ທ່ານນາງ ມະນີວອນ ວົງສຸລິ ນາຍບ້ານໂພນສະຫວາດໃຕ້ ເມືອງສີໂຄດຕະບອງ ໃຫ້ສຳພາດວ່າ:
ໂພນສະຫວາດໃຕ້ເປັນບ້ານໜຶ່ງທີ່ໄດ້ເອົາໃຈໃສ່ໃນການສ້ອມແປງ ປັບປຸງເສັ້ນທາງຄົມມະນາໃຫ້ມີຄວາມສະ ອາດເປັນລະບົບລະບຽບ ແລະ ທຽວໄປມາສະດວກ ເມື່ອກ່ອນບັນດາເສັ້ນທາງຮ່ອມ ແລະ ທາງຫຼັກເປັນດິນແດງ ເຮັດໃຫ້ການໄປມາມີຄວາມຫຍຸ້ງຍາກ ໂດຍສະເພາະແມ່ນລະດູຝົນ ດັ່ງນັ້ນ ອຳນາດການປົກຄອງບ້ານຈຶ່ງໄດ້ປຶກສາຫາລືເພື່ອແກ້ໄຂບັນຫາດັ່ງກ່າວ ສະນັ້ນຈຶ່ງໄດ້ຕົກລົງສ້າງເປັນເສັ້ນທາງເບຕົງ ໂດຍແມ່ນທຶນປະຊາຊົນ 100%.
ທົ່ວບ້ານມີເສັ້ນທາງຮ່ອມທັງໝົດ 7 ເສັ້ນ ເສັ້ນທາງຫຼັກ 1 ເສັ້ນ ຍາວ 2.150 ແມັດ ປັດຈຸບັນເສັ້ນທາງເຫຼົ່ານີ້ໄດ້ສ້າງເປັນທາງປູເບຕົງສຳເລັດ 100% ມູນຄ່າ 1,5 ຕື້ກວ່າກີບ ການກໍ່ສ້າງບັນດາເສັ້ນທາງດັ່ງກ່າວ ໃນເບື້ອງ ຕົ້ນໄດ້ພົບຄວາມຫຍຸ້ງຍາກພໍສົມຄວນ ເນື່ອງຈາກວ່າປະຊາຊົນຈຳນວນໜຶ່ງບໍ່ເຂົ້າໃຈ ຫຼັງຈາກນັ້ນກໍໄດ້ມີການສຶກສາອົບຮົມແນວທາງນະໂຍບາຍຂອງພັກລັດ
ສະນັ້ນຈຶ່ງເຮັດໃຫ້ປະຊາຊົນມີຄວາມຕື່ນຕົວປະກອບສ່ວນທຶນຮອນໃນການສ້າງເສັ້ນທາງຫຼັກ ທາງຮ່ອມຕ່າງໆ ຕາມເງື່ອນໄຂ ແລະ ທ່າແຮງຂອງແຕ່ລະຄອບຄົວ ໃນນີ້ໄດ້ຮັບການສະໜັບສະໜູນຂອງນັກທຸລະກິດຈຳນວນໜຶ່ງ ມູນຄ່າຫຼາຍຮ້ອຍລ້ານກີບ ແລະ ຈະສືບຕໍ່ກໍ່ສ້າງເສັ້ນທາງທີ່ຍັງເປັນທາງດິນແດງປະທານ 100 ກວ່າແມັດໃຫ້ສຳເລັດ.
ນອກຈາກນີ້ກໍໄດ້ເອົາໃຈໃສ່ສ້າງຂະບວນການຕ່າງໆ ເປັນຕົ້ນແມ່ນຂະບວນການອະນາໄມຕ້ານໜອນນໍ້າຍຸງລາຍຢູ່ແຕ່ລະຄອບຄົວ ການເຂົ້າເຖິງການບໍລິການສາທາລະນະສຸກ ການສຶກສາ ການເຂົ້າເຖິງຂໍ້ມູນຂ່າວສານຜ່ານໂທລະໂຄ່ງບ້ານ ການສົ່ງເສີມຄວາມສະເໝີພາບລະຫວ່າງຍິງ-ຊາຍ.
ສະນັ້ນ ຈຶ່ງເຮັດໃຫ້ບ້ານໄດ້ຮັບນາມມະຍົດເປັນບ້ານປອດຄະດີ ປອດຢາເສບຕິດ ບ້ານພັດທະນາ ບ້ານເຂັ້ມແຂງ ບ້ານສາທາລະນະສຸກ ແລະ ອື່ນໆທີ່ຂັ້ນເທິງວາງອອກ ພ້ອມນີ້ ຍັງໄດ້ເອົາໃຈໃສ່ການຄວບຄຸມບໍ່ໃຫ້ມີການເປີດບໍລິການຮ້ານສະໜຸກເກີ ແລະ ຮ້ານບໍລິການອິນເຕີເນັດຕ່າງໆ.
ທັງນີ້ກໍເພື່ອຫຼີກລ່ຽງການມົ້ວສຸມສິ່ງເສບຕິດ ການລັກໜີໂມງຮຽນຂອງລູກຫຼານ ແລະ ອື່ນໆ ບັນດາຜົນງານທີ່ຍາດມາໄດ້ນັ້ນ ກໍຍ້ອນໄດ້ຮັບການຊີ້ນຳ-ນຳພາຂອງຂັ້ນເທິງ ໂດຍສະເພາະແມ່ນການນຳເມືອງສີໂຄດຕະບອງ ຄວາມຕື່ນຕົວ ການໃຫ້ຄວາມຮ່ວມມືຂອງປະຊາຊົນ ແລະ ອົງການປົກຄອງບ້ານທີ່ມີຄວາມເຂັ້ມແຂງ.
ແຫຼ່ງຂໍ້ມູນ: ວຽງຈັນໃໝ່
Hits: 26
