ສະຫາຍ ພັນເອກ ດຣ ນາງ ວັນເພັງ ພວງສາວະດີ ຮອງຫົວ ໜ້າກົມເສນາຮັກ ກົມໃຫຍ່ພະ ລາທິການກອງທັບ, ຄະນະກອງ ເລຂາຄະນະສະເພາະກິດເພື່ອປ້ອງກັນ, ຄວບຄຸມ ແລະ ຕອບໂຕ້ຕໍ່ການລະບາດຂອງພະຍາດອັກ ເສບປອດ ຍ້ອນເຊື້ອຈຸລາໂລກໂຄ ໂລນາສາຍພັນໃໝ່ ( ໂຄວິດ-19 ) ທັງເປັນຮອງຄະນະຊີ້ນໍາລວມ ຂອງຄະນະສະເພາະກິດກົມໃຫຍ່ ພະລາທິການກອງທັບໃຫ້ຮູ້ວ່າ:
ສໍາລັບກອງທັບປະຊາຊົນລາວ ພາຍຫຼັງທີ່ມີແຈ້ງການຂອງລັດຖະບານ ກໍຄືຄະນະສະເພາະກິດລະດັບຊາດ ເພື່ອປ້ອງກັນ, ຄວບຄຸມ ແລະ ຕອບໂຕ້ການແຜ່ລະບາດຂອງພະຍາດອັກເສບປອດ ຍ້ອນເຊື້ອຈຸລາໂລກສາຍພັນໃໝ່ (ໂຄວິດ-19), ຄະນະນໍາກະຊວງປ້ອງກັນປະເທດກໍຊີ້ນໍາກົມເສນາຮັກ ກໍຄືໜ່ວຍງານວິຊາສະເພາະ ທີ່ກ່ຽວຂ້ອງມີການເຄື່ອນໄຫວ ແລະ ນໍາໃຊ້ທຸກເງື່ອນໄຂ, ທ່າແຮງເຂົ້າໃນການສະກັດກັ້ນ ແລະ ປ້ອງກັນຕໍ່ການແຜ່ລະບາດຂອງ ເຊື້ອພະຍາດໂຄວິດ-19 ດ້ວຍ ການມອບໃຫ້ສະຖາບັນອະນາໄມກັນພະຍາດ ແລະ ສົ່ງເສີມສຸຂະພາບກອງທັບລົງເຄື່ອນໄຫວ ໂຄສະນາສຸຂະສຶກສາຢູ່ບັນດາກະຊວງ, ອົງການ, ກົມ, ກອງ, ບັນດາບໍລິສັດ, ຫ້າງຮ້ານ, ສະຖາບັນການສຶກສາ, ໂຮງໝໍ ແລະ ບັນດາບ້ານຢ່າງທົ່ວເຖິງກ່ຽວກັບຜົນຮ້າຍ, ວິທີການປ້ອງກັນ ແລະ ອື່ນໆອັນໄດ້ເຮັດໃຫ້ພະນັກງານ-ນັກຮົບ, ລັດຖະກອນ, ນັກຮຽນ-ນັກສຶກສາ ແລະ ພໍ່ແມ່ປະຊາຊົນລາວບັນດາເຜົ່າມີຄວາມຮັບຮູ້, ເຂົ້າໃຈ ແລະ ປ້ອງກັນຕົນເອງຈາກເຊື້ອພະຍາດໂຄວິດ-19 ຕັ້ງ ແຕ່ຫົວທີ.
ນອກນີ້ຍັງໄດ້ແຕ່ງຕັ້ງຄະນະຊີ້ນໍາລວມ ແລະ ຄະນະສະ ເພາະກິດສະກັດກັ້ນ ແລະ ປ້ອງກັນການແຜ່ລະບາດຂອງເຊື້ອພະຍາດໂຄວິດ-19 ຂັ້ນກົມໃຫຍ່ ພະລາທິການກອງທັບ ເພື່ອເປັນສູນກາງໃນການຊີ້ນໍາ-ຊຸກຍູ້ບັນດາອົງ ການ, ກົມກອງ ແລະ ບັນດາໂຮງໝໍທີ່ຢູ່ໃນຖັນແຖວກອງທັບ ແຕ່ສູນກາງລົງຮອດກົມກອງທ້ອງຖິ່ນໃຫ້ເປັນເຈົ້າການໃນການປ້ອງກັນ, ຄວບຄຸມ ແລະ ໂຕ້ຕອບຕໍ່ການລະບາດຂອງພະຍາດໂຄວິດ-19 ພ້ອມທັງຕິດຕາມ, ກວດກາ ແລະ ປະເມີນຜົນສະພາບການລະບາດຢ່າງໃກ້ຊິດ ແລ້ວລາຍງານໃຫ້ຂັ້ນເທິງຮັບຊາບໃນແຕ່ລະວັນ, ໄດ້ກໍານົດເອົາໂຮງໝໍສູນກາງ 103 ກອງທັບ ແລະ ບັນດາໂຮງໝໍບໍລິເວນຂອງກອງທັບເປັນໂຮງໝໍຫຼັກໃນການ ກຽມຄວາມພ້ອມປິ່ນປົວຄົນເຈັບ ກໍລະນີສົງໄສຕິດເຊື້ອພະຍາດກໍລະນີຮ້າຍແຮງ ຖ້າໂຮງໝໍບໍລິເວນປິ່ນປົວບໍໄດ້ແມ່ນສົ່ງຕໍ່ໃຫ້ໂຮງໝໍແຂວງ ເຊິ່ງເປັນໂຮງໝໍທີ່ລັດຖະບານໄດ້ປະກອບອຸປະກອນການແພດທີ່ໄດ້ມາດຕະຖານ ກຽມຮອງຮັບໃນຂອບເຂດທົ່ວປະເທດ.
ນອກນີ້, ຫ້ອງວ່າການກະຊວງປ້ອງກັນປະເທດກໍໄດ້ອອກແຈ້ງ ການເຖິງບັນດາຫ້ອງການກົມໃຫຍ່, ຫ້ອງວ່າການກະຊວງ, ວິທະຍາຄານ, ຫ້ອງການຄະນະກໍາມະການ ປກຊ-ປກສ ສູນກາງ, ກອງພົນ, ກອງບັນຊາການທະ ຫານນະຄອນຫຼວງ-ແຂວງ, ກອງພັນໃຫຍ່ ແລະ ກົມວິທະຍາ ສາດ-ປະຫວັດສາດການທະຫານ ໂດຍເນື້ອໃນແຈ້ງການໄດ້ເນັ້ນໃຫ້ ແຕ່ລະພາກສ່ວນແຈ້ງໃຫ້ນາຍ ແລະ ພົນທະຫານທີ່ຢູ່ໃນສັງກັດຂອງຕົນ ໃຫ້ມີສະຕິລະວັງຕົວ ແລະ ມີຄວາມຮັບຜິດຊອບສູງຕໍ່ສັງຄົມ, ຈໍາກັດການອອກໄປເຄື່ອນໄຫວກິດຈະກໍານອກສະຖານທີ່ພັກເຊົາ, ຈໍາກັດການໄປສະຖານທີ່ແອອັດ, ຫຼີກລ້ຽງການເຕົ້າໂຮມຄົນຈໍານວນຫຼາຍ, ຕ້ອງຮັກສາສຸຂະພາບຂອງຕົນໃຫ້ແຂງແຮງ, ລ້າງມືໃຫ້ສະອາດເລື້ອຍໆ, ປະຕິບັດມາລະຍາດໃນການໄອ, ຈາມ, ຖ້າຫາກມີອາການໄຂ້, ໄອ ຫຼື ຫາຍໃຈຍາກແມ່ນໃຫ້ຕິດຕໍ່ສາຍດ່ວນ 166 ທັນທີ, ເພື່ອຂໍຄໍາແນະນໍາສິ່ງທີ່ຄວນປະຕິບັດຕໍ່ໄປ.
ພ້ອມນີ້ກະຊວງປ້ອງກັນປະເທດ ກໍເຫັນດີອະນຸຍາດໃຫ້ນາຍ ແລະ ພົນທະຫານທີ່ເດີນທາງກັບມາຈາກຕ່າງປະເທດລາພັກເປັນເວລາ 14 ວັນ ເພື່ອຕິດຕາມຕົນເອງ ກ່ຽວກັບໝວດອາການທີ່ອາດຕິດເຊື້ອພະຍາດໂຄວິດ-19.
ພາຍຫຼັງຕິດຕາມ ແລະ ເຝົ້າລະວັງຮອດ 14 ວັນເຫັນວ່າສຸຂະພາບແຂງແຮງດີ ບໍ່ມີອາການບົ່ງບອກເຖິງການຕິດ ເຊື້ອພະຍາດຈຶ່ງອະນຸຍາດໃຫ້ໄປການປົກກະຕິ, ນອກນີ້ຍັງໃຫ້ແຕ່ລະພາກສ່ວນໂຈະ ຫຼື ເລື່ອນການຕ້ອນຮັບແຂກຕ່າງປະເທດ, ການເດີນທາງໄປຢ້ຽມຢາມ-ເຮັດວຽກຢູ່ຕ່າງປະເທດ, ການສົ່ງນາຍ ແລະ ພົນທະຫານໄປເຝິກອົບ ຮົມ ຫຼື ກໍ່ ສ້າງໄລຍະຍາວຢູ່ຕ່າງປະເທດ.
ສໍາລັບກົມເສນາຮັກກໍໄດ້ອອກແຈ້ງການເຖິງເສນາຮັກໃນຂອບເຂດທົ່ວປະເທດໃຫ້ແຕ່ງຕັ້ງໜ່ວຍແພດເພື່ອກວດກາຄັດກອງນາຍ, ພົນທະຫານ ແລະ ແຂກທີ່ເຂົ້າມາເຮັດວຽກ, ພົວພັນວຽກໃນຫ້ອງການຕ້ອງປະຕິບັດເຂັ້ມງວດຕາມຫຼັກການຂອງການແພດ, ຖ້າພົບກໍລະນີສົງໄສລາຍງານດ່ວນ ແລະ ຄັດແຍກຕາມລະບຽບຫຼັກ ການ, ບັນດາວິທະຍາຄານ, ໂຮງຮຽນໃນກອງທັບກໍໃຫ້ເອົາໃຈໃສ່ຕິດຕາມສຸຂະພາບຂອງນັກຮຽນນັກສຶກສາໃນແຕ່ລະວັນ, ເຮັດອະນາໄມຫໍພັກ, ເຮືອນຄົວ, ເຮືອນກິນເຂົ້າໃຫ້ສະອາດຢູ່ສະເໝີ.
ພິເສດກະຊວງປ້ອງກັນປະເທດ ກໍໄດ້ສະໜອງທຶນຈໍານວນໜຶ່ງຊື້ອຸປະກອນການແພດທີ່ຈໍາເປັນ ເພື່ອສະໜອງໃຫ້ພາກສ່ວນທີ່ມີ ຄວາມສ່ຽງ ແລະ ໜ່ວຍງານແພດ ຢູ່ບັນດາກົມກອງ ໂດຍສະເພາະ ກົມກອງເຂດຊາຍແດນທີ່ມີຄວາມ ສ່ຽງເພື່ອຕິດຕາມອາການ, ປ້ອງກັນຈາກພະຍາດໂຄວິດ-19.
ທັງໝົດນີ້ສະແດງໃຫ້ເຫັນເຖິງຄວາມຮັບຜິດຊອບສູງ, ຄວາມເປັນຫ່ວງເປັນໃຍຂອງຄະນະນໍາກະຊວງປ້ອງກັນປະເທດ ແລະ ໜ່ວຍງານ ທີ່ກ່ຽວຂ້ອງທີ່ມີຕໍ່ນາຍ ແລະ ພົນທະຫານທີ່ເປັນຮົ້ວຂອງຊາດນັ້ນ ໃຫ້ມີສຸຂະພາບແຂງແຮງຮັບປະກັນການເຮັດສໍາເລັດໜ້າທີ່ ອັນມີກຽດສະຫງ່າທີ່ປະເທດຊາດ ແລະ ປະຊາຊົນມອບໝາຍ ໃຫ້ ທັງເປັນການສະກັດກັ້ນແລະ ປ້ອງກັນບໍ່ໃຫ້ເຊື້ອພະຍາດໂຄວິດ- 19 ເກີດຂຶ້ນຢູ່ໃນຖັນແຖວກໍາລັງ ປະກອບອາວຸດປ້ອງກັນຊາດ.
ໂດຍ: ຄອນສະຫວັນ ໄຊຍະລາດ, Lao people’s Army News