ກະຊວງການຕ່າງປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ສະແດງຄວາມນັບຖືມາຍັງ ສະຖານເອກອັກຄະຣາຊະທູດ ແຫ່ງຣາຊະອານາຈັກໄທ ທີ່ ນະຄອນຫຼວງວຽງຈັນ ແລະ ຂໍຖືເປັນກຽດແຈ້ງໃຫ້ຊາບວ່າ:
ໂດຍອີງຕາມຄໍາສັ່ງຂອງນາຍົກລັດຖະມົນຕີ ແຫ່ງ ສປປ ລາວ ສະບັບເລກທີ: 06/ນຍ, ລົງວັນທີ 29 ມີນາ 2020 ວ່າດ້ວຍ ການເພີ່ມທະວີມາດຕະການສະກັດກັ້ນ, ກັນການແຜ່ລະບາດ, ຄວບຄຸມ ແລະ ກຽມຄວາມພ້ອມຮອບດ້ານເພື່ອ ຕ້ານພະຍາດ COVID-19 ແລະ ເພື່ອເປັນການສືບຕໍ່ເພີ່ມທະວີການປ້ອງກັນສະກັດກັ້ນ ແລະ ກັນການແຜ່ລະບາດຂອງພະຍາດດັ່ງກ່າວ ບໍ່ໃຫ້ແຜ່ລາມອອກໃນວົງກວ້າງ ຢູ່ ສປປ ລາວ.
ສະນັ້ນ, ຈຶ່ງໄດ້ຍົກລະດັບການປ້ອງກັນ ໂດຍຈະນໍາໃຊ້ມາດຕະການປີດດ່ານສາກົນທີ່ຍັງເປີດນໍາໃຊ້ຢູ່ໃນປະຈຸບັນທັງຫມົດຢ່າງສິ້ນເຊີງ ແລະ ຈະບໍ່ອະນຸຍາດໃຫ້ບຸກຄົນໃດ ເດີນທາງເຂົ້າ-ອອກ ສປປ ລາວ ຜ່ານດ່ານດັ່ງກ່າວຢ່າງເດັດຂາດ ຍົກເວັ້ນລົດບັນທຸກ ທີ່ຂົນສົ່ງສິນຄ້າ ແລະ ການເຂົ້າ-ອອກ ໃນກໍລະນີສຸກເສີນເທົ່ານັ້ນ, ມາດຕະການດັ່ງກ່າວຈະເລີ່ມຈັດຕັ້ງປະຕິບັດ ນັບແຕ່ມື້ນີ້ເປັນຕົ້ນໄປ ຈົນເຖິງວັນທີ 19 ເມສາ 2020.
ໄລຍະເວລານໍາໃຊ້ມາດຕະການດັ່ງກ່າວ ອາດຈະມີການປ່ຽນແປງ ໂດຍອີງໃສ່ສະພາບຕົວຈິງຂອງການແຜ່ລະບາດຂອງພະຍາດ ໃນແຕ່ລະໄລຍະ, ສະນັ້ນ, ຈຶ່ງຂໍຄວາມຮ່ວມມືມາຍັງທາງການໄທ ຊ່ວຍແນະນໍາແຮງງານລາວ ທີ່ເຮັດວຽກຢູ່ໄທ ບໍ່ໃຫ້ມີການເຄື່ອນຍ້າຍ ແລະ ໃຫ້ຄວາມຮ່ວມມືໃນການຢູ່ກັບທີ່ໃນໄລຍະນີ້.
ກະຊວງການຕ່າງປະເທດແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ຂໍຄວາມຮ່ວມມືມາຍັງ ສະຖານເອກອັກຄະຣາຊະທູດ ແຫ່ງ ຣາຊະອານາຈັກໄທ ເພື່ອຊ່ວຍແຈ້ງມາດຕະການດັ່ງກ່າວໄປຍັງພາກສ່ວນກ່ຽວຂ້ອງຂອງໄທຕາມທາງຄວນ ແລະ ຂໍສະແດງຄວາມນັບຖືຢ່າງສູງມາໃນໂອກາດນີ້ດ້ວຍ.
ແລະທາງປະເທດໄທ ໄດ້ປະກາດເຊັ່ນດຽວກັນ.
ແຫຼ່ງຂໍ້ມູນ: https://facebook.com/2663881970388996