ສູນວິເຄາະ ແລະ ລະບາດວິທະຍາ ນະຄອນຫຼວງວຽງຈັນ ຖະແຫຼງຂ່າວກ່ຽວກັບພະຍາດປອດອັກເສບສາຍພັນໃໝ່ໂຄໂຣນາ, ແຈ້ງໃຫ້ປະຊາຊົນໝັ້ນໃຈເຖິງເຄື່ອງມືໃນການວິເຄາະເຊື້ອໄວຣັດຢູ່ປະເທດເຮົາ ແມ່ນໃນລະດັບມາດຕະຖານສາກົນ ແລະ ຂໍຮຽກຮ້ອງໃຫ້ປະຊາຊົນເປັນເຈົ້າການຮ່ວມກັນສັງເກດຖ້າມີກໍລະນີສົງໃສ.
ຫົວໜ້າສູນວິເຄາະ ແລະ ລະບາດວິທະຍາ ໄດ້ກ່າວວ່າ:
ໄດ້ກວດຜົນຈາກກໍລະນີສົງໃສ 11 ກໍລະນີ, ເຊີ່ງໃນນັ້ນ 09 ກໍລະນີແມ່ນບໍ່ພົບເຊື້ອ ແລະອີກ 02 ກໍລະນີ ແມ່ນຍັງຢູ່ໃນຂັ້ນຕອນການກວດຫາເຊື້ອ, ແຈ້ງໃຫ້ປະຊາຊົນຮັບຮູ້ວ່າ ສປປລາວ ແມ່ນມີຄວາມສາມາດພ້ອມຮັບມືໃນການກວດຫາເຊື້ອ ເຊິ່ງຜົນກວດທີ່ອອກມາ ແມ່ນມີການຄວບຄຸມຄຸນນະພາບ ແລະ ໄດ້ມາດຕະຖານສາກົນແນ່ນອນ.
ປັດຈຸບັນ, ປະເທດລາວເຮົາ ແມ່ນມີຄວາມກ້າວໄກໃນເລື່ອງເຄື່ອງມືກວດຕ່າງໆ ແລະ ໄດ້ຮັບຮອງຈາກສາກົນ, ໂດຍມີການກວດສອບ ແລະ ວັດແທກດ້ວຍທີມງານທີ່ມີຄຸນະພາບ.
ນອກຈາກນີ້, ຍັງມີແຜນຂະຫຍາຍເຄື່ອງວິເຄາະພະຍາດໄປຍັງບັນດາແຂວງພາກເໜືອທີ່ມີຄວາມສ່ຽງເຊັ່ນ: ອຸດົມໄຊ, ຫຼວງນໍ້າທາ ແລະ ຜົ້ງສາລີ ເພື່ອໃຫ້ທີມແພດສາມາດກວດຫາຜູ້ທີ່ຕິດເຊື້ອໄດ້ວ່ອງໄວຂຶ້ນ.
ແຫຼ່ງຂໍ້ມູນ: Sourioudong Sundara
