ນັບແຕ່ເດືອນມັງກອນຫາເດືອນມີນາຂອງທຸກປີ ຢູ່ປະເທດເຮົາ ເວົ້າລວມ ເວົ້າສະເພາະຢູ່ນະຄອນຫຼວງວຽງຈັນ (ນວ) ມັກຈະເກີດອັກຄີໄພຂຶ້ນຢູ່ຫຼາຍແຫ່ງເຊັ່ນ:
ທີ່ພັກອາໄສ ຫົວໜ່ວຍທຸລະກິດ ການຜະລິດ ຕະຫຼາດ ປ່າຫຍ້າ ປ່າໄມ້ ແລະ ເຂດຊຸມຊົນ ເຊິ່ງມັນໄດ້ສ້າງຜົນເສຍຫາຍເຖິງແກ່ຊີວິດ ຊັບສິນຂອງລັດ-ລວມໝູ່ ເອກະຊົນ ແລະ ຂອງບຸກຄົນເປັນຈຳນວນຫຼາຍ ສາເຫດໄຟໄໝ້ສ່ວນໃຫຍ່ແມ່ນຍ້ອນການເລີນເລີ້ ຂາດສະຕິ ຂາດຄວາມຮັບຜິດຊອບ ຄວາມຮູ້ເທົ່າບໍ່ເຖິງການ ແລະ ການກວດກາບໍ່ຮອບຄອບ ເປັນຕົ້ນ ການໃຊ້ໄຟເຂົ້າໃນການຜະລິດ ການດຳເນີນທຸລະກິດ ການດຳລົງຊີວິດປະຈຳວັນ ການຈູດຂີ້ເຫຍື້ອ ຈູດປ່າ ຈູດໄຮ່ ໄຕ້ທູບທຽນບູຊາ ແລະ ອື່ນໆ.
ພະແນກຕຳຫຼວດສະກັດກັ້ນ ແລະ ຕ້ານອັກຄີໄພ ນວ ໃຫ້ຮູ້ວ່າ:
ປີ 2019 ທົ່ວ ນວ ມີອັກຄີໄພເກີດຂຶ້ນທັງໝົດ 80 ຄັ້ງ ທຽບໃສ່ປີ 2018 ເພີ່ມຂຶ້ນ 40 ຄັ້ງ ໃນນີ້ ໄຟໄໝ້ໃຫຍ່ 2 ຄັ້ງ ໄໝ້ນ້ອຍ 78 ຄັ້ງ ຜົນເສຍເຫຍໄໝ້ເປັນຫ້ອງ 25 ຫ້ອງ ເປັນສາງເຄື່ອງ 1 ສາງ ເປັນຫຼັງ 36 ຫຼັງ ປ່າຫຍ້າ 12 ໄລ່ ຫ້ອງແຖວ 3 ຫ້ອງ ລົດຈັກ 6 ຄັນ ຮ້ານຂາຍເຄື່ອງ 26 ຮ້ານ ໄໝ້ເຄື່ອງຢາງທີ່ເປັນປຣາສະຕິກ 10 ໂຕນ ແລະ ອື່ນໆ ລວມມູນຄ່າຄວາມເສຍຫາຍເປັນເງິນກີບ 12,8 ຕື້ກີບ ເງິນບາດ 3 ແສນບາດ ແລະ ເງິນໂດລາສະຫະລັດ 50 ພັນໂດລາ.
ສາເຫດທີ່ພາໃຫ້ເກີດອັກຄີໄຟໃນແຕ່ລະຄັ້ງ ແມ່ນເກີດຈາກການອົບໄມ້ 1 ຄັ້ງ ໄຕ້ທູບທຽນບູຊາ 7 ຄັ້ງ ຈູດຂີ້ເຫຍື້ອ ແລະ ປ່າ 8 ຄັ້ງ ຄົນຈູດ 8 ຄັ້ງ ຍ້ອນການສູບຢາ 3 ຄັ້ງ ໄຟໄໝ້ແລ້ວລາມໄປໃສ່ ໂຮງງານ 1 ຄັ້ງ ຍ້ອນມົ້ວສຸມຢາເສບຕິດ 2 ຄັ້ງ ຈອດເຫຼັກ 2 ຄັ້ງ ແລະ ແຕ່ງກິນ 2 ຄັ້ງ ຕໍ່ກັບເຫດການທີ່ເກີດຂຶ້ນທັງໝົດນັ້ນ
ເຈົ້າໜ້າທີ່ໄດ້ສຶກສາອົບຮົມຊັດມ້ຽນ 79 ລາຍ ແລະ ຍັງດຳເນີນຄະດີຢູ່ 1 ລາຍ ການເກີດອັກຄີໄພປີ 2019 ເມືອງທີ່ເກີດອັກຄີໄຟຫຼາຍກວ່າໝູ່ແມ່ນເມືອງໄຊເສດຖາ 16 ຄັ້ງ ຫາດຊາຍຟອງ 15 ຄັ້ງ ສີໂຄດຕະບອງ 13 ຄັ້ງ ສີສັດຕະນາກ ຈັນທະບູລີ ເມືອງລະ 12 ຄັ້ງ ແລະ ເມືອງປາກງື່ມ 2 ຄັ້ງ.
ແຫຼ່ງຂໍ້ມູນ: ໜສພ ວຽງຈັນໃໝ່