ທີ່ກອງບັນຊາການທະຫານເມືອງສີໂຄດຕະບອງ ນະຄອນຫຼວງວຽງຈັນ ໄດ້ຈັດພິທີຮັບຮອງ 6 ບ້ານ ເປັນບ້ານສາມັກຄີປອງດອງ ໂດຍເປັນປະທານຂອງທ່ານ ອູ່ທອງ ດວງມະນີ ປະທານແນວລາວສ້າງຊາດເມືອງສີໂຄດຕະບອງ, ໂດຍເປັນກຽດເຂົ້າຮ່ວມຂອງທ່ານ ບຸນທ່ຽງ ຂຸນສີ ປະທານແນວລາວສ້າງຊາດນະຄອນຫຼວງວຽງຈັນ, ມີທ່ານ ບຸນມີ ໄຊຍະວົງ ຮອງເຈົ້າເມືອງໆ ສີໂຄດຕະບອງ ແລະ ພໍ່ແມ່ປະຊາຊົນ 6 ບ້ານເຂົ້າຮ່ວມ.
ໃນພິທີຄັ້ງນີ້, ນາຍບ້ານໆ ເກົ້າລ້ຽວ ໄດ້ລາຍງານໃຫ້ຮູ້ວ່າ: ກຸ່ມບ້ານເກົ້າລ້ຽວ ປະກອບມີ 7 ບ້ານຄື:
ບ້ານສີຊົມຊື່ນ, ບ້ານໂນນສະຫວ່າງ, ບ້ານໂພນສະຫວາດເໜືອ, ບ້ານໂນນແກ້ວ, ບ້ານເກົ້າລ້ຽວ, ບ້ານດ່ານຄໍາ ແລະ ບ້ານດອນຊິງຊູ; ກຸ່ມບ້ານເກົ້າລ້ຽວ ມີເນື້ອທີ່ທັງໝົດ 5,191,831 ຕາແມັດ, ມີ 2,677 ຄອບຄົວ, ມີພົນລະເມືອງ 13,513 ຄົນ, ຍິງ 6,947 ຄົນ
ປະກອບມີ 3 ເຜົ່າ: ລາວ, ມົ້ງ ແລະ ເຜົ່າກືມມຸ. ປະຊາຊົນສ່ວນຫຼາຍແມ່ນຖືສາສະໜາພຸດ, ອາຊີບສ່ວນຫຼາຍແມ່ນຄ້າຂາຍ ມີລາຍໄດ້ສະເລ່ຍຫົວຄົນ 1,500 ໂດລາ/ຄົນ/ປີ, ມີກອງທືນພັດທະນາບ້ານ 3 ກອງທຶນ, ລວມມີສະມາຊິກ 490 ຄົນ, ມີເງີນກອງທືນທັງໝົດ ສອງຕື້ກວ່າລ້ານກີບ, ນັບແຕ່ມີແນວທາງປ່ຽນແປງໃໝ່ຮອບດ້ານຢ່າງມີຫຼັກການຂອງພັກເປັນຕົ້ນມາ ໂດຍສະເພາະນັບແຕ່ມີມະຕິກອງປະຊຸມໃຫຍ່ຄັ້ງທີ X ຂອງພັກ, ມະຕິກອງປະຊຸມໃຫຍ່ຄັ້ງທີ VI ຂອງອົງຄະນະພັກນະຄອນຫຼວງ,
ມະຕິກອງປະຊຸມໃຫຍ່ຄັ້ງທີ VI ຂອງອົງຄະນະພັກເມືອງສີໂຄດຕະບອງ ກຸ່ມບ້ານເກົ້າລ້ຽວ ພວກເຮົາໄດ້ນໍາພາຈັດຕັ້ງຜັນຂະຫຍາຍເປັນອັນລະອຽດເຂົ້າໃນວຽກງານຕົວຈິງ ເຮັດໃຫ້ເສດຖະກິດ-ສັງຄົມພາຍໃນກຸ່ມນັບມື້ນັບເຕີບໃຫຍ່ຂະຫຍາຍຕົວ, ປະຊາຊົນແຕ່ລະຄອບຄົວໄດ້ຫຼຸດພົ້ນອອກຈາກຄວາມທຸກຍາກເທື່ອລະກ້າວຂຶ້ນສາມາດເປັນຄອບຄົວອຸດົມສົມບູນ ແລະ ກາຍເປັນຄອບຄົວຮັ່ງມີຈໍານວນໜຶ່ງ ຄຽງຄູ່ກັບຈຸດດີກໍ່ຍັງມີຈຸດອ່ອນ ແລະ ຂໍ້ຄົງຄ້າງເຊັ່ນ: ຍັງມີບາງປະກົດການຫຍໍ້ທໍ້ໃນສັງຄົມ, ໂດຍສະເພາະແມ່ນບັນຫາຢາເສບຕິດ, ຂີ້ລັກງັດແງະ ແລະ ອື່ນໆ.
ໃນໂອກາດນີ້, ທ່ານ ບຸນທ່ຽງ ຂຸນສີ ໄດ້ເປັນກຽດໂອ້ລົມ ກ່ອນອື່ນທ່ານໄດ້ສະແດງຄວາມຍ້ອງຍໍຊົມເຊີຍຕໍ່ຄະນະນໍາເມືອງກໍ່ຄືແນວລາວສ້າງຊາດເມືອງ ແລະ ບ້ານ ທີ່ໄດ້ເອົາໃຈໃສ່ໃນຊີ້ນໍາໆ ພາການຈັດຕັ້ງປະຕິບັດຂະບວນການສ້າງຄອບຄົວ ແລະ ບ້ານສາມັກຄີປອງດອງຂອງກຸ່ມບ້ານເກົ້າລ້ຽວ ທີ່ໄດ້ບັນລຸໄປຕາມຄາດໝາຍທີ່ວາງໄວ້, ຖືວ່າວຽກງານສ້າງຄອບຄົວ ແລະ ບ້ານສາມັກຄີປອງດອງເປັນວຽກງານໜຶ່ງໃນມາດຕະຖານຂອງບ້ານພັດທະນາທີ່ມີຄວາມສໍາຄັນ ແລະ ຕິດພັນກັບການແກ້ໄຂຄວາມທຸກຍາກຂອງປະຊາຊົນລາວບັນດາເຜົ່າ ເພື່ອເຮັດໃຫ້ປະຊາຊົນມີຊີວິດການເປັນຢູ່ທີ່ດີຂຶ້ນ ແລະ ມີຄວາມສາມັກຄີເປັນເອກະພາບກັນ.
ພ້ອມກັນນີ້, ທ່ານໄດ້ຮຽກຮ້ອງໃຫ້ແນວລາວສ້າງຊາດເມືອງ-ບ້ານສືບຕໍ່ຜັນຂະຫຍາຍນະໂຍບາຍແນວໂຮມຂອງພັກ, ເສີມຂະຫຍາຍມູນເຊື້ອຄວາມສາມັກຄີປອງດອງຂອງປະຊາຊົນລາວບັນດາເຜົ່າເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ, ສືບຕໍ່ສຶກສາອົບຮົມ, ປຸກລະດົມ ແລະ ເສີມຂະຫຍາຍສິດເປັນເຈົ້າຂອງປະເທດຊາດ, ເປັນເຈົ້າຕົນເອງ ແນໃສ່ການແກ້ໄຂຄວາມທຸກຍາກຂອງຄອບຄົວ, ເພື່ອເປັນການເຕົ້າໂຮມຄວາມສາມັກຄີທົ່ວປວງຊົນໂດຍຖືເອົາຫົວໜ່ວຍຄອບຄົວ ແລະ ຮາກຖານບ້ານເປັນໃຈກາງ.
ໃນໃນພິທີດັ່ງກ່າວ, ໄດ້ມີການມອບ-ຮັບໃບຢັ້ງຢືນຄອບຄົວສາມັກຄີ ແລະ ໄດ້ມອບໃບຍ້ອງຍໍໃຫ້ແກ່ຜູ້ທີ່ມີຜົນງານດີເດັ່ນໃນການປະກອບສ່ວນຂອງຂະບວນການດັ່ງກ່າວຕື່ມອີກ.
ແຫຼ່ງຂໍ້ມູນ: ກົມໂຄສະນາ-ອົບຮົມ ສນຊ
Hits: 4
