ຂປລ.ທ່ານ ນາງ ມຽນ ຮຽນຈອນ ຮອງປະທານອົງການກອຍກາ (KOICA) ປະຈຳລາວ ພ້ອມດ້ວຍຄະນະ ໄດ້ເຂົ້າພົບປະກັບທ່ານ ບົວສອນ ສີນວນທອງ ຮອງເຈົ້າແຂວງໆຊຽງຂວາງ ທີ່ຫ້ອງວ່າການແຂວງ ເຊິ່ງທ່ານ ນາງ ມຽນ ຮຽນຈອນ ໄດ້ລາຍງານຈຸດປະສົງຂອງການມາເຮັດວຽກຢູ່ແຂວງຊຽງຂວາງໃນຄັ້ງນີ້ ເພື່ອສຳຫລວດ ແລະ ເກັບກຳຂໍ້ມູນ ປະກອບເຂົ້າໃນການກະກຽມໂຄງການ ເພື່ອຊ່ວຍເຫລືອດ້ານກະສິກຳ ເປັນຕົ້ນແມ່ນ:
ການປູກຝັງ ແລະ ລ້ຽງສັດ ໂດຍສະເພາະຢູ່ເມືອງແປກ ແລະ ເມືອງຄຳ.
ໂອກາດນີ້, ທ່ານ ຮອງເຈົ້າແຂວງໆຊຽງຂວາງ ໄດ້ກ່າວສະແດງຄວາມດີໃຈ ແລະ ເຫັນດີເປັນຢ່າງຍິ່ງ ທີ່ອົງການກອຍກາມີແຜນເຂົ້າມາຊ່ວຍພັດທະນາ ໃນຂົງເຂດກະສິກຳ ຢູ່ແຂວງຊຽງຂວາງ ເຊິ່ງຖືກຕ້ອງຕາມບູລິມະສິດຂອງແຂວງ ທາງດ້ານການພັດທະນາ ຊຶ່ງແຂວງຖືເອົາວຽກງານປູກຝັງ, ລ້ຽງສັດໃຫຍ່ ແລະ ການທ່ອງທ່ຽວ ເປັນຕົວສຳຄັນໃນການພັດທະນາ ແລະ ແກ້ໄຂຄວາມທຸກຍາກ.
ຂະນະດຽວກັນ, ທ່ານ ຮອງເຈົ້າແຂວງຍັງໄດ້ຕາງໜ້າໃຫ້ປະຊາຊົນ ຊາວຊຽງຂວາງຂອບໃຈ ແລະ ຮູ້ບຸນຄຸນ ຕໍ່ອົງການກອຍກາ ທີ່ໄດ້ໃຫ້ການຊ່ວຍເຫລືອໃນໄລຍະຜ່ານມາ ເປັນຕົ້ນ ແມ່ນການເກັບກູ້ ແລະ ທຳ ລາຍລະເບີດບໍ່ທັນແຕກ ອອກຈາກພື້ນທີ່ການຜະລິດ ແລະ ພື້ນທີ່ການພັດທະນາ, ຂົງ ເຂດວຽກງານກະສິກຳ, ການສຶກສາ ແລະ ສາທາລະນະສຸກ.
ແຫຼ່ງຂໍ້ມູນ: ຂ່າວ: ບຸນມີ ແສງທຸມມີ, ຂປລ
