ໂດຍປະຕິບັດຕາມສັນຍາລະຫວ່າງກະຊວງປ້ອງກັນປະເທດ ແຫ່ງ ສປປ ລາວ ແລະ ກະຊວງປ້ອງກັນປະເທດ ແຫ່ງສະຫະພັນຣັດເຊຍ ກ່ຽວກັບການຊ່ວຍເຫຼືອດ້ານເຕັກນິກການທະຫານ, ໃນຊຸມປີທີ່ຜ່ານມາກະຊວງປ້ອງກັນປະເທດ ແຫ່ງສະຫະພັນລັດເຊຍ ໄດ້ໃຫ້ການຊ່ວຍເຫຼືອດ້ານເຕັກນິກການທະຫານໃຫ້ແກ່ກອງທັບປະຊາຊົນລາວ ຢ່າງຫຼວງຫຼາຍ ແລະ ລໍ້າຄ່າທີ່ສຸດ.
ເຊິ່ງໃນຄັ້ງນີ້ ກໍໄດ້ມອບສູນເຝິກທະຫານອາກາດໃຫ້ແກ່ກອງບັນຊາການທະຫານອາກາດກອງທັບປະຊາຊົນ ລາວ ແລະ ມອບອຸປະກອນເຕັກນິກການທະຫານໃຫ້ແກ່ກອງທັບປະຊາຊົນລາວ ພິທີີມອບ-ຮັບເຄື່ອງດັ່ງກ່າວໄດ້ຈັດຂຶ້ນໃນວັນທີ 20 ມັງກອນ 2020 ນີ້,
ໃນນັ້ນ ພິທີມອບ-ຮັບ ສູນເຝິກທະຫານອາກາດ ໄດ້ຈັດ ຂຶ້ນຢູ່ທີ່ກອງພັນໃຫຍ່ 703, ໂດຍມີທ່ານ ພົນເອກ ຈັນສະໝອນ ຈັນຍາລາດ ກໍາມະການກົມການ ເມືອງສູນກາງພັກ, ລັດຖະມົນຕີກະຊວງປ້ອງກັນປະເທດ ແຫ່ງ ສປປລາວ, ມີທ່ານ ວາລາດີເມຍ ກາວີມິນ ເອກອັກຄະລັດທະທູດ ວິສາມັນ ຜູ້ມີອຳນາດເຕັມ ແຫ່ງ ສ ຣັດເຊຍ ປະຈໍາ ສປປ ລາວ, ທ່ານ ພົນຕີ ເຄີຊີມມົບສະກີ ຫົວໜ້າກົມ ໃຫຍ່ຮ່ວມມືສາກົນດ້ານການທະຫານ ກະຊວງປ້ອງກັນປະເທດ ແຫງ ສ ຣັດເຊຍ ພ້ອມດ້ວຍນາຍທະຫານຂັ້ນສູງຈາກຣັດເຊຍ ແລະ ລາວເຂົ້າຮ່ວມ.
ທ່ານ ພັນເອກ ຄໍາເຫຼັກ ແສງ ພະຈັນ ຫົວຫນ້າການທະຫານ ກອງບັນຊາການທະຫານອາກາດ ໄດ້ຕາງໜ້າໃຫ້ກະຊວງປ້ອງກັນປະເທດລາວ ກ່າວສະແດງຄວາມຂອບໃຈຢ່າງສຸດຊຶ້ງ ຕໍ່ກະຊວງປ້ອງກັນປະເທດ ສ ຣັດເຊຍ ທີ່ໄດ້ໃຫ້ການຊ່ວຍເຫຼືອກອງທັບປະຊາຊົນລາວຕະຫຼອດມາ
ໂດຍສະເພາະແມ່ນກອງບັນຊາການທະຫານອາກາດ ໃຫ້ມີຄວາມເຕີບໃຫຍ່ຂະຫຍາຍຕົວຢ່າງບໍ່ຢຸດຢັ້ງ, ການຊ່ວຍເຫຼືອໃນຄັ້ງນີ້ ແມ່ນສຸດທີ່ມີຄວາມສໍາຄັນຍິ່ງ ພໍດີກົງກັບວັນສ້າງຕັ້ງກອງທັບປະຊາຊົນລາວຄົບຮອບ 71 ປີ, ເຊິ່ງເປັນການປະກອບສ່ວນສໍາຄັນເຂົ້າໃນການສ້າງຄວາມເຂັ້ມແຂງຂອງກອງທັບປະຊາຊົນລາວ, ສະແດງເຖິງຄວາມສາມັກຄີຮັກແພງ, ຊ່ວຍເຫຼືອເຊິ່ງກັນ ແລະ ກັນແບບເພື່ອນສະໜິດສະຫາຍ, ພວກຂ້າພະເຈົ້າຕີລາຄາສູງຕໍ່ ການຊ່ວຍເຫຼືອຄັ້ງນີ້ ແລະ ຈະນໍາ ໃຊ້ໃຫ້ເກີດປະໂຫຍດສູງສຸດ ແກ່ການກໍ່ສ້າງກອງບັນຊາການທະຫານອາກາດ ກໍຄືກອງທັບປະຊາຊົນລາວໃຫ້ເຂັ້ມແຂງ ແລະ ທັນສະໄໝ.
ຈາກນັ້ນ ທັງສອງຝ່າຍກໍໄດ້ຮ່ວມກັນຕັດແຖບຜ້າເປີດນໍາໃຊ້ສູນເຝິກທະຫານອາກາດ ກອງບັນຊາການທະຫານອາກາດ ກອງທັບປະຊາຊົນລາວຢ່າງເປັນທາງການ.
ໃນວັນດຽວກັນ, ຍັງໄດ້ຈັດພິທີມອບ-ຮັບ ອຸປະກອນເຕັກນິການທະຫານໃຫ້ແກ່ກະຊວງປ້ອງກັນປະເທດລາວ ຢູ່ທີ່ ໂຮງງານແຜນທີ່ກອງທັບ, ໂດຍມີ ທ່ານ ພົນ ໂທ ທອງລອຍ ສິລິວົງ ກຳມະການ ສູນກາງພັກ ຮອງລັດຖະມົນ ຕີກະຊວງປ້ອງກັນປະເທດ ຫົວ ໜ້າກົມໃຫຍ່ການເມືອງກອງທັບ, ມີທ່ານ ວາລາດີເມຍ ກາວີມິນ ເອກອັກຄະລັດຖະທູດ ວິສາມັນຜູ້ມີອຳນາດເຕັມ ແຫ່ງ ສ ຣັດເຊຍ ປະຈໍາ ສປປ ລາວ, ທ່ານ ພົນຕີ ເຄີຊີມມົບສະກີ ຫົວໜ້າກົມໃຫຍ່ ຮ່ວມມືສາກົນດ້ານການທະຫານ ກະຊວງປ້ອງກັນປະເທດ ແຫ່ງ ສ ຣັດເຊຍ ພ້ອມດ້ວຍນາຍທະຫານຂັ້ນສູງຈາກຣັດເຊຍ ແລະ ລາວເຂົ້າຮ່ວມ.
ໃນພິທີ ທ່ານ ພົນຕີ ປະສິດ ທ່ຽງທໍາ ຮອງຫົວໜ້າກົມໃຫຍ່ເສນາທິການກອງທັບ ໄດ້ຕາງໜ້າໃຫ້ຄະນະນໍາກະຊວງປ້ອງກັນປະເທດ ແຫ່ງ ສປປ ລາວ ໄດ້ກ່າວ ຮັບເຄື່ອງດັ່ງກ່າວ ພ້ອມທັງໄດ້ຍົກໃຫ້ເຫັນວ່າ:
ການພົວພັນຮ່ວມມືທີ່ເປັນມູນເຊື້ອລະຫວ່າງກອງທັບປະຊາຊົນລາວ ກັບ ກອງທັບຣັດເຊຍ ໄດ້ສືບຕໍ່ຂະຫຍາຍຕົວ ແລະ ໄດ້ຮັບການເພີ່ມພູນຄູນສ້າງຢ່າງບໍ່ຢຸດຢັ້ງການທີ່ກະຊວງປ້ອງກັນປະເທດ ສ ຣັດເຊຍ ໃຫ້ການ ຊ່ວຍ ເຫຼືອພາຫະນະ ແລະ ອຸປະກອນເຕັກນິກການທະຫານແກ່ກອງທັບປະຊາຊົນລາວໃນຄັ້ງນີ້ ແມ່ນສຸດທີ່ມີຄວາມສໍາຄັນຍິ່ງ ເຊິ່ງເປັນການປະກອບສ່ວນສໍາ ຄັນເຂົ້າໃນການສ້າງຄວາມເຂັ້ມແຂງແກ່ກອງທັບປະຊາຊົນລາວ ໃຫ້ມີຄວາມເຕີບໃຫຍ່ຂະຫຍາຍຕົວຢ່າງບໍ່ຢຸດຢັ້ງ.
ແຫຼ່ງຂໍ້ມູນ: ນ. ຍ້ອມເພັດ Lao people’s Army News