ທ່ານ ບຸນວັນ ຈະສົ໋ວເກົ້າ ຮອງເຈົ້າເມືອງໄຊທານີ ໃຫ້ສໍາພາດວ່າ:
ສໍາລັບແຮງງານລາວທີ່ກັບຈາກຕ່າງປະເທດຂອງເມືອງໄຊທານີມີທັງໝົດ 962 ຄົນ ໂດຍນໍາໄປກັກບໍລິເວນ 14 ວັນໃນ 15 ສູນ ເຊິ່ງແຕ່ລະສູນແມ່ນໄດ້ຈັດແບ່ງທີມແພດຕິດຕາມວັດແທກອຸນຫະພູມຢ່າງໃກ້ຊິດ ຜ່ານການຕິດຕາມກວດກາ ເຫັນວ່າມີກໍລະນີສົງໄສເປັນພະຍາດໂຄວິດ-19 ຈໍານວນ 4 ຄົນ
ໄດ້ສົ່ງໄປກວດຫາເຊື້ອຢູ່ໂຮງໝໍ ຜົນອອກມາບໍ່ພົບເຊື້ອ ພຽງແຕ່ເປັນໄຂ້ຫວັດທໍາມະດາ ມາຮອດວັນທີ 16 ເມສາ 2020 ເມືອງໄຊທານີສາມາດປົດປ່ອຍແຮງງານໝົດແລ້ວໃນ 15 ສູນ ເຫັນວ່າແຮງງານແຕ່ລະຄົນມີສຸຂະພາບແຂງແຮງດີ ສ່ວນການຊ່ວຍເຫຼືອຂອງສັງຄົມ ເມືອງໄດ້ມີການປຸກລະດົມຫົວໜ່ວຍທຸລະກິດທີ່ມີເງື່ອນໄຂປະກອບສ່ວນເຄື່ອງອຸປະໂພກ-ບໍລິໂພກຈໍານວນໜຶ່ງ ໃນນີ້ກໍໄດ້ສືບຕໍ່ມອບໃຫ້ກັບພໍ່ແມ່ປະຊາຊົນທີ່ມີຄວາມທຸກຍາກຂາດເຂີນ.
ສໍາລັບທິດທາງໃນຕໍ່ໜ້າ ເພື່ອເຮັດໃຫ້ການສືບຕໍ່ຈັດຕັ້ງປະຕິບັດຄໍາສັ່ງເລກທີ 06/ນຍ ໃຫ້ມີຄວາມເຂັ້ມງວດຂຶ້ນຕື່ມ ທາງຄະນະສະເພາະກິດຂັ້ນເມືອງ ຕ້ອງສືບຕໍ່ໂຄສະນາປະຊາສໍາພັນໃຫ້ພໍ່ແມ່ປະຊາຊົນມີຄວາມເຂົ້າໃຈຕໍ່ຜົນຮ້າຍ ແລະ ວິທີປ້ອງກັນຕົນເອງຈາກພະຍາດໂຄວິດ-19 ສືບຕໍ່ກວດກາຮ້ານຄ້າ ຮ້ານກິນດື່ມ ບໍ່ໃຫ້ມີການເປີດບໍລິການຈົນກວ່າຮອດວັນທີ 3 ພຶດສາພາ 2020
ໃຫ້ອໍານາດການປົກຄອງບ້ານຕິດຕາມແຮງງານ 962 ຄົນທີ່ປົດປ່ອຍອອກຈາກສູນໄປພັກເຊົາຢູ່ເຮືອນນໍາຄອບຄົວ ກະກຽມຮ່ວມມືກັບຄະນະສະເພາະກິດເພື່ອຮອງຮັບແຮງງານລາວທີ່ຈະເຂົ້າມາໃໝ່ຫຼັງວັນທີ 3 ພຶດສະພາ 2020 ໂດຍຈັດສູນຮອງຮັບຢູ່ຫຼັກ 27 ສູນນີ້ສາມາດຮອງຮັບແຮງງານໄດ້ເຖິງ 500 ຫາ 1000 ຄົນ ແລະ ສືບຕໍ່ເຝົ້າລະວັງ ໃຫ້ປະຊາຊົນມີສະຕິຕື່ນຕົວປ້ອງກັນຕົນເອງ ເພື່ອຮ່ວມກັນສະກັດກັ້ນ ແລະ ຕ້ານພະຍາດໂຄວິດ-19.
ແຫຼ່ງຂໍ້ມູນ: ຂ່າວ & ພາບ: ຂັນທະວີ, ວຽງຈັນໃໝ່