຄງການປະກອບມີ 6 ແຂວງຄື:
ນະຄອນຫຼວງວຽງຈັນ, ແຂວງຄຳມ່ວນ, ສະຫວັນນະເຂດ, ສາລະວັນ, ຈຳປາສັກ ແລະ ແຂວງເຊກອງ ໃນໄລຍະການຈັດຕັ້ງປະຕິບັດ ແຕ່ເດືອນຕຸລາ 2018 ຫາ ເດືອນກັນຍາ 2024 ໃນມູນຄ່າທັງໝົດ 46 ລ້ານໂດລາສະຫະລັດ.
ໃນນັ້ນເງິນສະໜັບສະໜູນຊ່ວຍເຫຼືອລ້າຈາກ ADB ຈຳນວນ 40,5 ລ້ານໂດລາ, ເງິນຈາກການປະກອບທຶນສົມທົບສະໜັບສະໜູນທຸລະກິດກະສິກຳ ແລະ ທຶນຈາກລັດຖະບານ ຈຳນວນ 5,8 ລ້ານໂດລາ.
ສະເພາະແຂວງຄຳມ່ວນໃນເບື້ອງຕົ້ນແມ່ນກຳນົດເອົາ 3 ເມືອງຄື:
ເມືອງໜອງບົກ ຈຳນວນ 22 ບ້ານ, ເມືອງຫີນບູນ 15 ບ້ານ ແລະ ເມືອງເຊບັ້ງໄຟ 18 ບ້ານ ເຊິ່ງຈຸດປະສົງຫຼັກຂອງໂຄງການແມ່ນເພື່ອ ສົ່ງເສີມການປັບປຸງຂອດການແຂ່ງຂັນທາງດ້ານການຜະລິດເຂົ້າ, ພືດຜັກເປັນສິນຄ້າ ແນໃສ່ພັດທະນາການຜະລິດຕາມລະບົບຕ່ອງໂສ້ ໃຫ້ມີຄວາມຫຼາກຫຼາຍ ສາມາດຕອບສະໜອງໄດ້ຕາມຄວາມຕ້ອງການ ແລະ ແຜນງານຜະລິດເປັນສິນຄ້າຂອງລັດຖະບານ,
ໃຫ້ຄວາມຊ່ວຍເຫຼືອໃນການສ້າງຄວາມອາດສາມາດກ່ຽວກັບການປຸງແຕ່ງ, ເກັບຮັກສາ, ການກວດກາຄຸນນະພາບຜົນຜະລິດກະສິກຳ, ສົ່ງເສີມການນຳໃຊ້ຊີວະພາບ ແລະ ການຜະລິດກະສິກຳອິນຊີ, ສ້າງຄວາມເຂັ້ມແຂງໃຫ້ແກ່ວິຊາການ ແລະ ອົງການຈັດຕັ້ງທີ່ກ່ຽວຂ້ອງ ກ່ຽວກັບການຜະລິດກະສິກຳ ທີ່ຕິດພັນກັບສະພາບການປ່ຽນແປງດິນຟ້າອາກາດ, ສ້າງສະພາບແວດລ້ອມທີ່ເອື້ອອຳນວຍໃຫ້ແກ່ທຸລະກິດກະສິກຳທີ່ເປັນມິດກັບສິ່ງແວດລ້ອມ ເພື່ອສົ່ງເສີມການປົກປັກຮັກສາສະພາບແວດລ້ອມ, ເພີ່ມລາຍໄດ້ໃຫ້ແກ່ຊາວກະສິກອນ ແລະ ຜູ້ປະກອບການທາງດ້ານທຸລະກິດກະສິກຳໃຫ້ມີຄວາມຍືນຍົງ.
ເຊິ່ງກອງປະຊຸມດັ່ງກ່າວຍັງໄດ້ປຶກສາຫາລື ແລະ ປະກອບຄຳເຫັນເພື່ອວາງແຜນວຽກງານທີ່ຈະຈັດຕັ້ງປະຕິບັດໃນຕໍ່ໜ້າ.
ແຫຼ່ງຂໍ້ມູນ: ມີເດຍລາວ