Monday, July 15, 2024
Lenovo

ສະຫຼຸບຜົນການຮ່ວມມືກວດກູ້ ແລະ ທຳລາຍລະເບີດບໍ່ທັນແຕກ ສົກປີ 2019-2020

ພາຍຫຼັງສໍາເລັດສັງເກດ ການທໍາລາຍລະເບີດບໍ່ທັນແຕກ (ລບຕ) ທີ່ສະໜາມທຳລາຍ ລບຕ ຂອງກອງພັນໃຫຍ່ 702, ບັນດາ ຜູ້ແທນໄດ້ສືບຕໍ່ເຂົ້າຮ່ວມພິທີສະຫຼຸບຜົນການຮ່ວມມືກັບກອງທັບຣັດເຊຍ ໃນການກວດກູ້ ແລະ ທໍາລາຍ ລບຕ ທີ່ສະໜາມບິນທົ່ງໄຫຫີນ ແຂວງຊຽງຂວາງ ປະຈໍາ ສົກປີ 2019-2020 ໄດ້ຈັດຂຶ້ນທີ່ໂຮງແຮມຊຽງຂວາງວິວ.

ພາຍໃຕ້ການເປັນປະທານຮ່ວມຂອງ ສະຫາຍ ພົນຕີ ອ່ອນສີ ແສນສຸກ ຮອງລັດຖະມົນຕີກະຊວງປ້ອງກັນປະເທດ, ຫົວໜ້າຄະນະຊີ້ນໍາການຮ່ວມມືກັບກໍາລັງປະກອບອາວຸດ ແຫ່ງ ສ ຣັດເຊຍ ກ່ຽວກັບການກວດກູ້ ແລະ ທໍາ ລາຍ ລບຕ, ສະຫາຍບຸນຕົ້ນ ຈັນທະພອນ ເຈົ້າແຂວງໆຊຽງຂວາງ ແລະ ສະຫາຍພັນເອກ ອັນເດຣ ລິນຄາເຊບ ທີ່ປຶກສາທູດປ້ອງກັນຊາດແຫ່ງ ສ ຣັດເຊຍ ປະຈຳລາວ, ມີບັນດາຜູ້ຕາງໜ້າຈາກ 4 ກົມໃຫຍ່, ຫ້ອງວ່າການກະຊວງປ້ອງກັນປະເທດ, ຄະນະປົກຄອງ ແຂວງ, ຄະນະພັກ-ຄະນະບັນຊາ ກົມກອງກໍາລັງຫຼວງ, ກໍາລັງ ທ້ອງຖິ່ນແຂວງຊຽງຂວາງ, ແຂກຖືກເຊີນ, ຄະນະອະນຸກໍາມະການຮັບຜິດຊອບວຽກງານການຮ່ວມ ມືໃນແຕ່ລະດ້ານຂອງທັງສອງຝ່າຍເຂົ້າຮ່ວມ.

ສະຫາຍ ພັນເອກ ປາດຖະໜາ ວຸດທິຈັກ ຮອງຫົວໜ້າຫ້ອງການກົມໃຫຍ່ເສນາທິການກອງທັບ, ຄະນະຮັບຜິດ ຊອບເນື້ອໃນ ແລະ ແຜນການ ໄດ້ລາຍງານຜົນສໍາເລັດວຽກງານຮອບດ້ານໃນການຮ່ວມມືກັບກໍາລັງປະກອບອາວຸດ ແຫ່ງ ສ ຣັດເຊຍ ກວດກູ້ ແລະ ທໍາລາຍ ລບຕ ທີ່ສະໜາມບິນທົ່ງໄຫຫີນ ແຂວງຊຽງຂວາງ ໃຫ້ຮູ້ວ່າ:

ຜ່ານການຮ່ວມມືປະຕິບັດ ງານພາກສະໜາມກວດກູ້ ແລະ ທໍາລາຍ ລບຕ ເລີ່ມແຕ່ວັນທີ 28 ຕຸລາ 2019 ເຖິງ ວັນທີ 20 ມີນາ 2020 ໃນບໍລິເວນໄດ້ຮັບການຢັ້ງຢືນຄຸນນະພາບເປັນພື້ນທີ່ສໍາເລັດ ການກວດກູ້ ລບຕ ຈາກຫ້ອງການ ຄະນະກຳມະການແຫ່ງຊາດ ເພື່ອເກັບກູ້ ລບຕ (ຄຊກລ) ເນື້ອ ທີ່ທັງໝົດ 104.093,5 ຕາແມັດ ໄດ້ກວດພົບ ແລະ ທໍາລາຍ ລບຕ ທັງໝົດ 836 ໜ່ວຍ

ໃນນັ້ນ, ປະເພດລະເບີດລູກຫວ່ານທໍາລາຍ ກັບທີ່ຈໍານວນ 111 ໜ່ວຍ, ປະເພດສັບພະວຸດທັງໝົດ 725 ໜ່ວຍ ໃນນີ້, ທໍາລາຍກັບທີ່ຈໍານວນ 423 ໜ່ວຍ ແລະ ເຄື່ອນຍ້າຍໄປທໍາລາຍຢູ່ສະໜາມທີ່ໄດ້ກໍານົດຈໍານວນ 302 ໜ່ວຍ. ຊະນິດ ລບຕ ແລະ ສັບພະວຸດຕ່າງໆ ມີດັ່ງນີ້:

ບົມບີ BLU 26, BLU 61, ລູກປືນ 12,7 ມມ, 20 ມມ, 23 ມມ, 37 ມມ, 40 ມມ, 57 ມມ, 75 ມມ, 76 ມມ, 85 ມມ, 105, ມມ, 106 ມມ, 122 ມມ, 155 ມມ, ລູກປືນ-ຟິວ ຄົກ 50 ມມ, 60 ມມ, 81 ມມ, ລູກຈະຫຼວດ 2,75 ນີ້ວ, ລູກຈະຫຼວດ 3,5 ນີ້ວ, ມິນ M 14, ລະເບີດມື M 26, M 33, MK 3A2, ລະເບີດປາຍປືນ M 9, ບົມ 04 ປອນ, 20 ປອນ ແລະ ບົມ MK 82 (500 ປອນ).

ໃນໂອກາດນີ້, ສະຫາຍ ພົນຕີ ອ່ອນສີ ແສນສຸກ ຕາງໜ້າການນໍາກະຊວງປ້ອງກັນປະເທດ ແຫ່ງ ສປປ ລາວ ປະດັບຫຼຽນໄຊພິລາດອາດຫານ, ຫຼຽນກາມິດຕະພາບ ແລະ ມອບໃບຍ້ອງຍໍປະເພດຕ່າງໆໃຫ້ບັນດາກົມກອງລວມໝູ່ ແລະ ບຸກຄົນຜູ້ທີ່ມີຜົນງານປະກອບສ່ວນໃນການຮ່ວມມືຕາມລໍາດັບຄື :

ປະດັບຫຼຽນໄຊພິລາດອາດຫານຊັ້ນ III ໃຫ້ 2 ກົມກອງ ລວມໝູ່, ບຸກຄົນ 113 ສະຫາຍ ໃນນີ້, ມີຝ່າຍລາວ 90 ສະຫາຍ ແລະ ຣັດເຊຍ 23 ສະຫາຍ; ມອບຫຼຽນກາມິດຕະພາບກອງທັບປະຊາຊົນລາວໃຫ້ບຸກຄົນຝ່າຍຣັດ ເຊຍ 16 ສະຫາຍ; ມອບໃບຍ້ອງຍໍກະຊວງປ້ອງກັນປະເທດໃຫ້ບຸກຄົນ ຝ່າຍລາວ 70 ສະຫາຍ, ຄະນະນັກບິນຣັດເຊຍ 13 ສະຫາຍ ແລະ ມອບໃບຍ້ອງຍໍກົມໃຫຍ່ການເມືອງກອງທັບໃຫ້ບຸກຄົນ ຝ່າຍລາວ 30 ສະຫາຍ ຕື່ມອີກ.

ແຫຼ່ງຂໍ້ມູນ: ບຸນທະວີ ອິນທະມິດ, Lao people’s Army News

InsideLaos
InsideLaoshttp://insidelaos.com
Online Journalists at insidelaos.com.

More from author

Related posts

ຂໍຂອບໃຈນຳຜູ້ສະໜັບສະໜູນ

Latest posts

ຊໍາຊຸງ ເປີດໂຕ Galaxy Z Fold6 ແລະ Z Flip6 ຍົກລະດັບ Galaxy Al ລຸ້ນໃໝ່ສໍາລັບໂທລະສັບໜ້າຈໍພັບ.

ຊໍາຊຸງລາວ ເປີດໂຕ Galaxy Z Fold6 ແລະ Z Flip6 ພ້ອມໂປຣໂມຊັນພິເສດສໍາລັບຜູ້ທີ່ສັ່ງຊື້ລ່ວງໜ້າທີ່ Galaxy Experience Space ນະຄອນຫຼວງວຽງຈັນ  ເປິດປະສົບການ Galaxy AI ລຸ້ນຫຼ້າສຸດສໍາລັບໂທລະສັບມືຖືໜ້າຈໍພັບ  ໃຫ້ຜູ້ເຂົ້າຮ່ວມງານໄດ້ສໍາຜັດການໃຊ້ງານໂທລະສັບມືຖືທີ່ທັນສະໄໝ  ຮ່ວມກັບໂມງ Galaxy Watch7 ແລະ ຫູຟັງ Galaxy Buds3/Galaxy Buds3 Pro ເຊິ່ງໄດ້ເປີດໂຕພອ້ມກັນໃນງານ Samsung Unpacked ທີ່ປາຣີ  (Paris) ປະເທດຝຣັ່ງ ໃນວັນທີ 10 ກໍລະກົດ 2024 ທີ່ຜ່ານມາ.

ສາຍການບິນ Vietjet ບັນລຸ​ຂໍ້​ຕົກລົງ ​ຍົກລະດັບ​ການ​ເຊື່ອມ​ຕໍ່​ການ​ຂົນ​ສົ່ງ​ທາງ​ອາກາດ ລະຫວ່າງ ສປປ ລາວ ແລະ ສສ ຫວຽດນາມ

(ນະຄອນຫຼວງວຽງຈັນ, ວັນທີ 11 ກໍລະກົດ 2024) - ກະຊວງໂຍທາທິການ ແລະ ຂົນສົ່ງປະຈຳ ສປປ ລາວ ແລະ ສາຍການບິນ Vietjet ປະກາດຂໍ້ຕົກລົງເພີ່ມທະວີການເຊື່ອມຕໍ່ການຂົນສົ່ງທາງອາກາດລະຫວ່າງ ປະເທດລາວ-ຫວຽດນາມ.

Sky Connections ໄດ້ຂະຫຍາຍ: ເສັ້ນທາງໃໝ່ຂອງສາຍການບິນ Vietjet ໃນທົ່ວປະເທດຈີນ ແລະ ເກົາຫຼີໃຕ້

(ນະຄອນຫຼວງວຽງຈັນ, ວັນທີ 08 ກໍລະກົດ 2024) –  ສາຍການບິນ Vietjet ໄດ້ສ້າງບາດກ້າວຄັ້ງໃໝ່ໃນການເຊື່ອມຕໍ່ສາຍການບິນຜ່ານ ພາກພື້ນອາຊີປາຊີຟິກ ດ້ວຍ​ການ​ເປີດ​ບໍລິການ​ໂດຍ​ກົງ​ແຫ່ງ​ທຳ​ອິດ ​ທີ່​ເຊື່ອມ​ຕໍ່​ ນະຄອນໂຮຈີ​ມິນ ​- Xi'an (ຈີນ) ​ແລະ ການ​ປະກາດ​ເສັ້ນທາງ Nha Trang - Daegu (ສ.​ເກົາຫຼີ),