ຢູ່ທີ່ ສະໂມສອນໃຫຍ່ແຂວງຄຳມ່ວນ ໄດ້ມີພິທີມອບໃບຢັ້ງຢືນ ແຂວງຄຳມ່ວນ ເປັນແຂວງຈົບຊັ້ນມັດທະຍົມສຶກສາ ຕອນຕົ້ນບຳລຸງ ໂດຍມີ ທ່ານ ໂອໄດ ສຸດາພອນ ເຈົ້າແຂວງໆຄຳມ່ວນ, ທ່ານ ນາງ ແສງເດືອນ ຫຼ້າຈັນທະບູນ ລັດຖະມົນຕີ ກະຊວງສຶກສາທິການ ແລະ ກິລາ, ມີຄະນະນຳຈາກແຂວງສະຫວັນນະເຂດ, ແຂວງບໍລິຄຳໄຊ, ຫົວໜ້າກົມ ຂອງກະຊວງສຶກສາທິການ ແລະ ກິລາ, ກົມການສຶກສານອກໂຮງຮຽນ, ອະດິດການນຳຂອງແຂວງ, ບັນດາທ່ານເຈົ້າເມືອງ-ຮອງເຈົ້າເມືອງ, ພະແນກການອ້ອມຂ້າງ ຄູ-ອາຈານ, ນັກຮຽນ, ພໍ່ແມ່ປະຊາຊົນ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.
ທ່ານ ສີໄຮ ແກ້ວໄກຖິ່ນ ຫົວໜ້າພະແນກສຶກສາທິການ ແລະ ກິລາແຂວງ ໄດ້ລາຍງານສະຫຼຸບການຈັດຕັ້ງປະຕິບັດການຮຽນ-ການສອນຊັ້ນມັດທະຍົມສຶກສາຕອນຕົ້ນບຳລຸງທົ່ວແຂວງວ່າ:
ໃນວັນທີ 14 ພະຈິກ 2014 ເຖິງວ່າແຂວງຄຳມ່ວນໄດ້ປະກາດຈົບຊັ້ນປະຖົມບຳລຸງໄປແລ້ວກໍຕາມ ແຕ່ພວກເຮົາຍັງໄດ້ສຶບຕໍ່ຈັດການຮຽນ-ການສອນໃຫ້ກຸ່ມເປົ້າໝາຍດັ່ງກ່າວທີ່ຍັງຕົກຄ້າງບໍ່ທັນຈົບປະຖົມ, ສືບຕໍ່ເອົາໃຈໃສ່ບຳລຸງຍົກລະດັບການ ສຶກສາໃຫ້ແກ່ປະຊາຊົນໃນກຸ່ມເກນອາຍຸ 15-35 ປີທີ່ຮຽນບໍ່ຈົບຊັ້ນມັດທະຍົມສຶກສາຕອນຕົ້ນຢູ່ບັນດາບ້ານເປົ້າ ໝາຍຂອງເມືອງຕ່າງໆໃນທົ່ວແຂວງ.
ເພື່ອບັນລຸແຜນພັດທະນາເສດຖະກິດ-ສັງຄົມຂອງແຂວງໃນໄລຍະ 5 ປີ ( 2016-2020 ) ຕ້ອງເຮັດໃຫ້ປະຊາຊົນໃນເກນອາຍຸ 15-35 ປີ ໃນທົ່ວແຂວງມີລະດັບການສຶກສາຈົບຊັ້ນມັດທະ ຍົມສຶກສາຕອນຕົ້ນປະຊາຊົນຢ່າງໜ້ອຍ 90% ຂຶ້ນໄປ ເຊິ່ງໃນທົ່ວແຂວງມີປະຊາກອນໃນກຸ່ມເກນອາຍຸ 15-35 ປີ ມີທັງໝົດ 141.746 ຄົນ, ຍິງ 71.530 ຄົນ ມີເປົ້າໝາຍເຂົ້າຮຽນບຳລຸງຍົກລະດັບການສຶກສາຊັ້ນມັດທະຍົມສຶກສາ ຕອນຕົ້ນທັງໝົດ 12.501 ຄົນ, ຍິງ 5.503 ຄົນ ເຂົ້າຮຽນຕົວຈິງ ແລະ ສອບເສັງຈົບຊັ້ນມັດທະຍົມສຶກສາຕອນຕົ້ນ ບຳລຸງໄດ້ 12.030 ຄົນ, ຍິງ 5.311 ຄົນ, ເທົ່າກັບ 96,23% ທຽບໃສ່ລະດັບຄາດໝາຍຂອງກະຊວງສຶກສາທິການ ແລະ ກິລາວາງອອກແມ່ນສາມາດບັນລຸໄດ້ຕາມຄາດໝາຍ.
ຄຽງຄູ່ກັນນັ້ນກໍໄດ້ເອົາໃຈໃສ່ບຳລຸງຍົກລະດັບການສຶກສາ ຊັ້ນມັດທະຍົມສຶກສາຕອນປາຍໃຫ້ແກ່ທະຫານ, ພະນັກງານ, ປະຊາຊົນ ແລະ ກຸ່ມຄົນທີ່ສົນໃຈຢູ່ໃນສູນການສຶກສາ ນອກໂຮງຮຽນຂອງແຂວງ ເຊິ່ງໃນສົກຮຽນ 2018-2019 ນີ້ມີຜູ້ເຂົ້າຮຽນບຳລຸງຍົກລະດັບການສຶກສາຊັ້ນມັດທະ ຍົມສຶກສາຕອນປາຍທັງໝົດ 60 ຄົນ, ຍິງ 37 ຄົນ ໃນນັ້ນຮຽນບຳລຸງ ມ7 ມີ 54 ຄົນ, ຍິງ 37 ຄົນ, ສອບເສັງຈົບ ຊັ້ນ ມ7 ບຳລຸງໄດ້ 54 ຄົນ, ຍິງ 37 ຄົນ ນອກຈາກນີ້ຍັງໄດ້ຊຸກຍູ້ສົ່ງເສີມໃຫ້ສູນການສຶກສານອກໂຮງຮຽນແຫ່ງ ຕ່າງໆຈັດຕັ້ງການຝຶກອົບຮົມວິຊາຊີບຂັ້ນພື້ນຖານໃຫ້ແກ່ຊຸມຊົນຜູ້ທີ່ມີຄວາມສົນໃຈຢາກມີວິຊາຊີບເສີມໃນສົກຮຽນ 2018-2019 ໄດ້ທັງໝົດ 192 ຄົນ, ຍິງ 79 ຄົນ.
ຜ່ານ ການຮຽນ-ການສອນຕົວຈິງ ເຫັນໄດ້ວ່າ ປະຊາຊົນ ມີຄວາມຮູ້, ຄວາມສາມາດ ແລະ ນຳເອົາຄວາມຮູ້ ທີ່ຮຽນມາໄປນຳໃຊ້ ເຂົ້າໃນການ ພັດທະນາຕົນເອງ, ຮູ້ຈັກຄິດໄລ່, ຮູ້ ວາງແຜນການຄ້າຂາຍ ເສີມສ້າງເສດຖະກິດ ຄອບຄົວສູງຂຶ້ນກວ່າເກົ່າ, ເຮັດໃຫ້ປະຊາຊົນ ເຫັນໄດ້ຄວາມໝາຍ, ຄວາມສຳຄັນ ຂອງການສຶກສາຮໍ່າຮຽນຫລາຍຂຶ້ນ.
ຈາກຂະບວນການເຄື່ອນໄຫວຈັດຕັ້ງປະຕິບັດການຮຽນ-ການສອນບຳລຸງຊັ້ນມັດທະຍົມສຶກສາຕອນຕົ້ນ ປະຊາຊົນໃນທົ່ວແຂວງ ພວກເຮົາສາມາດຄັດເລືອກໄດ້ ກົມກອງ, ບ້ານ ແລະ ບຸກຄົນ ທີ່ມີຜົນງານດີເດັ່ນໃນການ ປະກອບສ່ວນເຂົ້າໃນວຽກງານດັ່ງກ່າວ ເຊິ່ງໄດ້ສະເໜີໃຫ້ຂັ້ນເທິງມີການຍ້ອງຍໍແຕ່ລະປະເພດດັ່ງລຸ່ມນີ້:
1. ຫຼຽນໄຊແຮງງານຊັ້ນ I ຈຳນວນ 02 ກົມກອງ, ບຸກຄົນ 11 ທ່ານ
2. ຫຼຽນໄຊແຮງງານຊັ້ນ II ຈຳນວນ 02 ກົມກອງ, ບຸກຄົນ 34 ທ່ານ
3. ຫຼຽນໄຊແຮງງານຊັ້ນ III ຈຳນວນ 05 ກົມກອງ, ບຸກຄົນ 42 ທ່ານ
4. ຫຼຽນກາແຮງງານ ຈຳນວນ 05 ກົມກອງ, ບຸກຄົນ 55 ທ່ານ
5. ໃບຍ້ອງຍໍຂອງລັດຖະບານ ຈຳນວນ 05 ກົມກອງ, ບຸກຄົນ 84 ທ່ານ
6. ໃບຍ້ອງຍໍຂອງກະຊວງສຶກສາທິການ ແລະ ກິລາ ຈຳນວນ 36 ກົມກອງ, ບຸກຄົນ 156 ທ່ານ
7. ໃບຍ້ອງຍໍຂອງທ່ານເຈົ້າແຂວງ ຈຳນວນ 121 ກົມກອງ, ບຸກຄົນ 559 ທ່ານ
ທ່ານ ນາງ ແສງເດືອນ ຫຼ້າຈັນທະບູນ ລັດຖະມົນຕີກະຊວງສຶກສາທິການ ແລະ ກິລາກໍໄດ້ເນັ້ນ ບາງບັນຫາທີ່ສຳຄັນເປັນຕົ້ນແມ່ນຜູ້ທີ່ມີ ເງື່ອນໄຂໃນການເຂົ້າຮຽນຕໍ່ບຳລຸງໃນຊັ້ນມັດທະຍົມປາຍ ຄວນສືບຕໍ່ຮຽນ ເຖິງວ່າພວກເຮົາເອົາການສຶກສາພາກບັງຄັບກ່ອນ ມ.ຕົ້ນ ແຕ່ວ່າຮອດປີ 2030 ພວກເຮົາຈະໃຫ້ປະຊາຊົນລາວຈົບ ມ.ປາຍ ທັງໝົດ.
ສຳລັບຜູ້ທີ່ບໍ່ມີເງື່ອນໄຂໄປຮຽນຕໍ່ຊັ້ນມັດທະຍົມປາຍສາ ມາດໄປຮຽນຕໍ່ໃນສາຍວິຊາຊີບລະບົບປົກກະຕິ, 3ປີກໍໄດ້ ຫຼື ວ່າບໍ່ມີເງື່ອນໄຂໄປຮຽນໄລຍະຍາວ 3 ປີກໍມີ ໄລຍະສັ້ນໃຫ້ລະບົບ 3ເດືອນ, 6ເດືອນ ແລະ 9 ເດືອນ ພາຍຫຼັງຮຽນແລ້ວສາມາດເພີ້ມສີມື, ເພີ້ມທັກສະ ໃນການປະກອບອາຊີບຕົນ ພ້ອມກັນນັ້ນຕໍ່ກັບແຜນພັດທະນາການສຶກສາລົງເລິກແຜນການຈັດຕັ້ງປະຕິບັດເປົ້າໝາຍຂອງການສຶກສາ ແບບຍືນຍົງ ຫຼື ວ່າ 15 ຄາດໝາຍທີ່ສະພາທ້ອງຖິ່ນໄດ້ຮັບຮອງເອົານັ້ນ.
ສະເໜີໃຫ້ຜູ້ບໍລິຫານການສຶກສາ ກິລາ ສຸມໃສ່ຄຸ້ມຄອງໂຮງຮຽນ ລົງກວດກາຕິດຕາມການຮຽນ-ການສອນຂອງພະນັກງານຄູ-ອາຈານ ນັກຮຽນເປັນປະຈຳເພື່ອກຳໄດ້ສະພາບ, ຂໍ້ມູນ ສະຖິຕິນັກຮຽນ, ຄູ-ອາຈານ ທ່ານໃດສອນດີ ເປັນແບບຢ່າງທີ່ດີແກ່ນັກຮຽນເພື່ອເປັນການຍ້ອງຍໍເປັນຂະບວນການ ຖ້າພົບເຫັນປະກົດການຫຍໍ້ທໍ້ກໍຈະ ໄດ້ແກ້ໄຂຢ່າງທັນການ ສະນັ້ນຕ້ອງກະຕຸກຊຸກຍູ້ຄູໃຫ້ມີຄວາມກະຕືລືລົ້ນເອົາໃຈໃສ່ຕໍ່ການຮຽນ-ການສອນ ທ່ານມີຄວາມເຊື່ອໝັ້ນພາຍໃຕ້ການນຳພາຊີ້ນຳຂອງຄະນະພັກຄະນະນຳແຂວງຄຳມ່ວນ, ຂອງບັນດາເມືອງ 10 ຕົວເມືອງ ແລະ ດ້ວຍນ້ຳໃຈເອື້ອຍເຜື້ອເພື່ອແຜ່, ຄວາມດຸໝັ້ນຂະຫຍັນພຽນຂອງປະຊາຊົນບັນດາເຜົ່າພາຍໃນແຂວງຄຳມ່ວນຈະກາຍເປັນທ່າແຮງໃນການ ຜັກດັນເສດຖະກິດ-ສັງຄົມຂອງແຂວງໃຫ້ມີຄວາມເຂັ້ມແຂງຈະເລີນຮຸ່ງເຮືອງ ແລະ ສີວິໄລ.
ພ້ອມດຽວກັນນັ້ນທ່ານກໍໄດ້ລັ່ນຄ້ອງ 9 ບາດ ແລະ ຕັດແຖບຜ້າ-ປ່ອຍປຸ້ມເປົ້າ ສຳລັບການປະກາດແຂວງຄຳມ່ວນຈົບມັດທະຍົມສຶກສາຕອນຕົ້ນບຳລຸງທົ່ວແຂວງຄຳມ່ວນ ຄັ້ງວັນທີ 5 ທັນວາ 2019 ເປັນແຂວງທີ່ 8 ຂອງ ສປປລາວ.
ແຫຼ່ງຂໍ້ມູນ: ຂ່າວໂດຍ: ຊ້າງນ້ອຍ ສກຂ ຄຳມ່ວນ, ພະແນກສຶກສາທິການ ແລະ ກິລາ ແຂວງຄຳມ່ວນ
