ບໍລິສັດ ລາວໂທລະຄົມມະນາຄົມມະຫາຊົນ(ລລທ) ໄດ້ມອບເງິນ 2 ຕື້ ກີບໃຫ້ກັບລັດຖະບານກໍຄືຄະນະ ສະເພາະກິດເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19, ຢູ່ທີ່ສຳນັກງານນາຍົກລັດຖະມົນຕີ.
ເຊິ່ງກ່າວມອບໂດຍທ່ານ ສຸພົນ ຈັນທະວີໄຊ ຜູ້ອຳນວຍການໃຫຍ່ ລລທ ແລະ ກ່າວຮັບໂດຍທ່ານ ສົມດີ ດວງດີ ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ, ຫົວໜ້າສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19.
ທ່ານ ສຸພົນ ຈັນທະວີໄຊ ໄດ້ກ່າວວ່າ: ການມອບວັດຖຸປັດໄຈ ໃຫ້ແກ່ລັດຖະບານໃນຄັ້ງນີ້ ກໍເພື່ອໃຫ້ສັງຄົມໄດ້ຮັບຮູ້ວ່າ:
ລລທ ກໍມີຄວາມເປັນຫ່ວງເປັນໃຍ ພໍ່ແມ່ປະຊາຊົນທຸກທົ່ວໜ້າ ແລະ ເປັນສ່ວນໜຶ່ງໃນການປະກອບສ່ວນເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19.
ທ່ານ ສົມດີ ດວງດີ ໄດ້ກ່າວ ຂອບໃຈນຳ ລລທ ທີ່ເປັນສ່ວນໜຶ່ງໃນການປະກອບສ່ວນໃນການປ້ອງກັນ, ຄວບ ຄຸມ ແລະ ແກ້ໄຂການລະບາດຂອງພະຍາດໂຄວິດ-19, ຈະນຳເອົາເງິນຈຳນວນດັ່ງກ່າວນີ້ ໄປເປັນສ່ວນໜຶ່ງໃນການປ້ອງກັນ, ຄວບຄຸມ ແລະ ແກ້ໄຂການລະບາດຂອງ ພະຍາດໂຄວິດ-19, ເພື່ອເຮັດໃຫ້ ສປປ ລາວ ຂອງພວກເຮົາຜ່ານວິກິດນີ້ໄປ.
ແຫຼ່ງຂໍ້ມູນ: ໂດຍ: ແສງເດືອນ, Lao people’s Army News