ສູນສະຖິຕິແຫ່ງຊາດ ເປີດເຜີຍຂໍ້ມູນກ່ຽວກັບວິສາຫະກິດໃນລາວ ໂດຍລະບຸວ່າ 94% ຂອງວິສາຫະກິດທີ່ຈົດທະບຽນໃນລາວ ເປັນວິສາຫະກິດຊຸມຊົນ ແລະ ຈຳນວນນີ້ ມີພຽງແຕ່ 8.7% ເທົ່ານັ້ນ ທີ່ໃຊ້ບໍລິການແຫຼ່ງເງິນທຸນຈາກທະນາຄານ ນອກຈາກນີ້ ຍັງມີລາຍລະອຽດອື່ນໆ ທີ່ກ່ຽວຂ້ອງ ໂດຍອິນໄຊລາວນຳມາສະຫຼຸບເປັນ 5 ເລື່ອງໄດ້ ດັ່ງນີ້

1. ຜ່ານໄປ 6 ປີ ມີຈຳນວນເພີ່ມຂຶ້ນ 7.3%

ໂດຍຈາກຂໍ້ມູນໃນປີ 2019-2020 ສະແດງໃຫ້ເຫັນວ່າ ລາວມີຈຳນວນວິສາຫະກິດທີ່ຈົດທະບຽນລວມທັງໝົດ 133,997 ແຫ່ງ ເພີ່ມຂຶ້ນ 9,124 ແຫ່ງເມື່ອທຽບກັບປີ 2013 ຫຼືຄິດໄລ່ເປັນອັດຕາສ່ວນໄດ້ 7.3%

2. ປະມານ 94.2% ເປັນວິສາຫະກິດຊຸມຊົນ

ໃນບັນດາວິສາຫະກິດທັງໝົດ ປະມານ 94.2% ເປັນວິສາຫະກິດຊຸມຊົນ ຫຼື ຄິດໄລ່ເປັນຈຳນວນທັງໝົດ ແມ່ນ 126,168 ແຫ່ງ ສ່ວນອີກ 4.9% ເປັນວິສາຫະກິດຂະໜາດນ້ອຍ ແລະ 0.7% ເປັນວິສາຫະກິດຂະໜາດກາງ ຂະນະທີ່ອີກບໍ່ຮອດ 0.2% ທີ່ເປັນວິສາຫະກິດຂະໜາດໃຫຍ່

ບ່ອນສະແດງໂຄສະນາ


ກົດທີ່ພາບນີ້ ເພື່ອເບິ່ງຂໍ້ມູນເພິ່ມເຕິມ

ປະເພດທຸລະກິດ ຂາຍສົ່ງ-ຂາຍຍ່ອຍ ແລະ ທຸລະກິດແປງລົດ-ລົດຖີບ ແມ່ນປະເພດທຸລະກິດທີຫຼາຍທີສຸດ ໂດຍມີຈຳນວນລວມກັນເຖິງ 61.2% ຂອງປະເພດທຸລະກິດທີ່ມີການຈົດທະບຽນທັງໝົດ ຂະນະທີ່ທຸລະກິດໂຮງງານແປຮູບມີພຽງ 14.7% ແລະ ທຸລະກິດບໍລິການມີ 10.6%

3. ເກືອບທັງໝົດ ຢູ່ໃນເມືອງ

ວິສາຫະກິດຂະໜາດໃຫຍ່ ມັກຈະຕັ້ງຢູ່ໃນແຂວງເສດຖະກິດຂອງປະເທດ ເຊັ່ນ ແຂວງຫຼວງພະບາງ, ຄໍາມ່ວນ, ສະຫວັນນະເຂດ ແລະ ນະຄອນຫຼວງວຽງຈັນ ແລະເຊັ່ນດຽວກັນກັບວິສາຫະກິດອື່ນໆ ທີສ່ວນໃຫຍ່ ຈະຕັ້ງຢູ່ໃຈກາງເມືອງ ແຕ່ມີບ້າງບາງແຫ່ງ ທີ່ຈັດຕັ້ງຢູ່ໃນພື້ນທີ່ຊົນນະບົດຫ່າງໄກ ຂອງພາກໃຕ້ ເຊິ່ງຍັງບໍ່ມີຖະໜົນເຂົ້າເຖິງ

4. ສ້າງວຽກເຮັດງານທຳ ເກືອບ 500,000 ຕໍາແໜ່ງ

ໃນປີທີ່ຜ່ານມາ ວິສາຫະກິດທັງປະເທດ ສ້າງລາຍໄດ້ລວມກັນປະມານ 107,584,000 ລ້ານກີບ ສ້າງອັດຕາການຈ້າງວຽກ 490,373 ຕໍາແໜ່ງ ໂດຍ 50.1% ເປັນຜູ້ຍິງ

ຢ່າງໃດກໍ່ດີ ມີວິສາຫະກິດຫຼາຍກວ່າ 120,000 ແຫ່ງ ຫຼື ຄິດເປັນ 90.6% ຂອງທັງໝົດ ມີພະນັກງານພຽງແຕ່ 1-5 ຄົນ

5. 91.3% ເຮັດທຸລະກິດດ້ວຍທຶນສ່ວນຕົວ

ຂໍ້ມູນລະບຸວ່າ ວິສາຫະກິດທີ່ມີອັດຕາສ່ວນການກູ້ເງິນຈາກທະນາຄານຫຼາຍທີ່ສຸດ ແມ່ນວິສາຫະກິດຂະໜາດກາງ ໂດຍຄິດໄລ່ເປັນສັດສ່ວນ 29.7% ຂອງຈຳນວນວິສາຫະກິດຂະໜາດກາງທັງໝົດ ໃນຂະນະທີ່ ວະສາຫະກິດຂະໜາດໃຫຍ່ ມີອັດຕາສ່ວນໃນການໃຊ້ບໍລິການເງິນກູ້ທະນາຄານ 27% ແລະ ວິສາຫະກິດຂະໜາດນ້ອຍ ໃຊ້ບໍລິການເງິນກູ້ທະນາຄານ 24.6%

ສຳລັບວິສາຫະກິດຊຸມຊົນ ແມ່ນກຸ່ມທີ່ໃຊ້ເງິນທືນຕົນເອງຫຼາຍສຸດ ໂດຍມີອັດຕາສ່ວນໃນການໃຊ້ບໍລິການທາງການທະນາຄານພຽງ 8.7%

ແຕ່ຫາກຄິດໄລ່ເປັນຈຳນວນຫົວໜ່ວຍທຸລະກິດທີ່ມີການກູ້ຍືມເງິນຈາກທະນາຄານແລ້ວ ວິສາຫະກິດຊຸມຊົນ ຍັງແມ່ນກຸ່ມທີ່ໃຫຍ່ສຸດ ໂດຍມີເຖິງ 10,977 ແຫ່ງ ຮອງລົງມາແມ່ນທຸລະກິດຂະໜາດໜ້ອຍ 1,624 ແຫ່ງ ຂະໜາດກາງ 283 ແຫ່ງ ແລະ ໃຫຍ່ 75 ແຫ່ງ ຕາມລຳດັບ

ໃນຈຳນວນຂ້າງເທິງນີ້ ຫາກຄິດໄລ່ເປັນຈຳນວນວຶິສາຫະກິດທີ່ກູ້ຍືມເງິນ ແລະໄມ່ກູ້ຍືມເງິນ ຈາກທະນາຄານແລ້ວ ຈະພົບວ່າ ເປັນພຽງ 9.7% ຂອງຈຳນວນວິສາຫະກິດທັງໝົດເທົ່ານັ້ນ ຫຼືອາດກ່າວໄດ້ວ່າ ວິດສາຫະກິດລາວຈຳນວນເຖິງ 91.3% ນັ້ນ ເຮັດທຸລະກິດດ້ວຍທຶນສ່ວນຕົວ

ສຳລັບຜົນການສຳຫຼວດເທື່ອນີ້ ທ່ານ ນາງ ພອນສາລີ ສຸກສະຫວັດ ຫົວໜ້າສູນສະຖະຕິແຫ່ງຊາດ ກ່າວວ່າ ຈະເປັນຂໍ້ມູນອ້າງອີງທີ່ມີປະໂຫຍດ ສຳລັບຜູ້ມີໜ້າທີ່ກຳນົດນະໂຍບາຍໃຫ້ວິສາຫະກິດທຸກລະດັບ ລວມເຖິງນັກວິໄຈ, ນັກຮຽນ ແລະ ຜູ້ເຮັດວຽກອື່ນໆ ທີ່ກ່ຽວຂ້ອງດ້ວຍ

Hits: 18

LEAVE A REPLY

ກະລຸນາໃສ່ຄໍາເຫັນຂອງທ່ານ!
ກະລຸນາໃສ່ຊື່ຂອງທ່ານທີ່ນີ້