ປັດຈຸບັນ, ບັນດາບໍລິສັດ, ຫ້າງຮ້ານ, ບຸກຄົນ, ນິຕິບຸກຄົນ ທັງພາກລັດ, ພາກເອກະຊົນທັງພາຍໃນ ແລະ ຕ່າງປະເທດ ໄດ້ປະກອບສ່ວນເງິນ ແລະ ອຸປະກອນການແພດຕ່າງໆ ເປັນຕົ້ນ ຜ້າອັດປາກ-ດັງ, ເຈວລ້າງມື, ເຫລົ້າເກົ້າສິບມາ ໃຫ້ລັດຖະບານລາວ ເພື່ອຕ້ານການແຜ່ລະບາດຂອງເຊື້ອໄວຣັດໂຄວິດ-19 ຢູ່ ສປປ ລາວ ບໍ່ໃຫ້ເພີ່ມຂຶ້ນ
ແລະ ໃນໂອກາດທີ່ເປັນປະທານກອງປະຊຸມທາງໄກ ເພື່ອກວດກາ ແລະ ປຶກສາຫາກ່ຽວກັບວຽກງານແກ້ໄຂ ແລະ ສະກັດກັ້ນການແຜ່ລະບາດຂອງເຊື້ອພະຍາດໂຄວິດ-19 ໃນວັນທີ 6 ເມສາ 2020 ນີ້, ທ່ານ ທອງລຸນ ສີສຸລິດ ນາຍົກລັດຖະ ມົນຕີ ໄດ້ເນັ້ນໜັກໃຫ້ສູນກາງ ກໍຄື ພາກສ່ວນທີ່ກ່ຽວຂ້ອງ ຈັດສັນສົ່ງອຸປະກອນດັ່ງກ່າວໃຫ້ແຂວງຕ່າງໆ ເພື່ອແຈກຢາຍລ້າໃຫ້ປະຊາຊົນ ໂດຍສະເພາະແຂວງທີ່ຂາດເຂີນ ແລະ ຢູ່ຫ່າງໄກ.
ພ້ອມດຽວກັນນັ້ນ, ທ່ານນາຍົກລັດຖະມົນຕີຍັງເນັ້ນໃຫ້ສືບຕໍ່ຊຸກຍູ້ ແລະ ລະດົມ ທົ່ວສັງຄົມ ໃຫ້ການຊ່ວຍ ເຫລືອ ແລະ ບໍລິຈາກເຄື່ອງມື, ອຸປະກອນການແພດ ແລະ ອື່ນໆ ເພື່ອນຳໄປໃຫ້ໂຮງໝໍ ແລະ ແຈກຢາຍໃຫ້ບັນ ດາແຂວງ, ພ້ອມທັງໃຫ້ຄະນະສະເພາະກິດ ຈັດຊື້ອຸປະກອນທາງການແພດທີ່ຍັງບໍ່ທັນພຽງພໍ ເພື່ອຈັດສົ່ງໄປໃຫ້ບັນດາແຂວງ ແລະ ອື່ນໆ.
ໃນໂອກາດດຽວກັນ, ທ່ານ ທອງລຸນ ສີສຸລິດ ຍັງໄດ້ຮຽກຮ້ອງໃຫ້ທຸກຂະແໜງການ ທັງສູນກາງ ແລະ ທ້ອງຖິ່ນ ຕະຫລອດຮອດ ປະຊາຊົນລາວບັນດາເຜົ່າ ໃນຂອບເຂດທົ່ວປະເທດ ຮ່ວມແຮງຮ່ວມໃຈກັນ ເຂັ້ມງວດຈັດຕັ້ງປະຕິບັດ ຄຳສັ່ງ 06/ນຍ,
ກໍຄື ມາດຕະການຕ່າງໆ ທີ່ລັດຖະບານ ແລະ ຄະນະສະເພາະກິດ ວາງອອກ ຢ່າງເດັດຂາດ ແນໃສ່ຕ້ານ ແລະ ຄວບຄຸມ ການແຜ່ລະບາດຂອງເຊື້ອໄວຣັດໂຄວິດ-19 ຢູ່ ສປປ ລາວ ບໍ່ໃຫ້ເພີ່ມຂຶ້ນ ແລະ ກັບຄືນສູ່ສະພາບປົກກະຕິໂດຍໄວ.
ແຫຼ່ງຂໍ້ມູນ: ຂ່າວ: ທະນູທອງ, ຂປລ